Kite ma wacopo miyo ko kony i ng’ey peko ma wok rek

Tin peko ma wok rek udoko ni gin ma tundo saa moko ci. Ka peko maeno utundo, ukwayu jutim tego pi nimaku yub ma cuu mi miyo kony ni dhanu ma lembene uwok i wigi, man ubekwayu jutel wi lembene ma ber mandha. Eno re m’uketho Guriri m’utelowic umaku yub kara juketh departema moko i Bethel m’i wang’ ng’om zoo pi nibemiyo kony ni dhanu ma peko ma wok rek utundo i wigi.

Kan umego mi departema maeno giwinjo pi peko moko ma wok rek, giweco ku judong’ cokiri mi kabedone wang’acel pi ning’eyo kony ma Jurwei lembanyong’a bibedo ku yenyne. Tek pekone unyotho piny lee ma Jurwei ma keca gicopo coko ngo dhu lembene gin gigi, biro mi Bethel bing’iyo umego moko ma giromo kara gitel wi tic mi miyo konyne. Umego maeno gicopo kwayu kony mi ju ma giwodhiri ku berocwinygi kunoke giromo kwayu bende giramiya mi piny moko ci ma dhanu gitie ko, kunoke gicopo ng’iewo piny ma yenyne nuti i kabedo maeca man gipoke.

Ka jucoko dhu lembene i ayi maeno, emiyo bero lee mandha. Ekonyo kara ku junyoth saa i kum tic ma pigi tek ungo akeca, ekonyo bende kara lembe kud ujeb wi dhanu, man kara kud jutii ku sente man jamtic lee akeca. Ento tek umego gibemaku yub migi gin gigi, lembe maeno ceke copo wok.

Umego ma biro mi Bethel ung’iyo pi nimiyo kony giromo neno gin nia ubekwayu jutii ku sente adi man jubibedo ku yeny mir umego ku nyimego adi ma giwodhiri ku berocwinygi pi nikonyo tic mi miyo kony. Gicopo nyuthiri bende ni judongo pa gavmenti mi the dero ma gibibekonyowa kara saa ceke tic mwa mi miyo kony utimere piyo. Pieno, ng’atini ucikere ngo nimaku yub en gire mi caku joko sente, kunoke nicaku oro kony, man nicidho i kabedo ma peko uwok i iye ma ke jukwaye ngo nia etim lembene.

Re asu ka peko ma wok rek utundo ukwayu wamii kony. (Eb 13:16) Wamaru umego mwa. Dong’ waromo tim’ang’o? Ma pire tek nisagu zoo wacopo rwo pi ju ma peko ma wok rek umulo kumgi man warwo pi ju ma gibetimo tic mi miyo kony. Waromo miyo bende giramiya pi nikonyo tic m’ubetimere i wang’ ng’om zoo. I the telowic mi Guriri m’utelowic, biro mi Bethel mi ng’om ma tung’ tung’ re ma gibineno nia sentene romo konyo lembe lee i theng’ ng’om ma kani. Man tek wabemito wadikara ku kumwa i lembene, waromo pong’o karathasi ma julwong’o Demande d’admission comme volontaire local développement/construction (DC-50) pi ninyutho andha nia watie ayika.

NEN VIDEO MA THIWIYE TIE PII MA DIT M’UNYOTHO PINY I NG’OM MI BRAZIL, MAN I NG’EYE DWOK WANG’ PENJI M’ULUBO E:

Ang’o m’ubewang’u ii i kum tego ma Jumulembe pa Yehova utimo pi nimiyo kony i ng’ey pii m’upong’ m’unyotho piny i ng’om mi Brazil i oro 2020?