Udu ma kwong’a pa Yesu

Nindo adek ukadhu, niai ma Nathanael udoko acel m’ikind julub ma kwong’a pa Yesu. Yesu karacelo ku julubne moko, giidho malu i ng’om mi Galilaya, ng’om ma thugi. Gitiro adhura mi Kana, ma tie pacu pagi Nathanael. Kana nwang’ere i ng’om gudi, yo malu ku Nazareti, kaka ma Yesu udongo i ie. Julwong’ogi gicidh i nyom i Kana kuca.

Min Yesu de ucidho i nyom maeno. Ecicopere nia Maria ubino ku tic mi konyo welo ma dupa m’ubino, calu m’ebino jarimb juruot pagi jalawobi ku nyaku ma gibenyomo. Pieno, ndhu ndhu kinde ma Maria uneno nia pigulok uthum, ecidh eyero ni Yesu kumae: “Pigulok migi mbe.”​—Yohana 2:3.

Maria ukwayu Yesu utim lembe moko pilembe pigulok uthum. Yesu uloko ire lembe kumae: “Dhaku, ang’o [ikindwa] wakudi?” (Yohana 2:4) Mungu re m’uwiro Yesu nibedo Ubimo, pieno ukwayu Won mi polo re m’unyuth ire gin m’ukwayu etim ento ungo juruot pagi kunoke jurimbe. E ku rieko, Maria uweko lembe i cing’ wode, man eyero ni dhanu m’ubetimo tic kumae: “Gin ceke ma tek ewacu iwu ci, wutime.”​—Yohana 2:5.

Nwang’u juketho agulu pi mi kidi abusiel keca, agulune acel, utie litre 40 mi pi. Yesu ung’olo ni jum’utimo tic kumae: “Wupong’ agulune ku pi.” Ing’eye edok eyero kumae: “Kawono, wutwom uter ba jadit mir ambadha.”​—Yohana 2:7, 8.

Jadit mir ambadha uzungo mido mi pigulokne, ento eng’eyo ngo nia ewok ku yo mir udu. Elwong’o cwar m’ugole man ewacu ire kumae: “Ku ba dhanu ceke gilar gikelo pigulok ma mit; man ka dhanu madhu hai, e gikelo maeno mamit nyanok: in ikanu pigulok ma mit cil kawono.”​—Yohana 2:10.

Eni utie udu ma kwong’a ma Yesu utimo. Kinde ma julub pare ma nyen gineno udu maeno, yioyic migi udoko tek i ie. Ing’eye en ku min man awiya pagi, gicidho i adhura mi Kapernaum, ma tie yo malu mi dhunam mi Galilaya, yo reto.