Wamed bodho mwa i tic mi rweyo lembanyong’a​—Kite mi rweyo lembanyong’a nikadhu kud i kamera kunoke telefon mi kor ot

PIRANG’O PIRE TIE TEK: Tin teknoloji ubemedere ameda i wang’e man lembe ma reco de unyai, uketho dhanu dupa gibetio ku kamera man telefon mi kor ot kara gigwokiri ni dhanu ma reco ma copo mondo i wigi. Nirweyo lembanyong’a ni ng’atu m’ubenenowa kud i kamera i ot pare ma wan ke wabenene ngo, copo nyayu lworo i iwa. Lembe m’ulubo e bikonyowa nirweyo lembanyong’a m’umbe lworo nikadhu kud i kamera kunoke telefon mi kor ot.

KITE MA JUROMO TIMO KO:

• Bed ku nen ma ber. Dhanu ma pol ma gitie ku kamera kunoke telefon mi kor ot i pacu migi, gibed gimaru niweco kudwa

• Poi nia kamera moko lar caku maku lembe ceke m’ibetimo i wang’ nidiyo ulang’ mi kor ot. Man won otne copo neni man ewinjo lembe ceke m’ibeyero kinde ma fodi itundo atunda i pacu pare

• Ka won otne ugamu dhogi, wec i ba telefon mi kor ot kunoke i ba kamera calu ve ibeweco i bang’ ng’atune wang’ ku wang’. Vonjo peri man jeste ubed mi kite peri ma nja. Yer lembe m’ipangu nia ibiyero ire ka nwang’u ng’atune bino i beng’i ku kume. Ka wubeweco kude kud i kamera, kud icor ceng’ini akeca ku kamerane

• Kinde ma wujigo wec, poi nia won otne copo neni asu, man ecopo winjo bende lembe m’ibeyero i ng’ei wec ma wuweco kude