Nyo Ing’eyo?

Gor moko ma con ubenyutho nia Biblia yero lemandha

I KAKANPINY moko (Musée des pays de la Bible) i Yerusalem, junwang’u kidi moko ma jukiewo kwan i kume i kum oro 700-600 W.R.M. Junwang’u kidine i od ng’om ma jutio ko calu liel, junwang’e ceng’ini ku Hebron i Israel. Jukiewo wec ma e i kume: “Yahweh Sabaot uketh kwong’ ubed iwi Hagaf ma wod Hagav.” Wec maeno ubenyutho nenedi nia Biblia beyero lemandha? Ebenyutho nia nying’ Mungu ma Yehova, ma ku dhu Juebrania ma con jukiewe YHWH, ugam ung’eyere lee i rundi ma con mi Biblia man jubed jutio kude. Gor moko mange de ma junwang’u i od ng’om maeno, unyutho nia dhanu ma gibed gicidh gipondo i od ng’om, wang’ ma pol gibed gikiewo nying’ Mungu i kor od ng’omne man nying’ mange de dupa m’utie ku nying’ Mungu i igi.

Rachel Nabulsi ma tie professeure mi Universite mi Géorgie ukoro pi gor maeno kumae: “Nying’ ma YHWH jubed jugoro kaka ma pol. Eno ubenyutho nia pire bino tek lee. . . . Giragora mi Biblia man gor ma tung’ tung’ ma jubed junwang’u, ubenyutho nia pi YHWH ubino tek lee dit i dhanu mir Israel man mi Yuda.” Lembuno ubecwaku Biblia, kum nying’ Mungu nwang’ere wang’ elufu swa i ie. Bende, wang’ ma pol nying’ dhanu ma jubed jucaku, ubed ubedo ku nying’ Mungu i ie.

Wec ma nia “Yahweh Sabaot” ma jugoro i kum kidine, thelembene tie “Yehova mir udul.” Eno ubeyenyo nyutho nia con i rundi mi Biblia, jubed jutio ngo kende kende ku nying’ Mungu, ento bende ku wec ma “Yehova mir udul.” Eno de ubecwaku Biblia, kum wec ma “Yehova mir udul” nwang’ere i ie wang’ 283 i Lembagora mi Juebrania, asagane i Isaya, Yeremia, man Zekaria, uketho i ie kaka ma juyere ngo atira atira i ie de.