Penji mi jusom

Jagor Lembrieko 30:18, 19 uyero nia “yo pa nico ku nyaku” ‘wang’u ijo lii.’ Eno emito yero ang’o?

Dhanu ma pol gibed ginyang’ ungo i wec maeno, eno ke kadok ju m’ung’eyo lembe lee iwi Biblia de. Biblia—Lok mi ng’om ma nyen uyero kumae: “Piny moko adek unuti ma giwang’u iya lii, ang’wen m’anyang’ i igi ngo: Yo p’acur i kor polo, yo pa thwol iwi cana, yo pa meli i die nam, man yo pa nico ku nyaku.”—Rie. 30:18, 19.

I wang’e, wabed wanyang’ rac i wec ma nia “yo pa nico ku nyaku.” Verse mange m’i thek maeno uweco iwi piny moko ma reco ma giyero ngo nia “eromo.” (Rie. 30:15, 16) Verse mi 20 uweco pi “dhaku ma won abor” ma loko nia etimo ngo gin moko ma rac. Pieno calu acur ma tuk i kor polo, thwol ma mol iwi cana, man meli m’iwi nam, dhanu de copo weko ngo ba tiende i gin m’etimo. Nimakere ku paru maeno, wabed wanyang’ nia “yo pa nico ku nyaku” ubenyutho lembe ma rac, niwacu jalawobi m’ubebidho nyaku, ma nyakune ke ubenyang’ ungo nia ebemito vuto kude.

Ento thelembe moko unuti m’ubecwaluwa niyero nia giragora eno uweco iwi lembe ma ber. Jagor buku mi Lembrieko ubino weco kende kende iwi lembe m’uwang’u iye.

Gor mi dhu Juebrania de ucwaku nia verse maeni uweco iwi lembe ma ber. Nimakere ku buku Theological Lexicon of the Old Testament, wec mi du Juebrania ma juloko i Lembrieko 30:18 nia “ma giwang’u iya lii,” “ubenyutho lembe ma ng’atini nwang’u nia . . . utie lembe mi zungo, ma copere ngo, kunoke ma wang’uijo.”

Japonjo Crawford H. Toy mi iniversite mir Étas-Unis, de uwacu nia giragora maeno uweco ngo iwi lembe ma rac. Eyero kumae: “Lembe ma pire tek utie kende kende nia i jagor ubino wang’ lii pi gin m’ekiewo.”

Pieno etie lembe ma kakare niyero nia wec m’i Lembrieko 30:18, 19 ubeweco iwi piny ma beco ma wang’uijo man ma wacopo nyang’ ungo i igi. Tap calu jagor buku mi Lembrieko, wan de iwa wang’ lii ka waneno ayi m’acur tuk ko i kor polo, ayi ma thwol mol ko ku kore iwi cana kadok nwang’u tiende mbe de, ayi ma meli wotho ko iwi nam, man kite ma nico ku dhaku gimariri ko man gikwo karacelo ma ber kud anyong’a.