Kornelio unwang’u tipo ma leng’

Jadit mir askari moko mi Roma ma pire tek ma nyinge Kornelio ubed ukwo i Kaisaria. Kadok nwang’u ebino ngo Jayahudi de, re Juyahudi gibed giwore. Ebed emiyo piny pare ku berocwinye pi nikonyo jucan man dhanu ma gitie i yeny. Kornelio ubino ku yiyoyic i Yehova man ebed erwo nja i bang’e. Ceng’ acel malaika uwok ni Kornelio man uwacu ire kumae: ‘Mungu uwinjo rwo peri. Or dhanu kawoni i adhura mi Yopa, kaka ma Pethro n’i iye man yer ebin i beng’i.’ E ndhu ndhu nica, Kornelio uoro dhanu adek i Yopa, ma tie adhura ma nwang’ere i kilometre ma romo 50 yo piny.

I saa ma rom eno, Pethro de uneno gin ma wok i wang’ i Yopa. Eneno yedi ma Cik uyiyo ngo nia Juyahudi gicam, man ewinjo dwal moko ubeyero ire nia ecamgi. Pethro ukwero, eyero kumae: ‘Fodi acamu ngo nyanok de yedi m’ucido i kwo para.’ E dwalne uyero ire kumae: ‘Kud ilwong’ yedi maeni nia gin m’ucido. Mungu udaru dwokogi leng’.’ Dwalne uyero bende ni Pethro kumae: ‘Dhanu adek n’i wang’ dhugola peri; wucidh wukugi.’ Pethro ucidho i wang’ dhugola man epenjogi nia pirang’o gini keca. Gidwoko ire kumae: ‘Kornelio ma jadit mir askari mi Roma re m’uorowa. Kwayu ibin i ot pare i adhura mi Kaisaria.’ Pethro ugam ujologi man emiyo igi ot ma givuto i iye i diewor nica. Urwonde, gicidho ku dhanu maeno i Kaisaria, karacelo kud umego moko mir adhura mi Yopa.

E kinde ma Kornelio uneno Pethro, epodho aruma conge. Ento Pethro uyero ire kumae: ‘Ai malu! An de a dhanu calu in. Mungu uyero ira nia abin i ot peri, kadok nwang’u Juyahudi gimondo ngo i ot mi dhanu mi thek mange de. Dong’ ka copere, yer ira nia ioro dhanu i bang’a pirang’o.’

Kornelio udwoko ni Pethro kumae: ‘Nindo ang’wen udaru kadhu niai m’abino rwo i bang’ Mungu, man malaika uyero ira nia aor dhanu i beng’i. Ka copere, ponjwa ku lembe pa Yehova.’ Pethro uyero kumae: ‘Anyang’ nia karaman Mungu umbe kud akoyakoya. Eyiyo ng’atu moko ci m’ubemito niwore.’ Pethro uponjogi ku lembe dupa iwi Yesu. E tipo ma leng’ ubino iwi Kornelio ku ju m’ubedo kude keca, man gin ceke gilimo batizo.