Pirang’o Jumulembe pa Yehova gibed giculo ngo wang’ lembe ma reco ceke ma juyero i kumgi?
Wa Jumulembe pa Yehova wabelubo juk mi Biblia m’uwacu nia kud wacul wang’ adote kunoke cac ma jucayu kowa. Ku lapor, Lembrieko moko mi Biblia uyero kumae: “Ng’atu m’ujuko jacac enwang’u lewic ire gire.” (Lembrieko 9:7, 8; 26:4) Kakare nibenyotho saa mwa ma wabetelara ko iwi ndra ma jubed juthungo i kumwa, waketho wiwa zoo i kum timo lembe ma foyo i Mungu.—Zaburi 119:69.
I andha nindo moko utie “nindo mi bedo ling’, man nindo mi weco.” (Eklizia 3:7) Wabedo ayika nidwoko lembe ni dhanu m’atira ma gibeyenyo ning’eyo lemandha, ento wauro nimondo i wec ma kabodho migi mbe. Pieno, wabelubo ponji man lapor pa Yesu ku mi Jukristu mi rundi ma kwong’a.
Yesu uculo ngo wang’ adote mi ndra ma jukelo i wiye kinde m’ebino i wang’ Pilatho. (Matayo 27:11-14; 1 Pethro 2:21-23) Kumeno bende, Yesu udwoko ngo wang’ ndra ma juyero ko nia etie jamero man jabamba. Ento, eweko timo pare re m’unyuth lembe i wiye ni dhanu mange nimakere ku cik mir ukungu ma e: “Rieko nyuthere pwe ni kum tic pare.” (Matayo 11:19) Re kinde ma kaka unen m’ewec ko, eweco ku tegocwinye ku dhanu ceke ma gitero adote i wiye.—Matayo 15:1-3; Marko 3:22-30.
Yesu uponjo julub pare nia cwinygi kud ubed utur i kum lembe mi ndra ma juyero pigi. Eyero kumae: “Wu jumutoro kinde ma dhanu gibecidowu, gibenyayu ragedo i kumwu, gibecwayu vupo i wiwu man gibeyero kwond lembe ma tung’ tung’ ma reco i kumwu pira.” (Matayo 5:11, 12) Ento, Yesu uyero bende ni julub pare nia kan adote maeno umiyo igi kaka mi miyo lembatuca, ebipong’o igi lembang’ola pare ma e: “Abimiyo iwu wec man rieko ma judhogwu ceke karacelo gibicopo ngo nipiemo kunoke gibijai de ngo i kume.”—Luka 21:12-15.
Jakwenda Paulo umiyo juk ni Jukristu nia gikoc kud i kum piem ma tije mbe karacelo ku judhogi kum eno tie gin “ma kony migi mbe man ma igi nanu.”—Tito 3:9; Jurumi 16:17, 18.
Jakwenda Pethro utielo cwiny Jukristu nia kacopere gicer bang’ yiyoyic migi. (1 Pethro 3:15) Eneno nia saa ceke pire tie tek ninyutho lembene ku timo kakare nibeweco aweca. Ekiewo kumae: “Nikadhu kud i timo mwu ma ber, wutwii dhu jukusegu ma gibecoro wec swa.”—1 Pethro 2:12-15.