Yesu utimo udu dupa

Yesu ubino iwi ng’om pi nirweyo lembanyong’a mi Ker pa Mungu. Yehova umiyo tipo ma leng’ ni Yesu pi nitimo udu dupa man eno unyutho lembe m’ebitimo kinde m’ebibedo Ubimo. Ekeyo kit twoyo ceke. Kaka moko ci m’ebed ecidho i iye, dhanu ma kumgi uberemo gibed gibino i bang’e pi ninwang’u kony man ebed ekeyo kumgi. Eyabu wang’ abinga, ekeyo kum ju ma ithgi dhing’, ekeyo kum weg goro man ewodho pajogi kud i dhanu. Saa moko gibed gimulo dhu bongu pare kende ci de kumgi ubed ukey. Dhanu gibed gilubo tok Yesu kaka moko ci m’ebecidho i iye. Ebed eriemo ngo ng’atu m’ucidho i bang’e, kadok i saa m’ebemito nie ekeebed kende.

Nindo moko, jukelo ng’atu ma tie ku tho ma nego kumjo nding’ i ot ma Yesu ubedo i iye. Ento dhanu upong’o ode bik, uketho mondo ubino tek. Pieno, jutuco wi ode man juluro ng’atune ku wang’ ot i bang’ Yesu. Yesu uyero ire kumae: ‘Ai iwothi.’ Kinde m’eai malu, i dhanu uwang’ lii.

Nindo mange kinde ma Yesu ubino mondo i pacu moko, dhanu apar ma weg dhobu gicungo ku bor man gikok kumae: ‘Yesu, konywa!’ I nindo maeca jubed juyiyo ngo nia weg dhobu gicor ceng’ini i kum dhanu mange. Yesu uyero igi nia gicidh i hekalu, calu ma Cik pa Yehova ung’olo ni weg dhobu nia gitim ka kumgi ukey. Kinde ma gibecidho, kumgi uwok ukey i gengi. Saa ma ng’atu acel m’i kindgi unyang’ nia kume ukey, eloko i bang’ Yesu man epaku Mungu. Kud i kind dhanu apar, ng’atu acel maeno re m’ufoyo Yesu.

Dhaku moko m’utwoyo pi oro 12 ugam ung’eyo ngo ka nyo kume romo key nindo moko. Elurere kud i kind udul dhanu yor i ng’ey Yesu man emulo dhu kendi pare. E ndhu ndhu nica, kume ukey. Kinde ma Yesu unyang’, epenjo kumae: “Ng’a m’umulo kuma?” Lworo umaku dhaku maeno, ento ebino i bang’ Yesu man eyero ire lembe m’utimere. Yesu ujuko cwinye ku wec ma e: ‘Nyara, cidh ma cwinyi kwiyo.’

Jadit moko mi sinagog ma nyinge Yairo ukwayu Yesu kumae: ‘Bin yo para! Kum nyara uberemo ma rac.’ Ento nyathinne ular utho nwang’u fodi Yesu utundo ngo i pacu pa Yairo. Kinde ma Yesu utundo, enwang’u dhanu dupa gibino pi niwak ku juruot maeno. Yesu uwacu igi kumae: ‘Kud wuwaki; ebenindo aninda.’ Egam emaku cing’ nyakune man ewacu ire kumae: “Nyaku, ai malu!” E eai wang’ acel man Yesu uyero ni junyodo pare nia gimii ire piny moko ecam. M’umbe jiji, lembe maeno uketho junyodo pare gibino kud anyong’a ma yawe mbe.