Penji mi jusom

Yehova biketho “paru” ma kani i adunde thek ceng’ini eni?

Lembanyutha 17:16, 17 uyero pi caku mi masendi ma dit kumae: “Man tung’ apar m’ineno man yedi ma kwiny, gin nini gibidagu dhaku ma won asara man gibinyothe, gibiweke muneru, gibicamu ring’kume man gibiwang’e pet ku mac. Kum Mungu uketho i adundegi nia gitim paru pare, eyo, gitim paru migi acel man gimii ker migi ni yedi ma kwiny.” I wang’e girasoma mwa ukoro nia “paru” ma Yehova biketho i adunde thek utie paru ma ginyoth ko dini mi vupo.

Re alokaloka ubekwayere iwi ayi maeno ma wanyang’ ko. “Paru” ma Yehova biketho i adunde thek utie nia “gimii ker migi ni yedi ma kwiny.” Pi ninyang’ i ayi ma lembila maeno bipong’o ko, wakewecu iwi penji m’ulubo e.

Juweco pi jukani i lembila maeni? “Dhaku ma won asara” ma julwong’e bende nia “Babeli ma dit,” ubenyutho dini ceke mi vupo. “Yedi ma kwiny ma kwar ngbo” ubenyutho dilo moko mi kwiyocwiny m’ucaku i oro 1919 ma jubed julwong’o Dilo mi thek; tin ke julwong’e Dikiri mi thek (ONU). (Nyu. 17:3-5) ‘Tunge apar’ ke ubenyutho gavmenti ceke ma gibediko cing’gi ku yedi ma kwiny.

Winjiri ma kani m’utie i kind dhaku ma won asara ku yedi ma kwiny ma kwar ngbo? Dhaku ma won asara “ubedo iwi” yedi ma kwar ngbo, niwacu ebediko cinge kude man ebemito ebim wiye.

Lembang’o ma binwang’u dhaku ma won asara? Yedi ma kwiny man ma kwar ngbo karacelo ku tung’ apar m’ubediko cing’gi kude, “gibidagu dhaku ma won asara.” Kwinyo bimakugi i kume, gibiyaku lonyo pare ceke man gibinyutho racu pare ngbeng’ i wang’ dhanu. M’umedo maeno, gibikelo pokolembe pa Yehova i wiye, niwacu gibinyothe kot. (Nyu. 17:1; 18:8) Eno bibedo ajiki mi dini mi vupo. Ento ma fodi lembuno utimere ngo, Yehova biketho thek bitimo lembe ma fodi nwang’u niai con de utimere ngo i bimobim mi dhanu.

Yehova biketho thek bitimo ang’o? Yehova biketho “paru pare” i adunde tung’ apar, nia ‘gimii tego ku copo migi ni yedi ma kwiny [ma kwar ngbo]’ ma en e Dikiri mi thek. (Nyu. 17:13) Kepar kite ma lembene bikadhu ko. Nyo judong gavmenti gibing’iyo gin gigi nia gimii tego man bimobim migi ni yedi ma kwinyi? Ungo! Lembila uwacu nia Mungu re ma biketho gibitimo lembuno. (Rie. 21:1; nen bende Isaya 44:28.) Nyo gibimiyo tego man bimobim migine nok noki? Ungo! Ebibedo alokaloka ma rek. I ng’eye yedi ma kwiny binyotho dini mi vupo ceke mi magwei.

Ang’o ma bitimere i ng’eye? Wambe ku yeny mi ketho wiwa i kum lembang’eya m’ubenyutho nia nok nok gavmenti ma tung’ tung’ ucaku bediko cing’gi i kum Dikiri mi thek nisagu mi wang’e. Gin ma wacopo ketho wiwa i kume ni e: Mbwang’ kumeni Yehova biketho gavmenti ceke bimiyo tego migi ni Dikiri mi thek. Saa maeno wabing’eyo nia masendi ma dit ubecicaku. Ento ma fodi lembuno k’utimere ngo, wek “wamedara nikiyo man wabed nger” kum alokaloka ma rek udhingo timere!—1 Thes. 5:6.