Lemkwenda ario m’uai i bang’ Mungu

Ukwayu wanen Biblia zoo ni lembe m’uai i bang’ Mungu. Wegwa mi polo umie iwa pi niponjowa. Wakewec iwi lemkwenda ario masegi m’uyerere kawoni oro 2 000 ku wie udaru nikadhu. Malaika moko ‘m’ucungo iwang’ Mungu’ re m’uyero lemkwenda maeno. Nyinge tie Gabriel. (Luka 1:19) Malaikane uyero lemkwenda maeno ma pire tek i saa makani?

Ubino ceng’ini i oro mir 3 W.R.M. Malaika Gabriel uyero lemkwenda maeno kakani? Ubino iwi got mi Yahudi. Ecicopere nia ebino bor ungo ku Yerusalem, kabedo ma jalam pa Yehova ma nyinge Zekaria ubino nikwo i ie. En ku dhaku pare ma nyinge Elisabeti, gibino dhanu ma dong’ gitii, re awiya migi bino mbe. I saa maeno tic mi thiero lam i hekalu pa Mungu i Yerusalem uwok iwi Zekaria. Saa ma fodi etie asu i hekalu, malaika Gabriel utundo rek ing’et pemblam mir udok ma ng’wice ng’ar.

M’umbe jiji, lembe maeno unyayu lworo i Zekaria. Ento malaika ukwio cwinye, eyero ire kumae: “Lworo kud unegi, Zekaria: kum kwac peri winjre, cegi Elisabeti binyolo iri nyathin ma nico, man ibilwong’o nyinge Yohana.” Malaika Gabriel uyero kendo ire kumae: “Ebibedo dwong’ iwang’ [Yehova]” man ebiyawu kum “dhanu m’ubedo ayika ni [Yehova].”​—Luka 1:13-17.

Iwang’ Zekaria, lembuno ubino ni lembe ma timere ngo. Pirang’o? Pilembe en ku dhaku pare Elisabeti gidaru nitii. Pieno malaika Gabriel uyero ire kumae: “Ibibedo ajuba ibicopo weco de ngo, cil i ceng’ ma gin maeni bitimbre i ie, kum iyio lem para ngo.”​—Luka 1:20.

I saa maeno, dhanu ma gibino woko gibino nipenjiri nia pirang’o Zekaria ubegalu hai i ot. E ing’eye, ewok woko m’etie buba, ecopo ngo niweco, ndhu ku cinge kende. Ecicopere nia udu moko uwok i wang’e kuca i hekalu.

Ing’eye ma Zekaria udaru tic pare i hekalu, edok i pacu pare. Ing’ei nindo ma nyanok, Elisabeti ugamu iye! Man ebedo kende i pacu pi dwi abic, m’ebekuro ko pi nyoliri pa nyathin pare.

Malaika Gabriel utundo kendo wang’ mir arionde. Etundo ibang’ nga? Ibang’ nyaku moko ma sumba ma nyinge Maria, m’ubino nikwo yor ariwa ma yo malu, i adhura mi Nazareti, i ng’om mi Galilaya. Malaika uyero ire lembang’o? Eyero kumae: “Inwang’u bero ba Mungu.” Man eyero ire kendo kumae: “Nen, ibigamu ii, ibinyolo nyathin ma nico, man ibilwong’o nyinge Yesu.” Gabriel umedo kendo kumae: “Ebibedo dwong’, man jubilwong’e Wod Ng’atu ma Malu Ngbir, . . . man ebicamu ker wi ot pa Yakobo mi nja; kajik mi ker pare de bibedo umbe.”​—Luka 1:30-33.

Ebino ni rwom ma dit ni malaika Gabriel nikelo lemkwenda ario maeno. Lembe dupa ma wabiponjo iwi Yohana man iwi Yesu, bikonyowa ninyang’ i thelembe m’uketho lemkwenda maeno m’uai i polo pigi tie tek.