PONJI MIR 19
Nyo Jumulembe pa Yehova gitie Jukristu mandha?
Wa Jumulembe pa Yehova, wayiyo nia watie Jukristu mandha. Ponji maeni binyutho nia pirang’o wayiyo kumeno. Wabineno gin ma yiyoyic mwa ucungo i wiye, thelembe m’uketho walwong’ara nia Jumulembe pa Yehova, man ayi ma wamer ko i kindwa.
1. Yiyoyic mi Jumulembe pa Yehova ujengere iwi ang’o?
Yesu uwacu kumae: “Lembe [pa Mungu] en e lemandha.” (Yohana 17:17) Tap calu Yesu, wa Jumulembe pa Yehova bende yiyoyic mwa zoo waketho ucungo iwi Lembe pa Mungu niai con. Ku lapor, kinde ma kpawa mwa ma kawoni ucaku i kum oro 1870 kumeni, ungu mi dhanu moko m’atira gicaku ponjo Biblia karacelo kilili pi ning’eyo nia ebeponjo ang’o mandha. Yiyoyic migi zoo gibed giketho ujengere iwi lemandha ma ginwang’u nia Biblia ubeponjo, kadok kinde ma lembe ma ginwang’une ukoc ku ma kanisa ubecuku ponjo. I ng’eye, gicaku rweyo pi lemandha mi Biblia ma ginwang’une ni dhanu mange bende.a
2. Pirang’o walwong’ara nia Jumulembe pa Yehova?
Yehova lwong’o jurutic pare zoo nia Jumulembe pare. Pirang’o? Pilembe tic migi tie ninyutho lemandha i wiye en e Yehova. (Juebrania 11:4–12:1) Ku lapor, i rundi ma con, Mungu yero ni dhanu pare kumae: “Wun wu jumulembe para.” (Som Isaya 43:10.) Yesu bende Biblia ulwong’e nia “Jamulembe mandha.” (Lembanyutha 1:5) Pieno, i oro 1931 wan bende wacaku lwong’ara nia Jumulembe pa Yehova, man nitundo tin de, watie ku mutoro nilwong’ara kumeno.
3. Jumulembe pa Yehova gibekwanyu lapor mi mer pa Yesu nenedi?
Yesu ugam umaru julub pare lee dit uketho ebed enenogi ve umego ku nyimego pare mi ot acel. (Som Marko 3:35.) Kumeno bende, wa Jumulembe pa Yehova watie ve juruot acel man watie i acel i ng’om zoo. Eno re m’uketho walwong’ara nia umego ku nyimego. (Filemon 1, 2) Waworo bende cik ma e m’uyero nia, “wumar umego mi wang’ ng’om zoo.” (1 Pethro 2:17) Wabenyutho kit mer maeno i yore dupa dit. Ku lapor, wabed wakonyo umego ku nyimego mwa i wang’ ng’om zoo ka peko moko wok i wigi man ka gitie ku yeny mi kony.
MED NYANG’ PERI
Wakenen kawoni lembe mange iwi kpawa mi Jumulembe pa Yehova, man lembe mange m’ubenyutho kamaleng’ nia watie Jukristu mandha.
Jukristu mandha giketho yiyoyic migi ceke cungo iwi Biblia man girweyo pi lembene ni dhanu mange
4. Yiyoyic mwa ucungo iwi Biblia
Yehova ular uyero nia lemandha mi Biblia binyuthere kamaleng’, niwacu, wabinyang’ i iye cuu nisagu m’i wang’e zoo. Som Daniel 12:4 man 2 Jukorintho 4:6. I ng’eye, wuwec iwi penji m’ulubo e:
Yehova ung’olo nia ang’o ma ‘bimedere’ i kind dhanu pa Mungu kinde ma gibimediri niponjo Biblia?
Wanen ayi ma ungu moko mi juponj Biblia, uketho i iye Charles Russell, gibed giponjo ko Lembe pa Mungu. Nen VIDEO, man i ng’eye wuwec iwi penji m’ulubo e:
I video maeni, Charles Russell ku juponj Biblia wagi gibed giponjo Biblia nenedi?
Nyo ing’eyo?
Saa moko wabed waloko yiyoyic (kunoke ponji) mwa moko. Pirang’o? Tap calu ma der pa ceng’ m’ubewok i dhu kugweno bemenyo piny nok nok, Mungu bende bemiyo der nok nok iwi Lembe pare; niwacu, ebed eketho wanyang’ i iye nok nok. (Som Lembrieko 4:18.) Pieno, kadok lembe mi Biblia udong’ pare kubang’e de, re tekene watuc ninyang’ i iye cuu nisagu m’i wang’e, waloko bende yiyoyic kunoke ponji mwa nimakere ku nyang’ mwa ma nyen.
