Icopo Coro Ceng’ni i Vut Mungu Nenedi?

1. Nyo Mungu winjo rwo ceke?

Mungu lwong’o dhanu mi kwonde ceke nicoro ceng’ni i vute ni kadhu kud i rwo. (Zaburi 65:2) Ento, Mungu winjo kunoke jolo rwo ceke ngo. Ku lapor, Mungu copo winjo ngo rwo pa ng’atu ma nico m’ubesendo dhaku pare. (1 Petro 3:7) Bende, kinde ma juisrael urero migi nitimo lembe ma rac, Mungu ugam ukwero niwinjo rwo migi ma tung’tung’. Eno nyutho nia rwo tie ngo lembtuko ento lembe ma pire tek kunoke rwom. Re wang’ei nia, Mungu copo winjo rwo pa ng’atu ma, kadok etimo dubo ma lee rokani, eyewo dubo pare ne.​—Som Isaya 1:15; 55:7.

2. Wacikra nirwo nenedi?

Rwo tie thenge acel mi thier mwa ni Mungu. Pieno, wacikra nirwo ni Jacwic mwa Yehova kende. (Matayo 4:10; 6:9) Bende, calu watie leng’ ungo, ukwayu warwo i nying Yesu pilembe etho pi dubo mwa. (Yohana 14:6) Yehova maru ngo nia ka waberwo, wabed wadwogi asu asu iwi lembe ma wadaru nikanu i wiwa kunoke ma judaru nikiewo akiewa. Emito ka waberwo, wayer lembe m’uai i adunde mwa giwa.​—Som Matayo 6:7; Jufilipi 4:6, 7.

Jacwic mwa copo winjo kadok rwo ma nyaling’ling’. (1 Samwil 1:12, 13) Ebekwayu nia wabed warwo saa moko ci, calu ve kugweno man uthieno, saa mi cam, saa ma wanwang’ira i wang’ peko ma tung’tung’.​—Som Zaburi 55:22; Matayo 15:36.

3. Pirang’o Jukristo becokri karacelo?

Etie yot ungo nicoro ceng’ni i vut Mungu pilembe wakwo i kind dhanu m’ukoso nibedo ku yioyic i bang’ Mungu man dhanu m’ucayu lembang’ola pare mi kelo kwiocwiny iwi ng’om. (2 Timoteo 3:1, 4; 2 Petro 3:3, 13) Pieno, watie ku yeny ma wabed wacokra karacelo ku jukristo wadwa kara wabed wajukra ng’atuman ku wadi.​—Som Juebrania 10:24, 25.

Cokri karacelo ku dhanu m’umaru Mungu konyowa nicoro ceng’ni i vut Mungu. Coko mi Jumulembe pa Yehova tie iwa kakare maber mi nwang’u kethocwiny ni kadhu kud i yioyic mi jumange.​—Som Jurumi 1:11, 12.

4. Icopo coro ceng’ni i vut Mungu nenedi?

Icopo coro ceng’ni i vut Yehova nang’u ibenwang’u saa mi paru kunoke mi nyamu i lembe pare m’icikuponjo. Par cu mandha i kum tic pare m’etimo, juk m’ecikumio iwa, man lembang’ola pare. Nirwo man ninyamu i lembe konyowa ni bedo ku cwiny mi foyofoc pi maru pa Mungu man rieko pare.​—Som Yocuwa 1:8; Zaburi 1:1-3.

Icopo coro ceng’ni i vut Mungu ndhu nang’u ijengri i wiye man itie ku yioyic i bang’e. Ento, ng’ei nia yioyic calu piny ma kwo ni ie, m’utie ku yeny pa cam. In de ukwayu ibed imi cam ni yioyic peri nang’u ibeparu akeca iwi thelembe mi yioyic peri ne.​—Som Matayo 4:4; Juebrania 11:1, 6.

5. Coro ceng’ni i vut Mungu copo mio iwa bero makani?

Yehova dieng’ pi dhanu ceke m’umare. Ecopo gwokogi kud i kum piny ceke ma copo ketho yioyic man genogen migi mi kwo ma rondo ku rondo i ariti. (Zaburi 91:1, 2, 7-10) Etwong’owa i wang’e i kum lembe ceke ma copo nyotho kwo man mutoro mwa. Eyo, Yehova ponjowa kud ayi kwo mandhandha.​—Som Zaburi 73:27, 28; Yakobo 4:4, 8.