Kwo para ubino nyothere magwei

KPAWA PARA:

Adongo i Los Angeles, i adhura mi Californie, i ng’om mir États-Unis, kaka ma jirani mwa ma pol jung’eyogi pi kura migi ma ginyayu ko woy i wang’ ndaki man kura mi mero. Junyodo para ubino kud awiya abusiel, an atie nyathin mir arionde.

Mama utungowa i dini uketho wadongo ni jurudini m’anganga. Ento kinde m’adoko aradu, acaku kwo kit kwo ario. Ceng’ yenga abed awer i kind juruwer mi kanisa. Ento i nindo mange m’i kind yenga, abed atimo para tic pa cidho i nambu, mero, man timo sasa mi tarwang’.

Lembe ubed uton i iya piyo man abino ku ng’eicwiny ma lake tek. Abed atiyo ku jamlwiny moko ci ma cinga maku pi nivoyo jumange. Gin ma jubed juponjo iwa i kanisa de ukonya ngo. Abed ayero kumae: “Culo kwor utie pa Rwoth man an ke atie jamtic m’ecopo tiyo ko!” Kinde m’abino i somo mi diere i kind oro 1960, ungu moko ma julwong’o Black Panthers utelo nen para lee pilembe gibed ginyego i kum twero mi nyithi ng’om. Pieno, amondo i dikiri moko mir awiya mi somo ma gibeii pi twero mi dhanu. Saa moko wabed wanyayu woy m’uketho jubed jutwiyo dhu otkalasi pi nindo moko.

Anwang’u ve nyayu yakini uberomo ngo wang’a uketho amondo i timo mi nek pir adegi m’ubino i iya. Ku lapor, lembuno uketho an karacelo ku jurimba wabed waneno filme m’ubenyutho can ma nyithindh afrika ubed uneno con kinde ma gibino ng’eca i États-Unis. Masendi mi mananu maeno ubed unyayu ng’eicwiny lee i iwa, uketho wacaku fodo aradu ma mundu ma wabeneno kugi filmene. I ng’eye, wabed wacidho i pacu mi jirani mwa mange ma gitie mundu pi nicisayu dhanu mange dupa kara wafodgi.

Nitundo m’abedaru ko dong’ dongo para, nwang’u dong’ an kud umego para mange watimo racu lee dit. Wabed wawinjara ngo ku Polisi. Umira acel ma nyanok ubino i ungu moko ma pigi ng’eyere lee e an de amondo i kindgi. Kwo para ubino nyothere magwei.

KITE MA BIBLIA ULOKO KO KWO PARA:

Jarimba moko ubino nuti; junyodo pare ubino Jumulembe pa Yehova. Gilwong’a nia acidhi i coko migi e agam ayiyo. I acaki ci aneno wang’acel nia Jumulembe pa Yehova gikoc ku jumange. Ng’atuman ubino ku Biblia man ewotho tiyo kude i saa pa coko. Kadok aradu de ubino miyo korolembe i cokone. Ebino ira lembe mi zungo lee dit niponjo nia karaman nying’ Mungu utie Yehova, man niwinjo kite ma jubetiyo ko kude. (Zaburi 83:18) Dhanu m’i ng’om ma tung’ tung’ ubino nuti i cokirine, re unen kamaleng’ nia gibino mbe kud akoya koya mi rangi nyanok de i kindgi.

Ku kwong’a akeamaru ngo niponjo Biblia ku Jumulembe, ento amaru nicidho i coko migi. Uthieno moko kinde m’acidho i coko mi Jumulembe pa Yehova, Jurimba ma wabed wawotho wakugi gicidho i nambu. Kuca giwok gifodo aradu moko nitundo ginege pilembe ejai igi kinde ma gibemayu Jaket pare. Urwonde, gicaku yungiri pi nek m’ukadhune. Kinde ma juterogi i wang’ cik, giparu de ngo nia lembe ma gitimone ubino lembe ma lee. Ju ma pol m’i kindgi jung’olo nia gibibedo i kol i kwo migi zoo. Anyong’a nega lee pilembe abino mbe i kindgi i diewor maeca. E anwang’u nia kwayu awil kwo para man acaku ponjo Biblia.

