PONJI MIR 4

**Pirang’o wawodho Biblia ma Julwong’o Lok mi Ng’om ma Nyen?**

Biblia Lok mi Ng’om Manyen ma kwong’a m’uwok

Dhanu ubeneno Biblia Lok mi Ng’om Manyen i Congo (Kinshasa) — Congo (Kinshasa)

Jubenyutho nia Biblia Lok mi Ng’om Manyen uwok i Rwanda — Rwanda

Theng gor mi Symmachus ma nying Mungu nwang’ere i ie — Theng gor mi Symmachus (oro 300 kunoke 400 kumeni i ng’ei nyoliri pa Yesu) ma nying Mungu nwang’ere i ie i Zaburi 69:31

Pi oro dupa, Jumulembe pa Yehova ubed utio ku lok ma tung’ tung’ mi Biblia, giwodho ni buku man gipoko lok negi de. Ento ing’eye, waneno nia yeny utie mi wodho lok ma nyen ma bikonyo dhanu cu mandha niponjo “ng’eyong’ec ma tap mi lemandha,” pilembe eno re m’utie yeny pa Mungu pi ng’atuman i kindwa. (1 Timoteo 2:3, 4) Pieno, i oro 1950 wacaku niwodho nok nok theng Biblia ma julwong’o Lok mi Ng’om ma Nyen i dhok ma yot mi rundi mwa eni. Biblia maeno, juloko lembe mi ie i atira man tap tap i dhok ma tung’ tung’ ma kadhu 130.

Biblia ma yeny ne ubino nuti tie Biblia ma jucopo nyang’ yot yot i lembe mi ie. I ng’ei nindo kan ukadhu dupa, dhok lokre, man bende lok ma pol mi Biblia utie ku wec ma nyang’ i igi tie tek kunoke ma dong’ jutio kudo ngo i rundi mwa eni. Bende, jubed judok junwang’u kiew dupa ma con m’utie ku lembe m’urombo man ma kago kago ku gor dupa ma con man ma kwong’a iwi mange ceke. Gor ma junwang’u eno ukonyo ninyang’ cu mandha i dhu Juebrania, dhu Juaramu, man dhu Jugiriki.

Lok mi Biblia ma yeny ne ubino nuti tie lok m’ubalu ngo kum lembe pa Mungu. Kara dhanu ma loko Biblia i dhok mange kud gilok lembe m’ukoc ku ma Mungu yuyo iwie, gicikiri nilubo man niworo kubang’e kubang’e gor mandhandha ma con. Ento, kan isomo lok ma pol mi Biblia, inwang’u nia nying Yehova umbe i igi.

Biblia ma yeny ne ubedo nuti tie Biblia m’umio Yung ni won. (2 Samwil 23:2) Calu ma junyutho i cal ma nwang’ere piny ee, i Biblia ma julwong’o Lok mi ng’om ma nyen, judwoko kakare kakare nying Yehova kite m’enwang’ere kudo i gor ma con mi Biblia, niwacu wang’ 7 000 kumeni (Zaburi 83:18) Jum’uloko Biblia, gisayu lembe dupa kud amora pi oro dupa, uketho kan ibesomo Biblia eno, isome kud anyong’a pilembe enyutho thwolo thwolo paru pa Mungu. Kadok itie ku Biblia ma julwong’o Lok mi Ng’om ma Nyen i dhok peri kunoke ngo de, wabeketho cwinyi nia ibed ku ng’io ma ber mi somo lembe pa Mungu kubang’ ceng’.—Yocuwa 1:8; Zaburi 1:2, 3.

Pirang’o waneno nia eber ya lok ma nyen mi Biblia ubed unuti?
Lembang’o m’ubekwayere kubang’ ceng’ i bang’ ng’atu m’umito niponjo yeny pa Mungu?