Jumaku Yesu

Yesu karacelo ku jukwenda gikadhu kud i poga mi Kidron man gitundo iwi got mir Oliv. Ubino diewor ma ling’ i saa ma dwi uberieny terere i iye. Kinde ma gitundo i podho mi Gethsemane, Yesu uwacu igi kumae: “Wubed keni man wukii.” E Yesu umondo i podho kud i gengi moko ma nyaliki liki man ewok epodho aruma conge. Ku can ma dit i cwinye, erwo i bang’ Yehova kumae: “Dong’ yeny peri utimere.” E Yehova ugam uoro malaika moko ubin utielo cwinye. Kinde ma Yesu udwogo i bang’ jukwenda pare, enwang’u gibenindo. Ewacu igi kumae: ‘Wuai malu! Eni tie ngo saa m’ukwayu junind i iye! Saa para udaru romo ma jubecimiya ko i cing’ judegina.’

E ndhu ndhu Yuda utundo, m’ebetelo wi udul juaskari ma gitie ku palamularu man undoy i cing’gi. Eng’eyo kaka m’ecopo nwang’u Yesu i iye, pilembe gibed gicidho wang’ ma pol i podho maeno. Yuda uyero ni juaskari nia ebikonyogi kara ging’ii Yesu. Saa ma gitundo, ewok ecidho atira i bang’ Yesu man ewacu ire kumae: ‘Moth iri, Japonji.’ E ecwiyo limbe. Yesu uyero ire kumae: ‘Yuda, ibeciba ku cwiyo limba?’

Yesu ucoro i bang’ udul juaskari man epenjogi kumae: “Wubesayu ng’a?” Gidwoko ire kumae: “Yesu ma Janazarethi.” Yesu uwacu igi kumae: “An a en.” E dhanu maeno giloko ku ng’eygi man gipodho i ng’om. Yesu upenjo udul juaskari kendo kumae: “Wubesayu ng’a?” Gidwoko ire kendo kumae: “Yesu ma Janazarethi.” Yesu uloko lembe igi kumae: ‘Adaru yero iwu nia an a en. Wuwek dhanu maeni gicidhi.’

Kinde ma Pethro unyang’ i lembe m’ubetimere, ewodho palamularu man etong’o ith Malko ma jatic pa Jalam ma dit. Ento Yesu umulo ith ng’atune man ekeye. I ng’eye, eyero ni Pethro kumae: ‘Keth palamularu peri cen. Kum tek ibekiedo ku palamularu, in de jubinegi ku palamularu.’ Juaskari gigam gimaku Yesu man gitwiyo cinge, e jukwenda gilal ku ng’wec. Gitere i bang’ Ana ma jalam. Ana uwok upenjo Yesu man eore i ot pa Kaifa ma Jalam ma dit. Dong’ lembang’o m’udok utimo jukwenda?