PONJI MI 53
Ng’ii galuwang’ ma nyayu mutoro i Yehova
Yehova en e “Mungu ma jamutoro.” (1 Timoteo 1:11) Ebemito wan de wabed ku mutoro man wanjoy kwo. Efoyo ka wabekoyo saa moko pi ninambu man niyom i kum tic ma wabetimo. Dong’ i ponji maeni, wabineno nia wacopo tiyo nenedi ku saa mwa mi nambu man mi galuwang’ i ayi ma cuu man ma bimiyo anyong’a i iwa kende ngo ento i i Yehova bende.
1. Wacikara nineno cuu lembang’o ka wabeng’iyo kit galuwang’ moko?
I saa peri mi yom, ibed imaru itim ang’o? Jumoko gibed gimaru gibed kendgi i pacu pi nisomo piny, niwinjo mizik, nineno film, kunoke nilenjo i internet. Jumange ke gimaru migi nitimo lembe moko karacelo ku jurimbgi, calu ve nirieyo kumgi, niliewo kaka ma tung’ tung’, nikwang’, nigoyo mupira, dam, kart, kunoke tuko mange. Nik’ebed wamaru kit galuwang’ne ma kani de, wacikara nineno cuu ka nyo ‘enyayu mutoro i Rwoth.’ (Juefeso 5:10) Lembe maeni pire tek dit pilembe jambnambu ma pol mi ng’om maeni upong’ ku lembe ma Yehova udagu, calu ve rop, lembsasa mi tarwang’, kunoke lembe mi tipo m’ucido. (Som Zaburi 11:5.) Dong’ ang’o ma copo konyowa kara wang’ii galuwang’ mwa ku rieko?
Ka jurimbwa gitie dhanu m’umaru Yehova, gibibedo kud atelatela ma beco i wiwa man gibikonyowa kara wang’ii kit nambu ma cuu. Calu ma waneno i ponji mi 48, ng’atu ‘m’ubewotho ku jurieko, bibedo riek.’ Ento, ka nja de wabed wadikara mwa ku dhanu m’umaru ngo cik pa Mungu, lembe bitimowa ma rac.—Lembrieko 13:20.
2. Pirang’o pire tek nia wang’ey wend saa ma wabitimo i galuwang’ne?
Kadok nambu ma wang’iyo utie rac ungo de, wacikara nibedo ku wang’wa kara kud watim saa ma lee akeca i iye. Kan ungo, ecopo camu kum saa mwa mi lembe ma pigi tek akeca, ma ke Biblia ubekwayuwa nia watii “ma ber mandha ku saa [mwa].”—Som Juefeso 5:15, 16.
MED NYANG’ PERI
Wakenen kawoni kite ma waromo ng’iyo ko galuwang’ mwa ku rieko.
3. Ur cen galuwang’ ma cuu ngo
Pirang’o wacikara ning’iyo galuwang’ mwa cuu mandha? Nen VIDEO, man i ng’eye wuwec iwi penji m’ulubo e:
Tuko mir ali ma con jubed jutuko i Roma urombo nenedi ku galuwang’ moko mi rundi ma tin eni?
I video maeni, Danny unwang’u ponji ang’o i kum lembe m’uneno galuwang’i?
Som Jurumi 12:9, man wuwec iwi penji m’ulubo e:
Verse maeni ucikere nikonyowa nenedi ka wabeng’iyo kit galuwang’ moko?
Yehova udagu lembe moko ma kani? Som Lembrieko 6:16, 17 man Jugalatia 5:19-21. I ng’ei somo verseman, wuwec iwi penji m’ulubo e:
I kind lembe ma jukwanu i verse maeni, moko ma kani m’upong’ bende i galuwang’ mi rundi mwa eni?
Pi ning’iyo galuwang’ ku rieko
Penjiri kumae:
Etie ang’o? Nyo galuwang’ne utie i iye ku lembe moko ma Yehova dagu?
I saa ma kani? Nyo ebimvoro kum saa para mi lembe ma pigi tek nisagu?
Ku ng’agi? Nyo ebiketho abibedikara akeca kunoke nja ku dhanu m’umaru ngo Yehova?
Pi nigwoko kwo mwa, etie ber magwei nicoro ngo dri dri i kum ariti kunoke uwic. Kumeno bende, ukwayu wabed bor akeca ku galuwang’ moko ci ma waneno nia copo bedo cuu ungo piwa
4. Tii ku saa peri ku rieko
Nen VIDEO, man i ng’eye wuwec iwi penji m’ulubo e:
Kadok umego mi video maeni ubino neno ngo piny ma rac de, re tiyo ku telefon akeca ubedo ku matoke ma kani ma rac i wiye?
Som Jufilipi 1:10, man i ng’eye wuwec iwi penji m’ulubo e:
Verse maeni copo konyowa nenedi ning’iyo wend saa m’ukwayu watim iwi galuwang’ kunoke nambu?
5. Ng’ii galuwang’ ma cuu
Kadok galuwang’ moko foyo ngo i Yehova de, re mange nuti dupa ma lund nyayu mutoro i iye. Som Eklizia 8:15 man Jufilipi 4:8, man i ng’eye wuwec iwi penji m’ulubo e:
In imaru galuwang’ moko ma kani ma cuu?
Icopo njoyo kwo ku galuwang’ man nambu ma cuu
DHANU MOKO BEYERO KUMAE: “Kadok abeneno tuko kunoke film m’utie i iye ku rop, lembsasa mi tarwang’, man lembe mi tipo m’ucido, ma re abetimo ngo lembene atima, eca tie rac ungo.”
In ke iromo yero ang’o?
I ADUNDO
Yehova ubemito wang’ii man wanjoy kwo ku kit galuwang’ kunoke nambu ma cuu man ma foyo iye.
Penji mi poyowic
Jukristu gicikiri niuro cen kit galuwang’ ma nenedi?
Pirang’o ukwayu wanen cuu nia wabitimo saa adi i galuwang’ kunoke nambu?
Pirang’o ukwayu wang’ii kit galuwang’ ma nyayu mutoro i i Yehova?
TIM SAYUSAC
Nen nia ng’a m’ucikere ning’iyo iwa kit galuwang’ ma cuu.
“Nyo Jumulembe pa Yehova gikwero film, buku, kunoke wer moko?” (Thiwiwec mi jw.org)
Nen gin ma romo konyi ning’iyo galuwang’ kunoke nambu ma cuu.
“Nyo galuwang’ peri utie ku bero iri?” (Otkur ma wiw, nindo 15, dwi mir 10, 2011, mi français)
I kpawa ma thiwie tie “Atuc kadok niweko adegi m’abino ko i kum jumange,” nen gin m’uketho jalwo moko ugam uloko kit galuwang’ pare.
Kenen gin m’ukonyo mego moko nimaku yub mi rieko iwi film m’uweco iwi lembe mi pajogi.