Pethro ukwero Yesu

Kinde ma Yesu ubino karacelo ku jukwenda pare i kusika ma malu, eyero igi kumae: ‘Wun ceke wubiweka uthieno ma tin.’ Pethro udwoko kumae: ‘An re ngo! Kadok jumange ceke uweki de, an re abiweki ki ngo.’ Ento Yesu uyero ni Pethro kumae: ‘I wang’ ma fodi kulok ukok ungo, ibiyero wang’ adek nia ing’eya ngo.’

Kinde ma juaskari gitero Yesu i ot pa Kaifa, jukwenda ma pol giringo. Ento juario m’i kindgi gilubo tok udul dhanu. Ng’atu acel ubino Pethro. Ecidho nitundo i lelagang’ mi ot pa Kaifa man ecaku oyo mac. Kud i kind der mac, jatic moko ma nyaku uneno wang’ Pethro man eyero ire kumae: ‘Ang’eyi! Ibino karacelo ku Yesu!’

Pethro udwoko ire kumae: ‘Ungo, abino ngo kude! Ang’eyo ngo lembe m’ibeyero no!’ E Pethro ucidho yor i dhugang’. Ento keca de jatic mange ma nyaku uwok unene man uwacu ni udul dhanu kumae: ‘Ng’atu maeni de ubino ku Yesugi!’ Pethro udwoko kumae: ‘Ang’eyo ngo Yesu nyanok de!’ Ng’atu mange ma co uwacu kumae: ‘In de itie acel m’i kindgi! Abeyero kumeni nikum ayi m’ibeweco ko ubenyutho nia iai i Galilaya calu Yesu.’ Ento Pethro ukwero ku kwong’ kumae: ‘Ang’eyo ng’atuno ngo!’

Ndhu ndhu nica, kulok ukok. Petro uneno Yesu uloko wang’e i bang’e. E epoy i kum wec pa Yesu man ewok woko, ewak ku rac.

I saa maeno judongo mi Sanedrini, niwacu Otpido ma malu mi Juyahudi, ung’olo lembe iwi Yesu i ot pa Kaifa. Nwang’u dong’ gidaru pangu nia gineg Yesu man gibino sayu thelembe mi nege. Re ginwang’u ngo kosa moko acel de i wiye. Tokcenne Kaifa upenjo Yesu ngbeng’ kumae: ‘In i Wod Mungu?’ Yesu udwoko kumae: ‘Eyo.’ Kaifa uyero kumae: ‘Wambe ku yeny mi lembe mange. Eni eyanyu Mungu!’ E jupoklembe gicwaku parune, giyero kumae: ‘Ng’atuni uromo ku tho.’ Gicaku padu Yesu, ging’ulo lau i wang’e, gitwiyo wang’e man gigoye, ma gibewacu kumae: ‘Kan i jabila, yer iwa nia ng’a m’ugoyi!’

Kinde ma piny ulero, gitero Yesu i wang’ Sanedrini man gicaku penje kendo kumae: ‘In i Wod Mungu?’ Yesu udwoko igi kumae: ‘Wuyere eno.’ E ginwang’u nia eyanyu Mungu man gitere i bang’ Pontio Pilatho ma tie jabim mi Roma. Ang’o m’udok utimere i ng’eye? Wabinwang’u i wic m’ulubo.