Yesu en e “kwen mi kwo”

Kinde ma Yesu ubino yo nyangu mi nam Galilaya, enyayu cam ni udul dhanu, pieno gimito gimake gikethe ni ubimo ento eringo. I diewor mi cing’ nica, ewotho iwi nam ku tiende man ebodho bende Petro ma nwang’u ubemwony, saa m’ebewotho iwi nam pilembe jiji umondo i ie. Ejuko bende yamu, eno uketho julubne uboth ma nyo nwang’u gibecithung’ i nam.

Kawoni Yesu udok yo reto mi nam Galilaya, i pacu mi Kapernaum. Dhanu m’enyayu igi cam gilubo toke gicidh ginwang’e kuca man gipenje kumae: “Ibino kakeni awene?” Yesu ujukogi kamaleng’, ewacu nia gibelubo toke pi cam. Edok emedo kumae: “Kud wutim pi cam ma nyothre, endre pi cemo m’ubedo mi kwo ma rondo ku rondo.” E gipenje kumae: “Wabitimo ang’o kara watim tic pa Mungu?”​—Yohana 6:25-28.

Saa moko nyo giparu iwi tic ma jukiewo pire i Cik, re Yesu ubino weco pi tic ma pire tek nisagu zoo, eyero kumae: “Maeni tic pa Mungu ya wuyi ng’atu m’eoro.” Kadok Yesu utimo udu dupa de, re dhanu ginyutho ngo yioyic i ie. Gikwayu nia eketim udu mange ka gibiyie. Gipenje kumae: “Itimo ang’o? yang’ wegwa gicamu mana i yamba; calu egore kumae, emio igi kwen m’uai i polo gicam.”​—Yohana 6:29-31; Zaburi 78:24.

Pi niculo wang’ lembe ma gikwayu, Yesu ukoro igi kamaleng’ nia Ng’atu moko utie ma copo pong’o yeny pa dhanu i ayi mir udu, ewacu kumae: “Andhandha ayero iwu, kwen m’uai i polo Musa mio iwu en ungo; ento Vwa e m’umio iwu kwen mandha m’uai i polo. Kum kwen pa Mungu en e maeno m’uai i polo loro piny, man emio kwo de ni ng’om.” Fodi asu ginyang’ ungo i lembe ma Yesu uyero, pieno gidok gikwaye kumae: “Bedimi iwa kwen maeni thiri thiri.” (Yohana 6:32-34) Yesu ubino weco iwi “kwen” ma nenedi?

Ekoro kumae: “An a kwen mi kwo: ng’atu m’ubino i bang’a kec binege ngo, ng’atu m’uyia de rieu binege ki ngo. Ento awacu iwu, nia unena, ere fodi wuyio ngo. . . . Kum aloro kud i polo piny, nitimo yeny ma ia yenyo an ungo, ento yeny ma i ng’atu m’uora yenyo re. Man maeni en e yeny ma i ng’atu m’uora yenyo re, ya kum ceke m’emio ira moko kud urwiny ira, endre aketh ecung i kajikceng’. Kum maeni en e yeny ma i Vwa yenyo nia ceke kubang’gi m’uneno Wod, m’uyie de ubed ku kwo ma rondo ku rondo.”​—Yohana 6:35-40.

Wec ma Yesu uyero unyayu kwinyo i dhanu, man Juyahudi gicaku ning’ur i kume. Giwacu nia Yesu ubeloko lembe ya etie “kwen m’uai i polo loro piny.” (Yohana 6:41) Gin gibeneno Yesu ni nyathin pa dhanu kumeni, ma yo pagi ni Galilaya, adhura mi Nazareti. Uketho gipenjo kumae: ‘Maeni Yesu ngo ma wod Yosefu, ma wang’eyo won ku mini?’​—Yohana 6:42.

Yesu uyero kumae: “Kud wung’ur i kindwu giwu. Ng’atu moko mbe ma copo bino i bang’a, tek Wego m’uora kupeye ngo: man abiketho [ecer] i kajikceng’. Egore i lem jubila kumae, gin ceke gibinwang’u ponji ba [Yehova]. Dhanu ceke kubang’gi m’uwinjo ba Wego, m’ugamu ng’eyo de gibino i bang’a. En e nia ng’atu moko neno Wego ngo, ndhu ng’atu m’uai ba Mungu, e m’uneno Wego. Andhandha, ayero iwu kumae, ng’atu m’uyio ebedo ku kwo ma rondo ku rondo.”​—Yohana 6:43-47; Isaya 54:13.

Nindo moko kinde ma Yesu ubino weco ku Nikodem, ewacu nia ng’atu ma binwang’u kwo ma rondo ku rondo utie ng’atu m’ubedo ku yioyic i Wod dhanu, ewacu kumae: “Ng’atu ma tek uyie [Wod Mungu ma kulong’] kud erwiny ki endre ebed ku kwo ma rondo ku rondo.” (Yohana 3:15, 16) Re kawoni Yesu beyero ni udul dhanu m’upong’ nia ka giyie, gibinwang’u kwo ma rondo ku rondo; kwone kwen mi Galilaya kunoke mana copo mie ngo igi. Dong’ ng’atini copo nwang’u kwo ma rondo ku rondo nenedi? Yesu udok kendo iwi wec pare kumae: “An a kwen mi kwo.”​—Yohana 6:48.

Ponji ma Yesu uponjo iwi kwen m’uai i polo umedere asu, man ponjine uwok unyayu yakini kinde m’ecidho niponjo i kacokiri mi Kapernaum.