Nyo ing’eyo?

Pirang’o wacopo yero nia pi wer ubino tek lee i Israel ma con?

PI WER ubino tek lee i suru mi Juisrael ma con. Biblia uweco wang’ dupa iwi wer ma jubegoyo ku jamgoyo wer man ma jubewero awera. I andha de, acel wi apar mi theng Lembagora utie wer, man ma pigi ng’eyere akeca utie buku mi Zaburi, Wer pa Suleman man Wak. Buku moko (Music in Biblical Life) uyero nia Biblia “uweco pir ungu mi dhanu moko ma i iye jucopo poko ngo wer ku tic mange mi kwo migi.”

Wer i kwo ma kubang’ ceng’. Juisrael gibed giwero wer pi ninyutho kite ma gibewinjiri ko. (Isa. 30:29) Jumamon gibed gigoyo nyithi vul ma gibewer kud anyong’a man gibemiel i saa ma jubeketho ubimo, i saa mi foc man saa ma juaskari giloyo lwiny. (Pok. 11:34; 1 Sam. 18:6, 7; 1 Ub. 1:39, 40) Juisrael gibed giwero bende wer wak ku can ma lee kinde ma ng’atu moko tho. (2 Kei. 35:25) Pieno etie ngo lembe mi wang’uic ka buku moko (McClintock and Strong’s Cyclopedia) uyero nia, “Juebrania gibino dhanu ma pigi yik lee i lembe m’uneno wer.”

Wer i kal p’ubimo. Jubim mir Israel gibed gimaru wer lee. Ku lapor, ubimo Saul ulwong’o Daudi alwong’a zoo udok ire ni jagoy wer. (1 Sam. 16:18, 23) Kinde ma Daudi udoko ubimo, eyiko jamgoyo wer, ethungo wer ma mit man epangu ungu mi jugoy wer ma i ng’eye bibewer i hekalu pa Yehova. (2 Kei. 7:6; Amo. 6:5) Ubimo Suleman ke ubino ku juruwer ma co ku ma mon i lelagang’ pare.—Ekl. 2:8.

Wer i thier pa Yehova. Ento m’usagu zoo, Juisrael gibed gitiyo ku wer pi niworo Yehova. Jubodho mi wer elufu ang’wen (4000) gibed gigoyo wer i hekalu mi Yeruzalem. (1 Kei. 23:5) Gibed gigoyo wer ku jamgoyo wer ma woy awoya, ma juthondhe man kud adungu. (2 Kei. 5:12) Ento jubodho maeno kendgi ngo re ma gibed gitimo thier ni Yehova ku wer. Ubenen kamaleng’ nia Juisrael ma dupa gibed giwero Wer mi idho kinde ma gibecidho i foc ma kubang’ oro i Yeruzalem. (Zab. 120-134) Man nimakere ku gor mi Juyahudi, Juisrael gibed giwero Zaburi mir Hallela i saa mi cemo mi Kadhukuwijo.

Tin de pi wer utie tek lee i dhanu pa Mungu. (Yak. 5:13) Wawer pi nipaku Yehova. (Efe. 5:19) Wer dikowa ku juyic wadwa. (Kol. 3:16) Man emiyo iwa tego kinde ma wan’i peko. (Tic. 16:25) Andhandha, wer utie ayi ma ber ma wacopo nyutho ko nia wamaru Yehova man nia watie ku yiyoyic i iye.