Kite mi ponjo ku nyathibuku Lembanyong’a
1. Jukiewo nyathibuku Lembanyong’a pi thelembe makani?
1 Calu ma jular junyutho i Tic Mwa mi Ker mi dwi mir 7, nyathibuku Lembanyong’a m’Uai I Bang’ Mungu! tie jamtic acel ma pire tek ikind jamtic mange ma watie ko i sanduku mwa mi jamtic mi ponjo Biblia ku dhanu. I ie, junyutho giragora ma tung’ tung’, ento jukiewo ngo wec mi igi, eno kara ukony juwinj mwa gifoy niponjo lembe wang’ acel niai kud i Biblia en gire. Jemni mwa ma tung’ tung’ ma wabed watio ko pi ponji, jukiewogi i ayi ma ng’atu m’ubesome copo nyang’ i ie en gire kadok m’umbe kony pa ng’atu mange; ento nyathibuku maeni jukiewe kara ng’atini uponje ku kony pa japonjo moko. Pieno, ka wabemie ni ng’atini, wacikara niponjo kude pi dakika moko nyanok pi ninyutho kite ma jubed juponjo ko nyathibuku maeno; eno bikonyo jawinj mwa kara enwang’ mutoro mi ponjo lembanyong’a niai kud i Biblia.—Mat. 13:44.
2. Wacopo tio nenedi ku nyathibuku Lembanyong’a ka watundo ibang’ ng’atini wang’ ma kwong’a?
2 Kan itundo ibang’ ng’atini wang’ ma kwong’a: Icopo yero ire kumae: “Abino keni pilembe dhanu dieng’ akeca iwi kit kwo mi ng’om matin. Iparu nia nindo m’ubino, kwo biyikere bidoko maber dee? [Wek ecul wang’e.] Biblia utie ku lembanyong’a ma copo niketho wabed ku genogen. I nyathibuku maeni, junwang’u penji dupa ma Biblia udwoko wang’gi.” Mii nyathibukune icing’ jawinj, man kwaye eng’ii penji acel ikind penji ma nwang’ere ing’ei nyathibuku maeno. Ing’eye, ponj kude udukuwec mi kwong’o mi thiwiwec m’eng’iyone pi ninyutho ire kite ma wabed waponjo ko Biblia ku dhanu. Kite mange m’iromo timo tie nipenjo jawinj ku penji moko ma telo nen pare, penji m’ucungo iwi thiwiwec m’ing’io in, man ing’eye ninyutho ire kite ma nyathibuku maeno copo nikonye ko kara enwang’ dwokowang’ penjine niai kud i Biblia. Ka video moko tie i jw.org m’urombo ku thiwiwecne, jurwei moko ginyutho videone i saa mi ponji.
3. Kekor kite ma jutelo ko wi ponji ku nyathibuku Lembanyong’a.
3 Kite mi telo wi ponji ku nyathibukune: (1) Som penji ma tung’ tung’ ma jukiewo ku rangi macol akeca man ku namba i wang’gi; jukiewogi pi nikonyo jawinj kara wie umak paru madit. (2) Som udukuwec ma nwang’ere i the penjine. (3) Som verse ma jukiewo ku gor m’uvuto avuta; man ku riekowang’, penj jawinj ku penji moko pi nikonye enen kite ma versene udwoko ko wang’ penji mi rangi macol akeca. (4) Tek udukuwec mange fodi utie i the penji mi rangi macol akeca, tii kendo ku lembe mir 2 ku mir 3. Ka video moko m’urombo ku penjine nuti, ma re fodi inyutho ngo ni jawinj, nyuthe ire ikind ponji mwu. (5) Pi nidaru, dok ipenj jawinj ku penji ma jukiewo ku rangi macol akeca pi ning’eyo nia nyo enyang’ i ponjine.
4. Ang’o ma bikonyowa nitio ku bodho ku nyathibuku maeno ma pire tek?
4 Tim kero ning’io ku jamtic maeni ma pire tek. Tii kude saa moko ci ma copo nicopere. I wang’ ponjiman, kepar pi ng’atu m’iponjo kude Biblia, man par pir ayi moko maber akeca m’icopo ninyamu lembe kude nikadhu kud i verse ma tung’ tung’ ma nwang’ere i thiwiwec ma wubiponjo. (Rie. 15:28; Tic 17:2, 3) Kan imediri nitio ku nyathibuku maeno man nimedo bodho peri, icopo nineno cuu nia kara andha, nyathibuku maeno tie acel m’ikind jamtic ma pigi tek akeca, m’ukwayu itii ko pi ponjo dhanu ku lemandha!