‘Paulo ufoyo Mungu, man cwinye doko tek’

Kinde m’umego mi cokiri mi Roma giwinjo nia Paulo ubebino, gicokiri i udul pi nicirombo kude i yo, i kilometre ma romo 64. Mer ma ginyutho ubino ku matoke ma kani iwi Paulo? Biblia uwacu nia saa ma Paulo “neno joni, efoyo Mungu, man cwinye doko tek.” (Tic 28:15) Ugam ung’eyere nia Paulo ubed utielo cwiny cokiri m’ebeliewo; re saa ma jutwiye, en re m’ebino ku yeny mi tielocwiny.​—2Ko 13:10.

Tin bende, juliew mi twodiri giliewo cokiri ma tung’ tung’ pi nitielo cwiny umego ku nyimego. Re calu Jukristu mange, gin bende saa moko ginwang’u olo, cwinygi pido, man cwinygi tur. Nindo macen ka jaliew giku min ot pare gibibino liewo cokiri mwu, icopo timo ang’o pi nikonyogi kara ‘wujukuru’ i kindwu?​—Rm 1:11, 12.

• 

  Dikiri i coko mi rweyo lembanyong’a. Juliew ginwang’u kethocwiny ka jurwei gibetimo kero pi nidikiri cuu i program mi yenga m’eliewo ie cokiri. (1Ts 1:2, 3; 2:20) Icopo pangu nitimo tic pa jayab yo ma jakony i dwi m’ebiliewo ie cokiri. Nyo icopo kwayu irwei kude kunoke ku dhaku pare, kunoke nyo wucidh wuliew kugi japonj Biblia peri? Anyong’a negogi ka giberweyo ku jurwei ma tung’ tung’, uketho i ie jurwei ma nyen kunoke m’umbe ku bodho akeca i tic mi lembanyong’a.

• 

  Jolgi. Nyo icopo mio igi cam kunoke ot ma gibed i ie? Kan itimo kumeno, gibineno nia andha imarugi. Gikwayu ngo jutim igi lembe dupa.​—Lk 10:38-42.

• 

  Winj juk man wor telowic m’emio. Ku mer, jaliew mi twodiri konyowa kara wamed bodho mwa i tic pa Yehova. Saa moko gicopo mio juk ma gbee. (1Ko 5:1-5) Ka wabenyutho woro man wabejwigara ire, lembene nyayu anyong’a i ie.​—Eb 13:17.

• 

  Nyuth foyofoc. Nyuth ni jaliew mi twodiri man ni dhaku pare nia ibefoyo ku miiri migi. Icopo yere igi ku dhogi kunoke icopo kiewe igi akiewa.​—Kl 3:15.