Wek mi dubo ma jutimo i wang’ lam mi jamgony

Dubo mwa copo wekere kende kende nikum lam mi jamgony ma Yesu uculo ku rimbe. (Efe. 1:7) Re Biblia uyero kumae: “[Mungu unyutho] cirocir pare kara ewek dubo ma jutimo con,” niwacu i wang’ ma Yesu umii lam mi jamgony. (Rum. 3:25) Nenedi ma Yehova copo timo lembuno man asu ebedo Mungu ma poko lembe pwe?

I wang’ Yehova, jamgony uculere niai i saa m’eng’olo nia ebiwodho “kodhi” moko ma bibodho dhanu ceke ma weg yiyoyic. (Tha. 3:15; 22:18) Cwinye ubino tek nia i saa ma tap m’eketho, Wode ma kulong’ biwodhere gire pi nimiyo jamgony. (Gal. 4:4; Ebr. 10:7-10) Kinde ma Yesu ubino iwi ng’om calu jaor pa Mungu, ebino ku copo mi weko dubo kadok i wang’ nimiyo jamgony. Etimo kumeno pilembe elar eng’eyo nia lam m’ebithiero biruco dubo mi dhanu ceke ma weg yiyoyic.—Mat. 9:2-6.