Penji mi jusom
Nyo kite ma tung’ tung’ ma jukwanu i Jugalatia 5:22, 23 kende re m’utie “nying’ tipo”?
Giragora pa Jugalatia eno urieyo kite ma tung’ tung’ abung’wen mi nying’ tipo. Eyero kumae: “Nying’ tipo en e mer, mutoro, kwiocwiny, mwonyolembe hai, bedo ber ku dhanu, berocwiny, yioyic, molcwiny, kwerigijo.” Re kite ma tung’ tung’ ma beco ma tipo pa Mungu copo konyowa nicego ni eno kende ngo.
Pirang’o wayero kumeno? I wang’ nikwanu kite ma tung’ tung’ mi nying’ tipo, jakwenda Paulo ular ukiewo kumae: “Nie tic mi kum ginyuthri, ma gi eni: tarwang’, ku sasa, kud awanya ma rac, ku rwo ni ayi gin m’acwia, kud ajoga ma jutimo, kud adegi, ku por, ku ngiri, ku kwinyo, kud ali, ku pokri, ku yic ma tung’ tung’, ku kumira, ku mer ma jumer ko ku kong’o, ku miel ma rac, ku wagi gin ma kumeno de.” (Gal. 5:19-21) Jakwenda Paulo udaru wec pare nia “ku wagi gin ma kumeno de,” eno nyutho nia ekwanu ngo timo ceke ma julwong’o “tic mi kum,” calu ve timo ma jukwanu i Jukolosai 3:5. Kumeno bende, i ng’ei m’ekwanu kite ma tung’ tung’ abung’wen ma beco, eyero kumae: “Cik umbe kum wagi gin maeni.” Pieno, jakwenda Paulo ukwanu ngo kite ceke ma beco ma tipo maleng’ copo konyowa nicego.
Wacopo nyang’ ma ber i lembe maeno ka waporo nying’ tipo ku nying’ der ma Jakwenda Paulo ukiewo pire ni cokiri mir Efeso. ekiewo kumae: “Nying’ der eni i berocwiny ceke man bedopwe ku lemandha de.” (Ef. 5:8, 9) Eyo, “berocwiny,” bedopwe man lemandha, gitie thenge mi nying’ der, re “berocwiny” utie bende thenge acel mi “nying’ tipo.”
Wacopo nyang’ bende i lembe maeno ka waporo nying’ tipo ku kite abusiel ma jakwenda Paulo ukwayu nia Timoteo uceg i kwo pare. kitene gini e: “bedopwe, ku bedo ma ayi Mungu ni kume, ku yioyic, ku mer, ku twiocwiny, ku molcwiny.” (1 Tim. 6:11) I kind kite abusiel maeno, jukwanu adek kende i kind “nying’ tipo” niwacu (yioyic, mer, man molcwiny). Ento ugam ukwayu bende nia Timoteo uceg kite mange ma jukwanu e: bedopwe, bedo ma ayi Mungu ni kume, man twiocwiny.—Nen Jukolosai 3:12; 2 Petro 1:5-7.
Pieno, Jugalatia 5:22, 23 ukwanu ngo kite ceke ma Jukristu gicikiri nicego. Tipo maleng’ pa Mungu copo konyowa nicego kite abung’wen ma julwong’o “nying’ tipo,” re kite mange bende tie dupa m’ukwayu wacegi kara wateng’ini i tipo man kara warony ng’atu ma nyen “ma calku koth Mungu ecwire i bedopwe ku leng’cwiny mi lemandha.”—Ef. 4:24.