Wonabali ubidho Yesu

I ng’ey ma Yesu ulimo batizo, tipo ma leng’ utelo wiye nitundo i langa. Ecamu ngo piny moko zoo de pi nindo 40, man kec ubino nege lee mandha. E Wonabali ubin ubidho Yesu man eyero ire kumae: ‘Tek andha itie Wod Mungu, yer ni kidi ma e udok ni lungu mukathi.’ Ento Yesu utiyo ku giragora pi nidwoko ire kumae: ‘Egorere nia tie ngo mukathi kende re ma ketho dhanu kwo. Ento ukwayu niwinjo lembe ceke m’uai i dhu Yehova.’

Wonabali uketho Yesu kendo i amulaic kumae: ‘Tek andha i Wod Mungu, piey piny ku kaka ma lirlir mir hekalu. Kum egorere nia Mungu bioro malaika pare pi nimeki.’ Ento Yesu utiyo kendo ku giragora pi nidwoko ire kumae: ‘Egorere nia icikiri ngo nimulo i Yehova.’

I ng’eye, Sitani unyutho ni Yesu ker ceke m’i ng’om ku lonyo man dwong’ne de, e eyero ire kumae: ‘Abimiyo iri ker maeni ceke ku dwong’ne de, tekene irum man irwo ira wang’ acel kende ci.’ Ento Yesu udwoko ire kumae: ‘Cidh cen Sitani! Egorere nia icikiri nirwo ni Yehova kende.’

Wonabali ugam uweke, e jumalaika gibino man gitimo ire. Niai eca, Yesu ucaku rweyo lembanyong’a mi Ker. Eno re m’ubino tic ma juore pire iwi ng’om. Dhanu umaru lembe ma Yesu uponjo igi, man gilubo toke kaka moko ci m’ebecidho i iye.