KWO MI JUKRISTU

Jamtic ma nyen pi coko m’ikind yenga

Niai dwi mi kwong’o, oro 2018, program mi coko m’ikind yenga bibedo ku nyithi korolembe man media ma bikonyowa ninyang’ i verse. Gicungo iwi Les Saintes Écritures. Traduction du monde nouveau mir aponja (nwtsty) ma nwang’ere i Internet, kadok nwang’u Biblia mir aponjane mbe i dhok peri de. M’umbe jiji, lembe maeno bikonyi kara iyikiri cuu mandha pi coko. M’usagu zoo, dong’ wek lembuno ukonyi kara icor ceng’ini mandha ku Yehova ma en e Wegwa ma jamer!

NYITHI KOROLEMBE PI NYANG’ I VERSE

Nyithi korolembe pi nyang’ i verse konyojo pi ninyang’ iwi kura mi dhanu, kabedo man iwi wec mi verse matung’ tung’ mi Biblia.

Matayo 12:20

Atutu m’udunyo yiro: Con, i udi mapol jubed jutio ku thala ma juyiko kud ulobo man mo thalane ubino moj oliv. Kitambi ubed ukonyo nicwiyo moje kud i the thala pi nilielo mac. Wec “atutu m’udunyo yiro” uai kud i dhok mi Jugiriki; enyutho kitambi m’ubedunyo yiro pilembe fodi dong maje moko utho ngo ento m’ulielne re dong’ utho. Lembila pa Isaya 42:3 ular uewo pi kisa ma Yesu bibedo ko, niwacu ebinego ngo dong mac mi genogen mi dhanu ma ng’ic man ma jucayu.

Matayo 26:13

Andha ndha: Wec mi dhu Jugiriki a·menʹ uai kud i wec mi Juebrania ʼa·menʹ, thelembene tie “ebed kumeno” kunoke “andha.” Yesu ubed utio ku wec maeno iwang’ nicaku wec moko, lembang’ola, kunoke lembila pi ninyutho nia lembe m’ebeweco iwie utie lemandha man ma jugeno. Pieno, Yesu kende re m’utio ku wec “andha” kunoke amen, i ayi masegi i lembagora maleng’. Kinde ma judok iwie wang’ ario (a·menʹ a·menʹ), calu ma wang’ mapol jutio kude i Injili pa Yohana, thelembene tie “andhandha.”—Yh 1:51.

MEDIA

Fotho, cal m’akuba, video ma wec umbe i ie, man video matung’ tung’ m’ukoro i lembe m’i Biblia.

Bethfage, got Zeituni, man Yerusalem

Video m’adundo maeni unyutho gengi moko m’uai yo nyang’u ucidho i Yerusalem, niai i pacu moko ma tin julwong’o et-Tur, ma i Biblia julwong’o Bethfage, nitundo iwi usimbru got moko mi Got Zeituni. Niai kud i Bethfage, Bethania nwang’ere yo nyangu mi Got Zeituni. Kinde ma Yesu ku Jukwenda pare gibino i Yerusalem, gibino ku ng’iyo mi dok nivuto i Bethania, ma tin julwong’o el-ʽAzariyeh (El ʽEizariya), nying’ maeno uai kud i dhok mi Juarabi ma thelembene tie “Kabedo pa Lazaru.” M’umbe jiji, kuca Yesu ubed ubedo i ot pa Martha, Maria, man Lazaru (Mt 21:17; Mk 11:11; Lk 21:37; Yh 11:1). Kinde ma Yesu ubed uai kud i ot migi pi nicidho i Yerusalem, ecicopere nia ebed eng’olo i gengi m’urombo ku ma junyutho i video maeni. I nindo 9 mi dwi Nisan, oro 33 R.M., kinde ma Yesu ugam uidho iwi nyathi kana iwi Got Zeituni pi nicidho i Yerusalem, ubenen ve eidhe kud i pacu mi Bethfage, e ecidho nitundo i Yerusalem.

Gengi m’uai i Bethania ucidho i Bethfage
Bethfage
Got Zeituni
Poga mi Kidron
Got mir hekalu

Musumali i cogo mir ufunytielo

Eni tie cal m’unyutho cogo mir ufunytielo ma juguro ku musumali ma borne tie santimetre 11 ku nusu. Junwang’u cogo maeno i oro 1968, kinde ma jubino nigolo piny yo malu mi Yerusalem. Junwang’u nia cogone tie mi rundi ma con mi Jurumi. Cogo maeno ma junwang’u unyutho andha nia con jubed jutio ku musumali pi niguro dhanu iwi yen. Musumali maeni urombo ku musumali ma Jurumi gitio ko pi niguro Yesu iwi yen. Junwang’u cogo maeno i sanduku moko mi kidi ma nyinge tie ossuary, ma juketho i ie cogo m’uthwo mi dhanu ma dong’ utop. Eno ubenyutho nia ing’ei ma juguro ng’atini iwi yen, ecopere nia jubed juyike i liel.—Mt 27:35.