Calu ang’iyo lee ku lembe mir akoya koya mi rangi, alund aneno lembe moko m’uwang’u iya lii i kind Jumulembe pa Yehova. Ku lapor, kinde ma Jamulembe pa Yehova moko ma jamundu ucidho i woth ma bor, eweko awiya pare i bang’ juruot moko ma gitie ucol. Bende, juruot moko ma gitie mundu gilwong’o aradu moko ma tie ucol udwogo i bang’gi pilembe ebino ku yeny mi kaka m’ecopo kwo i iye. Lembuno uketho anyang’ nia Jumulembe pa Yehova gibetiyo andha ku wec pa Yesu ma nwang’ere i Yohana 13:35 m’uyero nia “Ni kum lembe maeni dhanu ceke bing’eyo nia wu julubna, tek wumeruru i kindwu.” E anyang’ nia adaru nwang’u umego ku nyimego mandha.

Nikadhu kud i ponji mi Biblia, acaku nyang’ nia ukwayu alok paru para. Ugam ukwayere nia alok kite m’aparu ko lembe, uketho acaku timo ngo lembe ku kwiyocwiny kende, ento bende acaku neno nia karaman eno re m’utie ayi ma ber mandha m’ukwayu akwo ko. (Jurumi 12:2) E nok nok, atimo mediri. Alimo batizo i dwi mi kwong’o i oro 1974, e adoko acel m’i kind Jumulembe pa Yehova.

Kadok i ng’ey m’alimo batizo de, abino ku yeny mi medara asu niii i kum ng’eicwiny para. Ku lapor, nindo moko kinde ma wabecidho i tic mi rweyo lembanyong’a ot ku bang’ ot, ariemo tok jakwo moko m’ukwalu radio kud i mutukari para. Kinde m’awok ceng’ini kude, ebolo radione man eringo. Saa m’akoro ni jumange ma wabino wotho kugi kite ma radio para udwogo ko, jadit cokiri moko m’ubino i kindwa keca upenja kumae: “Stephen, ka nang’ imake nang’ itime nenedi?” Penji maeno uketho aparu lembe man ecwala nimedara asu nitimo tego pi nibedo ng’atu ma ketho kwiyocwiny.

I dwi mir apar oro 1974, acaku tic mi saa ceke. Ku bang’ dwi abed atimo saa 100 ma nwang’u abeponjo dhanu mange ku lembe m’i Biblia. I ng’eye, anwang’u kaka mi konyo tic i kabedo ma dit mi ng’om zoo mi Jumulembe pa Yehova ma nwang’ere i Brooklyn, New York. I oro 1978, agam adok i Los Angeles pi nigwoko mama m’uberemo. Oro ario i ng’eye, wagamara wakud Aarhonda ma tie dhaku para ma kacwinya. Ekonya lee mandha kinde ma wabegwoko mama nitundo ma mamane tho ko. I ng’ey nindo moko, wakud Aarhonda julwong’owa i somo mi Gilead. I ng’ey somone ke juorowa i Panama, kaka ma wabemedara nitimo tic mi misioner i iye.

Niai m’alimo batizo, anwang’ara i wang’ lembe dupa ma nwang’u copo ketho ng’eicwiny para opo. Aponjo kadok niringo aringa zoo de tek ng’atu moko ubesaya ku rop; abed aii nikwiyo wi lembene i ayi mange. Dhanu ma pol ubed ufoya, uketho i iye min ot para pi kite m’abed ayiko ko lembe ma nwang’u copo nyayu ng’eicwiny i iya. Kadok an gira de lembene wang’u iya lii! Kan atimo aloka loka maeno ceke, utie ngo ni kum tego para gira, ento etie gin m’ubenyutho nia andha Biblia re m’utie ku tego mi loko kwo pa dhanu.​—Juebrania 4:12.

BERO M’ANWANG’U:

Biblia unyutho ira thelembe mi kwo para man eponja nidoko won kwiyocwiny m’andha. Dong’ afodo ngo ng’atu moko acel de ento akonyogi ninwang’u yotkum i thenge mi tipo. Aponjo kadok Biblia ku ng’atu moko ma wabed wawinjara ngo wakude i somo! I ng’eye kinde m’adong’ elimo batizo, wadwog wakwo wakude i ot acel pi nindo moko. Tin dong’ watie jurimo ma ceng’ini. Nitundo kawono, an waku min ot para wakonyo dhanu ma kadhu 80 ma waponjo kugi Biblia man gin ceke gidoko Jumulembe pa Yehova.

Adwoko foyofoc lee mandha ni Yehova pilembe emiyo ira kwo ma ber man kwiyocwiny karacelo kud umego ku nyimego m’andha m’i wang’ ng’om zoo.