Tuige Imani Yao (Walub yioyic migi)
1. Niai i yenga mi nindo 19, dwi mir 10, wabicaku niponjo buku makani i Ponji mi Biblia mi cokiri?
1 Niai i yenga mi nindo 19, dwi mir 10, oro 2015, wabicaku niponjo buku Tuige Imani Yao (Walub yioyic migi) i Ponji mi Biblia mi cokiri. Buku maeno ukoro uda mi Biblia iwi dhanu 14 ma co ku ma mon ma gibino weg yioyic. Jukiewo buku maeno i kite ma, kinde ma wabesome, wasome ve wabeneno dhanunegi, eno konyowa nineno i paru mwa kite ma dhanu maeno gigam ginyego ko ku peko ma tung’ tung’ kinde ma gibino nitimo ni Yehova. Bukune uwodho ponji ma tung’ tung’ niai ikum uda mi dhanu maeno, pi nikonyo ng’atuman i kindwa unen kite m’ecopo tio ko ku ponjine i kwo pare en gire tin eni.—Ebr. 6:12.
2. Kekor lembe moko ma nwang’ere i buku Tuige Imani Yao.
2 Lembe ma nwang’ere i ie: I buku maeno, junwang’u leni ma juriedo pi ninyutho oro ma tung’ tung’ m’ulwobere, man kart, pi nikonyowa wang’ei nia ng’atuman ukwo awene man kani. M’umedo maeno, wicman utie ku sanduku ma thiwie tie, “Mambo ya Kukumbuka. . . (Lembe m’ukwayu wapoi i kume),” ma bikonyowa ninyamu i uda ma jukoro man nitio ku ponji ma wanwang’u. I buku maeno, junwang’u bende cal ma tung’ tung’ ma jukubo ku rangi mabeco, ma jukubo cuu mandha, man ma jutimo sayusac lee i wigi, kara ukonywa wabed ku paru iwi uda ma jukoro.
3. Wacopo timo ang’o kara wanwang’ kony ikum ponji mi buku maeno?
3 Gin ma wacopo timo kara wanwang’ kony ikum ponji mi buku maeno: Waraga m’uai i Guriri m’utelowic ma nwang’ere i acaki mi buku maeno uketho cwinywa ku wec mae: “Tii ku paru peri; bed ve ng’atu m’ubewinjo, m’ubeneno, m’ubeng’wio, man m’ubemulo kum piny m’esomo. Tim kero niwinjiri kite ma dhanu ma jukoro uda migi gibed giwinjiri ko, man nineno gin ma gineno. Pim nineno nia gitimo ang’o i lembe moko ma gigam ginwang’iri i ie man ipore ku gin ma nwang’u in giri icopo nitimo ka nwang’u ubino in.” Re, nitio ku paru mwa, thelembene tie ngo nibeparu kadok lembe m’umbe, ento tie nineno uda maeno ma Mungu uyuyo en i wie i paru mwa, man nikethara i kaka dhanu ma tung’ tung’ ma jukoro pigi. Timo kumeno, ubekwayu saa lee man nyamu i lembe cuu. (Neh. 8:8) Ka lembe ma jubiponjo cing’ nica ucaku i diere mi wic (sura) moko, jatel wi ponji bicaku ku poyowic ma nyanok, pi segonde 30 nicidho i 60, iwi lembe ma jular juponjo nindo m’ukadhu. Ka lembe ma jubiponjo cing’ nica umbe ku thenge “Mambo ya Kukumbuka . . . ,” jatel wi ponji copo penjo penji acel kunoke ario mi poyowic pi dolo dhu ponji.
4. Pirang’o ukwayu waponj buku Tuige Imani Yao?
4 Wabekwo i ng’om m’usayu kubang’ ceng’ ninyotho kunoke nijwigo yioyic mwa i kite ma tung’ tung’. Buku maeni ucungo iwi thiwiwec marom m’ugam ulwobere i gazeti La Tour de Garde (Ot Kur ma Wiw) m’ubed uwok oro moko m’iwang’e. Buku ku gazetine ceke tie giramia ma Yehova umio pi niteng’o yioyic mwa. (Yak. 1:17) Kara wanwang’ kony lee ikume, wek wabed wacokara njaa i Ponji mi Biblia mi cokiri, man ka copere, wabed wadikara i wec saa mi ponji mi buku maeni karacelo!