Nen peri tie ang’o iwi kwo mi nindo m’ubino?

KENEN GIN MA BIBLIA YERO E

“Mungu . . . biyweyo piwang’ pet kud i wang’gi, man tho bibedo nuti kendo ngo, kadok can kadi ywak kadok remokum de bibedo nuti kendo ngo: gin ma kwong’a daru kadhu.”​—Lembanyutha 21:3, 4, The Holy Bible in Alur.

BERO MA ICOPO NWANG’U KAN IYIYO LEMBE MAENI

Ibibedo ku tic maber dit akeca man ma pong’o yeny peri.​—Isaya 65:21-23.

Ibiremo ngo man can moko ci ma ibinwang’u bibedo umbe.​—Isaya 25:8; 33:24.

Ibibedo ku kwo mir anyong’a man ma rondo ku rondo karacelo ku juruot peri man ku jurimbi.​—Zaburi 37:11, 29.

NYO, WACOPO YIYO LEMBANG’OLA MAENO MI BIBLIA?

Eyo, pi thelembe moko ario ma e:

• Mungu tie ku copo mi pong’o lembang’ola pare. I Biblia, Yehova kende ma julwong’e “jategokpo,” kum etie ku tego ma kajik ne mbe. (Lembanyutha 15:3) Pieno, etie ku copo andha mi pong’o lembang’ola pare mi ketho kwo ubin ubed maber iwi ng’om. Calu ma Biblia yero, ‘gin ceke copere ku Mungu.’​—Matayo 19:26.

• Mungu tie kud ava mi pong’o lembang’ola pare. Ku lapor, Yehova tie ku maru lee mi cero jum’utho.​—Yob 14:14, 15.

  Biblia unyutho bende nia Yesu, ma wod Mungu, ukeyo kum jurutwoyo. Pirang’o ekeyo kumgi? Kum eyenyo. (Marko 1:40, 41) Calu won, Yesu de ubedo kud ava mi konyo ju m’utie ku yeny.​—Yohana 14:9.

  Pieno, wacopo bedo m’umbe jiji nia Yehova giku Yesu gimito ni konyowa kara wabin wabed kud anyong’a i kwo mwa mi nindo m’ubino!​—Zaburi 72:12-14; 145:16; 2 Petro 3:9.