Nyo Jumulembe pa Yehova girweyo lembanyong’a ot kubang’ ot kara gibin gibothi?

Ungo. Wang’ ma pol warweyo lembanyong’a ot kubang’ ot, ento waketho ngo genogen mwa nia wabinwang’u both mwa ndhu nikadhu kud i tic maeno. (Juefeso 2:8) Pirang’o?

Wakeng’i i lapor ma e: Kepar nia ng’atu moko ma jaberocwiny ung’olo nia ebimiyo giramiya moko ma pire tek lee ni ng’atuman ma binwang’ere i kabedo, man i nindo moko ma tap m’eketho. Kan andha igeno ng’atu m’ung’olo lembe maeno, nyo ibilubo lembe m’eng’olone? M’umbe jiji eyo! M’umedo maeno, ibimaru bende iyer ni jurimbi, man ni juruot peri pi lembe maeno, kara gin de ginwang’ bero mi giramiyane. Kadok kumeno, icopo nwang’u ngo giramiya maeno ndhu pilembe nia icidho i kaka man i saa ma ng’atune ung’olo, ento icopo nwang’e pilembe ng’atune re m’umaru nia emiye iri.

Rom rom kumeno, Jumulembe pa Yehova de giyiyo nia Mungu ung’olo kwo ma rondo ku rondo ni dhanu ceke m’ubewore. (Jurumi 6:23) Pieno, watimo kero nikoro pi yiyoyic mwa ni jumange, ma watiye ko ku genogen nia gin bende gibinwang’u bero i kum lembang’ola pa Mungu. Ento, waketho ngo genogen mwa nia wabinwang’u both ndhu nikum rweyo lembanyong’a. (Jurumi 1:17; 3:28) I andha re, ng’atu moko acel de mbe ma nwang’u copo timo gin m’uromo ku bero m’uai i bang’ Mungu. “Utie ngo ni kum tic moko mi bedopwe ma watimo, ento ni kum kisa pare gire, ebodhowa.”​—Tito 3:5.