Gin m’usagere ubepong’o gin m’urem

Jumulembe pa Yehova gibetimo tic ma pire tek mi konyo dhanu i ng’om ma kadhu 200. Ento ng’om 35 kende m’i kindgi re ma gitiye ku copo mi nwang’u giramiya migi gin gigi pi nipong’o yeny migi. Dong’ ng’om m’utie ku copo ma nok mi nwang’u sente, gipong’o yeny migi nenedi?

Guriri m’utelowic neno cuu mandha gin ma Jumulembe pa Yehova i wang’ ng’om zoo gitie ku yenyne kara giwor Yehova man girwey lembanyong’a. Jupangu lembe ku riekowang’ iwi sente man jutiyo kude i yore m’atira. Ka tekene bethel moko unwang’u sente lee nisagu m’etie ku yenyne pi tic m’eneno wiye, etiyo kude pi nipong’o yeny mi ng’om ma lundo unwang’u ngo i kadhiri m’uromo. Yub maeno ulubo lapor mi Jukristu mi rundi ma kwong’a ma ng’atuman ubed ukonyo ko wadi kara “lembe uwoth rom rom.” (2 Jukorintho 8:14) Gitiyo ku piny migi m’usagere pi nikonyo Jukristu mange ma gitie ku piny nyanok.

Umego mwa ma ginwang’u giramiya m’usagere mi sente niai kud i bethel mange giwinjiri nenedi? Ku lapor, i Tanzanie, nusu mi dhanu m’i iye kwo ku dolar ma kadhu ngo ario kubang’ ceng’, eno re m’uketho jutiyo ku giramiya mi sente m’uai i bethel mange pi niyiko kum Otker mi cokiri mi Mafinga. Cokirine ukiewo kumae: “Niai ma juyiko kum Otker mwa tap ci, wend dhanu umedere lee mandha! Wafoyo dilo pa Yehova lee mandha, man umego mi wang’ ng’om zoo pi berocwiny migi, m’uketho wabeworo Yehova i kabedo ma leng’ mire ma!”

Thong’om mi Korona uketho kec ubodho ni umego mwa moko mi ng’om mi Sri Lanka. Imara Fernando man wode ma nyinge Enosh de gitiye i kind dhanune. Re, wafoyo dit ku giramiya m’uai i ng’om mange, m’ukonyogi ninwang’u piny ma gitiye ku yenyne. Gikiewo iwi karth ma giyiko gin gigi kumae: “Wabedwoko foyofoc ni umego ma ginyutho iwa mer i saa maeni ma lembe ubino tek i iye. Watiye kud anyong’a ma lee mandha nibedo acel m’i kind juruot maeni, man wabemedara nirwo nia Yehova ukony umego mwa ceke i dong’ nindo maeni mi kajik ceng’.”

Kadok umego mwa gibekwo kakani de, gin moko mbe ma cerogi nipoko piny ma gitie ko ku jumange. Ku lapor, Enosh uyiko ire nyathi sanduku moko kara ebed eketh giramiya pare i iye wek kara en de eromo konyo juruot ma gitiye ku yeny mi kony. Guadalupe Álvarez unyutho berocwiny ma rom kumeno. Ekwo i theng ng’om mi Mexique ma wend dhanu ma nyanok kende re ma juculogi ku nyathi sente moko, jumange ke gimbe ku gin ma giromo nwang’u ko sente wang’ ma pol. Re, asu emiyo kadhiri m’ecopo. Ekiewo kumae: “Abefoyo Yehova pi bero pare man pi mer pare ma dit. Ang’eyo nia giramiya para bimedo dhu mi jumange man jubitiyo kude pi nikonyo umego para ma gin’i yeny.”

Biro mi bethel ma tung’ tung’ ma oro sente i kabedo ma yeny utie i iye gibedo kud anyong’a mi timo kumeno. Anthony Carvalho, ma timo i komite mi bethel mi Brésil uyero kumae: “Pi oro ma dupa, tic mi ng’om mwa ubedo ku yeny mi giramiya m’uai kud i ng’om mange pi nitiele. Nikum kony maeno, waneno alokaloka ma lee dit. Kawoni dong’ ayi ma wapong’o ko yeny mwa udaru lokere, man watiye ku rwom mi konyo jumange. Umego mwa mi Brésil gibediko cing’gi i kum tic mi rweyo lembanyong’a m’utimere i wang’ ng’om zoo, man gibeneno nia etie igi rwom nibedo calu julub pa Yesu ma gimiyiri gigi.”

Jumulembe pa Yehova gitielo cuu mandha umego ku nyimego migi ma gitie i yeny nenedi? Gioro ngo sente wang’ acel i biro mi bethel mi ng’om mange, ento gitimo kumeno nikadhu kud i giramiya ma pi tic mi wang’ ng’om zoo. Lembuno romo timere nikadhu kud i sanduku mi cokiri mi miyo giramiya ma pi “tic mi wang’ ng’om zoo” kunoke nikadhu kud i donate.jw.org. Watiye ku foyofoc ma lee pi giramiya maeno ceke.