Lembe ma nwang’ere i thenge mir 8

Yehova umiyo rieko ma lee ni Suleman man emiyo ire bende rwom mi giero hekalu. Ento nok nok Suleman uweko Yehova. Kan itie janyodo, kor cuu ni nyathin peri kite ma ju ma gibed gitimo thier ni mungu m’araga giketho ko Suleman uweko Yehova. Kor ire bende kite ma ker ugam upokere ko, kite ma jubim ma reco giketho ko dhanu uweko Yehova man gicaku woro ko mungu m’araga. I kind saa maeno, jusendo jubila pa Yehova ma dupa man junego jumoko anega zoo. Yezabel m’ubino dhaku p’ubimo uketho dhanu dupa mi ker ma yo malu gicaku woro mungu m’araga. I saa maeno, lembe ubino rac magwei i Israel. Ento jutic pa Yehova ma gigwoko bedoleng’ migi gibino dupa i Israel; jumoko m’i kindgi ubino ubimo Yehocafath man jabila Eliya.