Wular wupot kindwu wukud umeru​—Nenedi?

Kepar nia ibekwo i Galilaya i rundi pa Yesu. Ibecidho i adhura mi Yerusalem pi nikwiro Agba mi otbak. Adhurane upong’ ku dhanu mange dupa ma giai bor, gibino bende niworo Mungu. Ibemito iwok imi lam ni Yehova. Pieno, ku diel peri, icaku woth i kind dhanu mange dupa, ma gibecidho bende i hekalu. Kinde m’itundo, inwang’u hekalu upong’ ku dhanu ma gibemito bende nimio lam migi. I ng’eye, saa utundo m’ubekwayu imi bende diel peri i bang’ julam. E wang’ acel, igam ipoi nia umeru ma copo nwang’ere kaka moko i kind dhanu keca kunoke i adhura, utie ku lembe moko i kumi. Yesu ukoro lembe m’icikiri nitimo i saa maeno. (Som Matayo 5:24.) Wuromo ketho kwiocwiny i kindwu nenedi wukud umeru calu ma Yesu ung’olo? I kind lembe ma jurieyo piny e i unguman, keth alama i dhu dwokowang’ m’atira.

ICIKIRI . . .

• niweco kud umeru kende kende kan ibeparu nia ikoso ire andha

• nipimo twinyo paru p’umeru kan ibenwang’u nia emedo kor lembe ameda, kunoke nia en bende etie ku theng kosane moko

• niwinjo umeru m’umbe ning’olo dhoge kinde m’ebeweco, man kadok inyang’ ungo akeca de, nikwayu kisa ku cwinyi ceke pi lembe m’uton i ie kunoke pi lembe m’uwok ma ke nwang’u imito ngo nia uwoki kumeca

UMERU UCIKERE . . .

• nikoro lembe m’uwok i kindwu ni dhanu mange i cokiri kara gicwake

• nitang’ kudi, nidok i wi lembe ceke m’ukadhu, man nidiyi nia iyi kosa peri

• nineno kit jwigiri man amora m’inyutho pi nicidho i bang’e, man nitimo iri kisa ku cwinye ceke

Kadok nia tin wabed wamio ngo lei i thier mwa, re lembe ma Yesu uponjo romo konyowa nenedi ninyang’ i winjiri m’utie i kind nibedo ku kwiocwiny kud umego mwa man nitimo thier ma foyo i Mungu?