Nyo Jumulembe pa Yehova giyiyo nia Mungu ucwiyo piny pi nindo abusiel, ma nindoneman utie ku saa 24 i iye?

Ungo. Jumulembe pa Yehova giyiyo nia Mungu ucwiyo piny ceke. Ento, wayiyo ngo nia ecwiyo piny pi nindo abusiel ma nindoneman utie ku saa 24 i iye. Pirang’o? Pilembe paru ma pol mi ju ma giyiyo lembuno urombo ngo ku lembe mi Biblia. Kenen lapor ario m’ulubo e:

1. Cwic ucamu ceng’ (nindo) abusiel. Jumoko giyero nia cwic ucamu nindo abusiel ma nindoneman utie ku saa 24 i iye. Re lundo wec ma nia “ceng’” kunoke nindo i Biblia copo ketho juparu pi rundi m’ulwar.​—Thangambere 2:4; Zaburi 90:4.

2. Oro pa ng’om. Jumoko giponjo nia fodi ng’om utimo oro elufu ma nyanok kumeni. Ento nimakere ku Biblia, polo ku ng’om ular ubedo nuti i wang’ nindo abusiel mi cwic. (Thangambere 1:1) Pi thelembe maeno re m’uketho Jumulembe pa Yehova gikwero ngo matoke ma jugeno mi sayusac ma jururieko gitimo, m’unyutho nia ng’om copo bedo ku oro moko ma romo bilioni dupa kumeni m’egalu ko.

Kadok Jumulembe pa Yehova giyiyo nia Mungu ucwiyo piny de, re gikwero ngo lembe mi sians. Wayiyo nia sians mandha ku Biblia girombo i kindgi.