Wamed bodho mwa i tic mi rweyo lembanyong’a​—Wek niponjo Biblia ku dhanu m’ubemediri ngo

PIRANG’O PIRE TIE TEK: Kara dhanu bothi, gicikiri nilwong’o nying’ Yehova. (Rm 10:13, 14) Ento dhanu ceke ngo ma giyio niponjo kudwa Biblia re ma gikwo nimakere ku cik pa Yehova. Pieno, watio cuu ku saa mwa i lembanyong’a kara wakony dhanu m’utimo alokaloka pi ninyayu anyong’a i Yehova. Ka wadaru ponjo Biblia ku ng’atu moko pi nindo m’ulwar, ma re ebetimo ngo alokaloka, wajigo niponjo kude Biblia kara watii cuu ku saa mwa pi nikonyo ju ma Yehova utelogi i bang’e man i dilo pare. (Yh 6:44) Re kan i ng’eye edok etimo alokaloka moko, man enyutho nia ‘adundene bedo ayika pi kwo ma rondo ku rondo,’ wadowacaku ponjo kude Biblia kendo.​—Tic 13:48.

KITE MA JUROMO TIMO KO:

• Foi japonj Biblia pilembe emaru enwang’ ng’eyong’ec ma tap.​—1Tm 2:4

• Nyuth ire nia pirang’o ukwayu eketh lembe m’eponjo i timo.​—Lk 6:46-49

• Wec kude iwi lapor pa jacoikodhi ma Yesu umio, man penje nia ang’o m’ubecere niketho lembe m’eponjo i timo.​—Mt 13:18-23

• Kor ire i ayi ma ber nia pirang’o ibejigo ponjo Biblia kude

• Nyuth ire nia ibibeliewe wang’ acel acel pi nikethocwinye, man i nindo m’ubino kan etimo mediri, wucopo caku ponjo kendo kude

NEN VIDEO, MAN I NG’EYE DWOK WANG’ PENJI M’ULUBO E:

• Ang’o m’unyutho nia japonj Biblia utimo ngo mediri?

• Jarwei ukonyo japonj Biblia nenedi nia etim alokaloka?

• Ang’o m’unyutho nia jarwei uweko ngo japonj Biblia ku rac, ma ing’eye ecopo dok caku ponjo kude Biblia kendo tek etimo alokaloka?