Lembakeca ubedo ve kubo pla mi ot, kan itimo kero, edoko ni ot ma zoo
PIR ARADU
12 Lembakeca
THELEMBENE TIE ANG’O?
Lembakeca utiye ngo lek, niwacu piny moko m’ibeparu nia copo timere. Lembakeca m’andha uketho i iye nipangu lembe, nilokiri yot yot ka lembe ulokere, man nitimo ngo lembe nya malu malu pi nipong’e.
Lembakeca copo bedo ma ceng’ini (niwacu mi nindo moko kunoke yenga moko kende), ecopo bedo mi nindo ma bor (niwacu mi dwi moko), man ecopo bedo mi nindo m’u ng’adu lee (niwacu oro acel kunoke nikadhu). Lembakeca ma ceng’ini ku mi nindo ma bor re ma copo konyi nitundo i kum lembakeca mi nindo m’ung’adu lee.
PIRANG’O PIRE TIE TEK NIBEDO KU LEMBAKECA
Nipong’o lembakeca peri romo dwoko cwinyi tek, romo tielo mer peri ku jurimbi, man eromo medo anyong’a peri.
Nigeniri: Tekene iketho lembakeca ma ng’ili ng’ili man ipong’ogi, eno bitego cwinyi niketho kadok lembakeca ma dongo. Bende, ebitego cwinyi ma gwei pi ninyego ku peko m’inweng’iri ko ku bang’ ceng’, calu ve ka juwedu gibediyi nia itim lembe ma rac.
Jurimo: Dhanu bemaru nibedo i ng’et ju ma ketho lembakeca uwoth ma ber, niwacu ju m’ung’eyo gin ma gibesayu, man ma gitiye ayika nitimo lembe ceke kara gipong’e. M’umedo maeno, yo acel ma copo ketho mer m’i kind jurimo doko tek utie nitiyo karacelo pi nitundo i lembakeca ma rom.
Kwiyocwiny: Kan iketho lembakeca man ipong’e, inwang’u yom cwiny.
“Amaru niketho lembakeca. Pilemba saa ceke eketho abedo ku gin m’ukwayu atim pi nipong’e. Man kan ipong’o lemabakeca moko, etie ber nia ikenen ng’eyi man iyer ku mae, ‘jeii, atimo lembuni andha ndhu! Adaru pong’o lembe m’akeco nitimo’”—Christopher.
CIK MIR UKUNGU MI BIBLIA: “Ng’atu m’uneno yamu ebicoyo ngo; man ng’atu m‘uneno afuru bikayu ngo.”—Eklizia 11:4
ICOPO TIMO ANG’O?
Lub lembe ma jukwanu e pi niketho man nipong’o lembakeca peri:
Lar ing’ii lembakecanegi. Riey lembakeca ceke m’imito pong’o, man caki ku ma pire tek, niwacu ng’ii lembakeca m’akwong’a m’imito pong’o, mir arionde, mir adege man kumeno kumeno.
Pang lembe. Tim lembe m’ulubo e pi lembakecaman:
Keth nindo moko ma ber m’imito pong’e i iye.
Pang lembe ceke m’ibitimo pi nipong’e.
Par pi lembe ma romo cero weng’i man pi gin m’icopo timo pi nivoyogi.
Cak nitimogi. Kud ikur nia lembe ceke ukeucok dhoge ka nia icak timogi. Kepenjiri kumae: ‘Lembang’o m’ukwayu alar acak timo pi nitundo i kum lembakeca para?’ Man i ng’eye, time. Bed ing’ii lembe ma tung’ tung’ m’itimo pi nipong’o theng lembakeca perine.
CIK MIR UKUNGU MI BIBLIA: “Lembakeca mi ju ma timo tic kud amora ketho gibedo ku piny dupa, ento timotim ma vurvur kelo canpiny.”—Lembrieko 21:5. (B.L.L)