Walub lapor mi jubila—Habakuk
1. Pirang’o wacopo yero nia rundi ma wabekwo i ie urombo ku rundi ma jabila Habakuk ukwo i ie?
1 I ng’om maeni ma wabekwo i ie, timo man lembe ma reco ubemedere ameda. Pieno, wacopo nipenjara ku penji ma rom ma Habakuk upenjo ko Yehova: “Inyutho dubo ira nedi, man ineno wi [niwacu, ibeweko] camu co?” (Hab. 1:3; 2 Tim. 3:1, 13) Ka wabenyamu i lembila pa Habakuk man lapor pare mi yioyic, eno copo konyowa kara wacung ma tek nwang’u wabekuro ko nindo mi pokolembe pa Yehova.—2 Pet. 3:7.
2. Tin, wacopo nyutho nenedi nia wabekwo ku yioyic?
2 Wakwo ku yioyic: Kakare nidieng’ akeca iwi timo man lembe ma reco m’ubino nitimere, jabila Habakuk umedere nibedo ku wang’e i tipo man nitimo tic mi tipo kud amora. (Hab. 2:1) Yehova uketho cwiny jabila maeno nia, lembe m’eng’olo bitimere tap i nindone, man nia “won bedopwe bibedo [niwacu, bikwo] nikum yioyic pare.” (Hab. 2:2-4) Lembe maeno tie ku thelembe ang’o iwa wa Jukristu ma wabekwo i nindo ma tokcen magwei mi dhu ajiki? Lembe ma pire tek utie ngo ning’eyo nia ajiki bibino awene, ento tie ning’eyo nia ebibino andha. Yioyic cwaluwa wamedara nibedo ku wang’wa man niketho tic mi rweyo lembanyong’a i kabedo ma kwong’a i kwo mwa.—Ebr. 10:38, 39.
3. Pirang’o ukwayu wamedara nibedo kud anyong’a i tic pa Yehova?
3 Anyong’a negwa lee nikum Yehova: Saa ma Gog mi Magog bisayu ali ibang’ dhanu pa Yehova, yioyic mwa binwang’u amulaic. (Eze. 38:2, 10-12) Lwiny kelo peko dupa, kadok ikum dhanu ma giloyo lwinyne bende: Cam copo jwik, jucopo rwinyo piny ma jutie ko, man kwo de copo doko tek. Wabitimo ang’o kinde ma peko ma tung’ tung’ bitundo i wiwa? Habakuk ular ung’eyo nia peko ma tung’ tung’ biwok, pieno emaku yub m’ukwayu emedere ko nitimo ni Yehova kud anyong’a. (Hab. 3:16-19) Wan bende, “Anyong’a pa Yehova” bikonyowa niciro amulaic mi nindo m’ubino.—Neh. 8:10; Ebr. 12:2.
4. Wacopo nwang’u anyong’a ma kani tin man i nindo m’ubino?
4 Dhanu ma Yehova bibodhogi i nindo pare mi pokolembe m’ubino, gibimediri ninwang’u ponji ma bikonyogi kara gimediri niwotho i yo pa Mungu mi kwo. (Hab. 2:14) Dhanu ma gibicer bende gibiponjo lembe iwi Yehova. Kadok tin bende, ukwayu waii nitio ku kaka ceke m’umiire iwa pi niyero pi Yehova man pi tic pare ma wang’u ijo ni dhanu mange!—Zab. 34:1; 71:17.