PONJI MIR 14

Niwodho paru ma dongo thwolo thwolo

Juebrania 8:1

LEMBE M’ICOPO TIMO: Saa m’ibemio korolembe, kony dhanu giwinji ma ber, keth paru ceke ma dongo uromb ku lembakeca mi korolembene, man uromb ku thiwie.

KITE M’ICOPO TIMO KO:

Bed ku lembakeca. Ng’ei ka nyo lembakeca mi korolembe peri utie nikonyo dhanu ung’ei lembe moko, nicwalugi giyii lembe moko, kunoke nyo nimio amora i kumgi; e imii korolembe peri nimakere ku lembakecane. Kor paru ceke ma dongo i ayi ma copo konyi nitundo i lembakeca peri.

Penjiri kumae: ‘Gin m’abeciponjo e juwinj para gicopo paru ang’o i wie, kunoke ecopo ketho gipenjiri ku penji ma nenedi? Ka ginwang’u dwokowang’ penjine, gicopo dok penjo penji mange ma kani?’ I ng’eye, keth paru m’ibeciponjo de ulwobere kumeno, kara dhanu m’ubewinji ginyang’ man giyii ponjine.
Dok iwi wec ma dongo mi korolembe. Kinde m’ibemediri ku korolembe, woth bedok iwi wec ma dongo m’i thiwie.
Nyuth paru ma dongo terere man i ayi ma yot. Ponj kende kende paru ma dongo m’ugwaku thiwiwec peri, m’ineno nia icopo daru i saa ma jumio. Nen nia ibiweco iwi paru adi ma dongo. Korgi terere, woth beyom i wang’ nikadhu i m’ucelo man cidh kugi yo yo.

Icopo nyutho paru ma dongo i acaki mi korolembe peri pi nikonyo juwinj gilubi, kunoke kinde m’ibedaru kara wigi kud uwil i kum parune.