Gin ma romo konyi niponjo piny nja
NYO niponjo Biblia kubang’ yenga utie iri lembe ma teki? Wan ceke saa moko wawinjara kumeno. Re kepar pi lembe moko ma watimo kubang’ ceng’, calu ve nijom. Pi nijom kwayu nitimo kero man ecamu saa, re i ng’eye wawinjara ma ber mandha! Ponji mi Biblia de romo ketho wawinjara ma ber calu ve wajom ku “pii mi lembe pa Mungu.” (Efe. 5:26) Wakenenu lembe moko ma romo konyowa:
Pang program. Ponji ma segi mi Biblia utie i kind “lembe ma pigi tek nisagu” ma Jakristu ucikere ngo niwil pire. (Filip. 1:10) Pi nikonyi kara ilub program peri cuu, nyo iromo kiewo ngo nindo man saa m’ibetime i iye iwi karathasi moko man nikethe kaka m’iromo nene i iye yot yoti? Kunoke iromo ketho telefon ubed upoyi dakika moko nyanok i wang’ saa mi caku ponjine.
Par pi lembe ma romo konyi kara iketh wii cuu. Nyo ebedo iri lembe ma yot niketho wii zoo i kum lembe moko pi saa ma lee kunoke pi dakika ma lee? Ing’eyo lembe m’ibekadhu kud i iye cuu mandha. Dong’ pang program mi ponji peri nimakere ku lembene. Kan inwang’u nia ava ponji mbe i kumi i saa ma nwang’u ipangu, nyo icopo keii ngo niponjo piny pi dakika apar kende? Kadok itimo ponji peri pi dakika apar kende de, re iromo ponjo lembe lee. Kinde m’icaku ponjine, saa moko iromo nwang’u nia mito imediri asu nyanok.—Filip. 2:13.
Lar i ng’ii thiwiwec m’ibiponjo. Tek i saa mi ponji peri re m’icaku paru pi gin m’umito iponji, iromo ‘tiyo ngo ma ber ku saa peri.’ (Efe. 5:16) Nyo icopo kanu ngo girasoma kunoke thiwiwec moko m’ibemaru iponji? Saa moko ci ma ka penji moko ubino i wii, kiewe ndhu i kind lembe m’ipangu niponjo. I ajiki mi theng ponji periman, iromo medo paru moko i kind m’ilar ikiewo nia ibiponjo.
Bed itim alokaloka tek ukwayere. Lembe ma pire tek utie niponjo piny kubang’ yenga. Kara lembene urombi ke, kan ukwayere bed ilok nindo man saa mi ponjine, saa ma ponjine bicamu man lembe m’ibiponjo.
Wabed wanwang’u bero lee tek watie ku ng’iyo mi timo ponji ma segi. Winjiri m’i kindwa ku Yehova doko tek, wang’eyo ayi mi maku yub ma cuu i kwo mwa, man wanwang’u tielocwiny.—Yoc. 1:8.