PONJI MIR 15

Niweco i kite ma nyutho nia iyio lembe m’ibeyero

2 Timoteo 1:5, 12

LEMBE M’ICOPO TIMO: Wec i ayi ma copo konyo dhanu ginen nia iyio andhandha nia lembe m’ibeyero utie lemandha man pire tek.

Yikiri ku mukuni. Rud wang’ lembe m’ibeciponjo nitundo inyang’ i paru ma dongo, man nen nia Biblia ucwaku parune nenedi. Pim niyero lembe maeno ma pigi tek i adundo man i ayi ma yot. Wec akeca iwi bero mi lembene ni juwinj. Kwai Yehova ukonyi ku tipo maleng’.

Rud wang’ ponji peri ku dwendi ma tek, kara emok cuu i wii, man kara imie ma cwinyi tek.
Tii ku wec ma nyutho nia iyio andhandha gin m’ibeyero. Kakare nibedwogo iwi lembe i kite ma jukiewe ko iwi karatasi, yere i ayi m’inyang’ ko anyang’a i ie. Wec i kite ma nyutho nia iyio lembe m’ibeyero ku cwinyi kpo.
Wec i ayi ma ketho jugeno lembe m’ibeyero. Kinde m’ibeweco, yer lembe her her. Kan ecibedo rac ungo nineno wang’ dhanu, i saa mi korolembe peri, woth beneno wang’ ju m’uwinji.

Re kadok ibeyero lembe i kite ma nyutho nia iyio andhandha gin m’ibeyero de, kud iwec i ayi mi koso woro. Bende, kud isai nia lembe peri ubam zoo, man kud idii dhanu mi tek tek nia giyii lembene. Kadok ibeyero lembe m’uai i adundeni de, re wec i bang’ ju m’uwinji ku bero.