5. Wabekwo nimakere ku nyingwa
Pirang’o wacaku lwong’ara nia Jumulembe pa Yehova? Nen VIDEO, man i ng’eye wuwec iwi penji m’ulubo e.
Pirang’o nying’ ma Jumulembe pa Yehova uromo tap kudwa?
Pirang’o Yehova ung’iyo dhanu ubed ni Jumulembe pare? Eng’iyogi kara gibed ginyuth lemandha i wiye man nia en re m’etie Mungu mandha, pilembe judaru cwayu vupo lee dit i wiye. Wakenen vupone moko ario kende.
Jurudini moko beponjo ju migi nia Mungu ubemito gitii kud ayi gin m’acwiya pi niwore kunoke nirwo i bang’e. Re, kesom Lembe mi Julawi 26:1, man i ng’eye wuwec iwi penji m’ulubo e:
Nimakere ku verse maeni, paru pa Yehova tie ang’o iwi tiyo kud ayi gin m’acwiya?
Judong dini moko beponjo nia Yesu tie Mungu. Re, kesom Yohana 20:17, man i ng’eye wuwec iwi penji m’ulubo e:
Nimakere ku verse maeni, nyo Mungu ku Yesu gitie ng’atu ma romi?
Yehova uoro Jumulembe pare gicidh girwey lemandha i wiye man iwi Wode. Paru peri tie ang’o iwi or maeno?
6. Watie ku mer i kindwa
Biblia uporo Jukristu ku watkum. Pieno, gicikiri nibedo i acel man niwinjiri ma ber. Som 1 Jukorintho 12:25, 26, man i ng’eye wuwec iwi penji m’ulubo e:
Jukristu mandha gicikiri nitimo ang’o ka Jukristu wagi gin’i peko?
Nyo ineno mer ma Jumulembe pa Yehova gibed ginyutho i kindgi? Kekor gin m’ineno.
Ka peko moko uwok i kum Jumulembe pa Yehova m’i theng ng’om moko, Jumulembe mi ng’om mange ceke gitimo kero nimiyo igi kony m’umbe galu. Pi nineno laporne moko, nen VIDEO. I ng’eye ke, wuwec iwi penji m’ulubo e:
Jumulembe pa Yehova gikonyiri nenedi i ng’ei yamu ma tek m’unyotho pinyi? Eno ubenyutho ang’o?
Jukristu mandha ginyutho mer ni ju ma gitie ku yency
DHANU MOKO BEYERO KUMAE: “Pirang’o wuyero nia wutie Jumulembe pa Yehova ma ke fodi wunene de ngo e?”
Yehova ucaku lwong’o jurutic pare nia Jumulembe pare niai awene?
I ADUNDO
Jumulembe pa Yehova gitie Jukristu mandha. Watie umego ku nyimego i ng’om zoo man wabeworo Yehova i acel. Yiyoyic mwa ucungo iwi Biblia man wabenyutho lemandha iwi Yehova ni dhanu.
Penji mi poyowic
Pirang’o wacaku lwong’ara nia Jumulembe pa Yehova?
Wabed wanyutho mer nenedi i kindwa?
Nyo iyiyo nia Jumulembe pa Yehova gitie Jukristu mandha? Kekor.
TIM SAYUSAC
Nen lembe mange m’ukoro pi kpawa mwa.
Nen lapor moko m’ubenyutho nia Jumulembe pa Yehova gituco wi ponji mi vupo ngbeng’ ngbeng’.
Nwang’ dwokowang’ penji ma tung’ tung’ ma nyo ibed ipenjiri ko iwi Jumulembe pa Yehova.
“Penji ma dhanu bepenjo akeca iwi Jumulembe pa Yehova” (Thiwiwec mi jw.org)
Stephen ugam udagu dhanu mi rangi mange lee mandha uketho ebed etimogi rac. Kenen gin m’eneno i kind Jumulembe pa Yehova m’ucwale nitimo alokaloka i kwo pare.
“Kwo para ubino nyothere magwei” (Otkur ma Wiw, nindo 1, dwi mir 7, 2015)
a Niai i oro 1879, Jumulembe pa Yehova gibewodho gazeti Otkur ma Wiw, m’ubekonyo pi rweyo lemandha mi Biblia.