Yesu ucero Lazaru

Yesu ubino ku jurimbe adek ma ceng’ini ma gibed gikwo i Bethania. Jurimbene ubino Lazaru ku nyimego pare ario ma nying’gi Maria giku Martha. Nindo moko kinde ma Yesu ubino loka kulo Yordan, Maria giku Martha gioro ire kwenda moko ma pio pio, giwacu kumae: ‘Lazaru uberemo ma rac. Ka copere, bin pio!’ Ento Yesu ucidho ngo ndhu ndhu nica. Ekuro pi nindo ma kadhu ario kan ewacu ni julubne kumae: ‘Wacidhu i Bethania. Lazaru ubenindo man abecidho pi nicewe.’ Jukwenda gidwoko ire kumae: ‘Tekene Lazaru ubenindo, eca bikonye kara kume ukey.’ E Yesu uwacu igi ngbeng’ kumae: ‘Lazaru utho.’

Kinde ma Yesu utundo i Bethania, nwang’u dong’ nindo ang’wen udaru kadhu niai ma jukunyo Lazaru. Bende, dhanu ma wendgi lee gibino pi nijuko cwiny Martha giku Maria. Kinde ma Martha uwinjo nia Yesu utundo, eringo kara eromb kude. E ewok eyero ire kumae: ‘Rwoth, ka nwang’u ibino keni, nwang’u umira tho ngo.’ Yesu udwoko ire kumae: ‘Umeru bikwo kendo. Martha, nyo iyiyo lembe maeni?’ Martha udwoko ire kumae: ‘Ayiyo nia ebicer i nindo m’ubino.’ I ng’eye, Yesu uwacu ire kumae: “An a cer man kwo.”

Martha ucidh uyero ni Maria nia ‘Yesu utundo.’ Maria uringo i bang’ Yesu man udul dhanu ulubo toke. Ewok epodho i the tiend Yesu m’ebewak, man eyero kumae: ‘Rwoth, ka nwang’u ibino keni, nwang’u fodi umegwa kwo asu!’ Yesu uneno kite ma can ubenege ko, uketho en de ecaku wak. Kinde m’udul dhanu gineno piwang’ Yesu, giwacu kumae: ‘Wukenen kite m’emaru ko Lazaru.’ Ento jumoko gipenjiri kumae: ‘Pirang’o ebodho ngo jarimbene ke?’ I ng’eye Yesu udok utimo ang’o?

Yesu ucidho kaka ma liel n’i iye. Nwang’u juriebo kidi ma dit i dhu odi lielne. Eyero kumae: ‘Wung’iel kidi no cen.’ Martha uyero ire kumae: ‘Nindo ang’wen udaru kadhu! Ng’wice ubeng’wii.’ Ento jung’ielo kidi asu man Yesu urwo, ewacu kumae: ‘Vwa, abefoyi pilembe iwinja. Ang’eyo nia saa ceke iwinja, ento abeweco ku dwanda ma tek kara dhanu maeni ging’ey nia in re m’iora.’ E ekok ku dwande ma tek kumae: “Lazaru, wok woko!” Lembe moko mi zungo ugam utimere. Lazaru uwok kud i liel ma kume tie ariwa ku bongu. Yesu uyero kumae: “Wugonye man wuwek ecidhi.”

Dhanu dupa m’uneno lembuno giyiyo Yesu. Ento jumoko gicidh giyero lembene ni Jufarisayo. E niai eca, Jufarisayo gimito gineg Lazaru giku Yesune zoo. Yuda Iskarioth ma tie acel m’i kind jukwenda 12 ucidho nyalwe i bang’ Jufarisayo man epenjogi kumae: ‘Wubicula sente adi kan akonyowu ninwang’u Yesu?’ Gigam giwinjiri iwi sente mi mola ma tar 30, e Yuda ucaku sayu kite m’ecopo miyo ko Yesu i cing’ Jufarisayo.