Jaramony ma tek ku nyathi nyaku moko

Nyathi nyaku moko mir Israel ubino kwo i ng’om mi Siria bor ku jupagi. Juaskari mi Siria giyake kud i bang’ jupagi, man i ng’eye edoko boi pa dhaku pa Naaman m’ubino jadit mi juaskari. Nyathi nyaku maeno ubed uworo Yehova kadok nwang’u dhanu m’ebekwo kugi giworo ngo Yehova de.

Naaman ubino ku twoyo moko ma rac mandha m’unyayu rem i kume zoo, man saa ceke nwang’u kume uberemo arema. Nyathi nyaku maeno umito lee dit nia ekony Naaman. Pieno, eyero ni dhaku pa Naaman kumae: ‘Ang’eyo ng’atu moko ma copo keyo kum won ot peri. Jabila pa Yehova moko nuti i ng’om mir Israel; nyinge tie Elica. Eromo keyo kum won ot peri.’

Min ot pa Naaman unyutho ni Naaman lembe ceke ma nyathi nyaku maeno uyero. Naaman ubino ayika nitimo gin moko ci kara kume ukey. Pieno ecidho i bang’ Elica i ng’om mir Israel. Naaman ubino paru nia Elica biwok jole calu ng’atu moko ma pire tek. Ento kakare nibino weco i bang’e en gire, Elica uoro jatic pare re m’ubin umoth Naaman man uwac ire kumae: ‘Cidh ijom wang’ abiro i kulo Yordan. E kumi bikey.’

Cwiny Naaman ugam utur magwei. Eyero kumae: ‘Aparu nia jabila maeni birwo i bang’ Mungu pare man ebimulo kuma ci abikey. Re eyero nia acidh ajom i kulo maeni mir Israel. Watie ku kulo ma beco i Siria. Ka pi jom, nwang’u acopo jom kuca.’ Ng’eicwiny umaku Naaman, e eai ku yo pa Elica.

I ng’eye, jutic pa Naaman gikonye kara eyik paru pare. Giyero ire kumae: ‘Nyo icopo maru ngo nia itim lembe moko ci kara kumi ukeyi? Lembe ma jabila ung’olo iri nia itim utie lembe ma yot. Ibeneno ngo nia ecibedo ber kan itimo ve m’eng’olo?’ Naaman uwinjo lembe ma giyero ire. E eloro i kulo Yordan man ejom wang’ abiro. I wang’ mir abirone, kinde ma Naaman uwok kud i pii, kume ukey man elony tetete. Ebino ku mutoro lee mandha, e edok i bang’ Elica pi nifoye. Naaman uyero kumae: ‘Kawoni ang’eyo nia Yehova kende re ma tie Mungu mandha.’ Ibeparu nia nyathi nyaku ma Nyaisrael uwinjere nenedi kinde ma Naaman udwogo ma kume ukey?