PENJI MI 5

Acopo timo ang’o ka jubesaya kud ali i somo?

PIRANG’O PENJI MAENO

Kite m’idwoko ko wang’ wec copo ketho lembe ubed maber kunoke marac magwei.

ICOPO TIMO ANG’O?

Kepar lembe mae: Tin, Thomas ubemito ngo ecidh i somo. Emito ewok dong’ magwei kud i somone. Ikind dwi adek m’ukadhu, awiya wadi m’esomo kugi gicido nyinge. Ing’eye, gicaku nyinge mir anyware. Saa moko ng’atu acel bino gudo buku kud i cing’ Thomas man etimere ve nia etimo ngo aka, kunoke ng’atu acel mange bino yor ing’eye, ecwale, e Thomas lokere nenogi re eyero ngo lembe moko. Nyaworo, gilund ginywaru Thomas i kite marac magwei nikadhu kud i Internet . . .

Ka nwang’u itie Thomas, nwang’u icopo timo ang’o?

KEPAR!

In de nwang’u tego peri moko nuti! I andha, icopo voyo ng’atu m’ubeseyi kud ali m’umbe nigoye agoya. Icopo nivoye nenedi?

BED LING’. Biblia uwacu kumae: “Jakasegu weco ku ng’ecwiny pare ceke; ento ng’atu ma riek cere man ekwio wie.” (Lembrieko 29:11) Kan itimo kero nibedo ling’, saa moko ju ma gibeseyi kud ali gicopo neno nia ve gibesendiri mananu.
KUD IDWOK WANG’ RAC KU RAC. Biblia uwacu kumae: “Kud wucul wang’ gin ma rac ni ng’atu moko.” (Jurumi 12:17) Niculo wang’ rac ku rac ketho lembe doko rac magwei.
KUD IROYIRI I PEKO. Biblia uwacu kumae: “Ng’atu ma won pidoic neno dubo, man epondo.” (Lembrieko 22:3) Kan ecopere, uriri cen ku dhanu ma gicopo timi rac man uriri ku lembe ma copo ketho ali uwoki.
DWOK WEC MABER. Biblia uwacu kumae: “Loko lembe ma yo kwio wi kwinyo.” (Lembrieko 15:1) Icopo bende nidwoko wang’ lembene ku sosi. Ku lapor, ka ng’atu m’ubeseyi kud ali uwacu nia icwei dit, icopo yengo goki, man iwacu ire kumae: ‘An de anwang’u nia acwei dit, nwang’u de abemito alwor cweyone moko!’
AI CEN KU KECA. Nora ma oro pare 19, uwacu kumae: “Nibedo ling’ man niai cen, nyutho nia iteng’ni man iloyo ng’atu m’ubeseyi kud ali; enyutho bende nia itie ku kweriri gijo ma ng’atu m’ubeseyi umbe ko.”—2 Timoteo 2:24.
BED KU GENOGEN I WII GIRI. Wang’ mapol ju ma gibed gisayu ali gicopo ning’io dhanu ma ginwang’iri gin gigi nia tijgi mbe man ma gicopo tundo ngo nicero bang’gi. Tung’ ku maeno, dhanu dupa ma gisayu ali gibiweko niseyi, ka gineno nia ibemio ngo igi kaka ma gicopo niseyi ko.
KOR LEMBENE NI NG’ATU MANGE. Ng’atu moko m’ubino japonjo uwacu kumae: “Acopo ketho cwiny ng’atu moko ci ma jubesayu kud ali nia kud eling’ iwi lembene, pilembe nikoro lembene, bikonyo dhanu mange bende kara kud jusaygi kud ali.”

Aradu moko ubevoyo ng’atu m’ubesaye kud ali ku tego cwiny — Nigeniri in giri biketho ibibedo ku tego ma ng’atu m’ubeseyi umbe ko

NYO ING’EYO?

M’uweko ali ma jufodo ko ng’atini afoda, sayu ali uketho i ie lembe mae:

Anyware. “Wia biwil ungo nyanok de ikum nying’ mir anyware ma gibed gilwong’a ko, man ikum lembe ma gibed giyero. Giketho apar nia tija mbe, dhanu de umara ngo, man nia lembe m’atimo ma cuu de mbe. Timba nwang’u gigoya agoya de ber.”—Celine, ma tie ku oro 20.
Nikoyo ng’atini. “Awiya wada mi somo gicaku niringa. Gibed gitimiri ve nia kabedo umbe i dhu meza mi cam, kara kud abed i ng’etgi. Abed aywak man acamu kenda pi oro zoo.”—Haley, ma tie ku oro 18.
Nisayu ali nikadhu kud i Internet. “Nikiewo lembe moko ma nok kende i ordinater copo nicido nying’ ng’atini kunoke copo nyotho kwo pare zoo. Ecopo nen ve ibesembo lembe asemba, ento lembe maeno copo niwok!”—Daniel, ma tie ku oro 14.

**PENJI MOKO IWI SAYU NG’ATINI KUD ALI**
ANDHA KUNOKE VUPO?	DWOKO WANG’ PENJI
1 Sayu ali ucaku niai con.	1 Andha. Ku lapor, Biblia uweco pir udul dhanu moko ma nying’gi ubino Junefili; thelembene, “Dhanu ma ketho jumange podho.”—Thangambere 6:4.
2 Sayu ali tie ngo lembe marac, etie kende kende nisembo lembe.	2 Vupo. Sayu ali tie gin ma ketho aradu ma dupa ginegiri gigi.
3 Yo maber mi voyo ng’atu m’ubeseyi kud ali, tie nidhau kude.	3 Vupo. Wang’ mapol, ju ma gisayu ali gibed gibedo ku kero nisagu dhanu ma gibesayu, pieno etie lembe ma tije mbe nidhau kugi.
4 Ka jubesayu ng’atu moko kud ali i vuti, timiri ve ineno ngo.	4 Vupo. Kan ineno jubesayu ng’atu moko kud ali, re ibedo ling’, eca nwang’u in de ibedikiri ku ng’atu m’ubesayu ali, kakare nilaru ng’atu ma jubesayu kud ali.
5 Kadok ju ma sayu ali giweco ku tegocwinygi, re lworo de negogi.	5 Andha. Kadok dhanu ma besayu jumange kud ali ginwang’u nia gin re ma gi gin, re dupa m’ikindgi gitie ku lworo man gisendo dhanu mange pi niumo wi lworo migi.
6 Ju ma gisayu ali gicopo niloko kura migi.	6 Andha. Dhanu ma gisayu ali gicopo niloko paru man kura migi ka jukonyogi.