KETH DHANU UDOK JULUB
PONJI MIR 10
Miyiri
Cik mir ukungu: “Wabino ayika nirweyo iwu lembanyong’a pa Mungu kende ngo, ento nimiyo bende kwo mwa ngi piwu, pilembe wudoko ju ma kacwinywa.”—1 Thes. 2:8.
Gin ma Yesu utimo
1. Nen VIDEO, kunoke som Yohana 3:1, 2. I ng’eye dwok wang’ penji m’ulubo:
Copere nia pirang’o Nikodem ung’iyo nicidho i bang’ Yesu ku diewor?—Nen Yohana 12:42, 43.
Yesu unyutho nenedi nia emiyere pi niketho dhanu udok julubi?
Ponji ma wacopo nwang’u
2. Wanyutho nia wamaru dhanu nwang’u wabemiyara pi nikonyogi gidok julub.
Lub lapor pa Yesu
3. Ponj Biblia ku ng’atini i saa man i kabedo m’efoyo. Eromo ng’iyo nindo kunoke saa ma segi. Nyo eromo winjere ma ber kan ebeponjo Biblia i kaka tic, i pacu pare kunoke kaka ma dhanu bepong’ i iye? Ka copere, yik i program peri uromb ku yeny pare.
4. Wor program mi ponji. Kan ibibedo mbe, kud irany ponji. Ento penjiri kumae:
Nyo aromo telo ngo wi ponjine i nindo mange m’i kind yenga?
Nyo aromo telo wi ponjine ku telefon kunoke ku yore mi video?
Nyo aromo kwayu ngo jarwey mange utel wiye?
5. Rwo kara ibed ku nen ma ber. Kway Yehova ukonyi kara cwinyi kud utur i kum japonj Biblia, kadok etie ku peko mi woro program mi ponji kunoke mi tiyo ku juk mi Biblia de. (Filip. 2:13) Copere nia etie ku kite dupa ma beco; pieno rwo kara iketh wii i kum kitenegi.