Ayi m’icopo tio ko ku trakt pi nicaku wec

Niai i dwi mi 1 mi oro 2018, dend Buku mi coko mi Kwo man tic benyutho kite ma tung’ tung’ ma wacopo weco ko ku dhanu. Jamiru mandha man ma riek ubetielo cwinywa nia lembakeca mwa ubed niweco ku dhanu, ento ungo kende kende nimio igi girasoma. Pi nikonyowa kara wayik i bodho mwa, kite ma waromo weco ku dhanu ma wabed waneno i video nyutho iwa ayi ma wacopo caku ko wec ku dhanu ma nwang’u wabetio ku Biblia kende. Nyo eno nyutho nia kwayu ngo wamii girasoma ni dhanu kinde ma waberweyo lembanyong’a ot kubang’ ot? Ungo! Ku lapor, trakt copo konyowa lee dit nicaku wec ku dhanu. Pi nitio cuu ku traktne, wacopo timo lembe m’ulubo e:

1. Penj penji ma dit ma nwang’ere i ng’ei trakt, man kwai jawinj umii paru pare.

2. Nyuth gin ma Biblia udwoko i giragora ma nwang’ere i thiwi mbaya mir ario. Ka saa nuti, som lembe moko ma jukoro i die i traktne man wuwec i wie.

3. Mii trakt ni jawinj, man kwaye nia edog esom dong lembe mange i saa m’emaru.

4. I wang’ niweko jawinj, nyuth ire penji ma ni thenge m’uwacu “Icopo nipenjiri kumae,” man nyuth ire nia wubiweco iwi gin ma Biblia udwoko ma cen.

Saa m’idwogo, wuwec iwi gin ma Biblia dwoko, man wek penji mange ma wubiweco i wie ma cen. Icopo ng’io penji moko mi girasoma ma junyutho i mbaya ma tokcen mi traktne kunoke mi kusika mwa mir Internet. Ka wang’e nen, cak ponjo kude nyathibuku Lembanyong’a m’uai i bang’ Mungu! kunoke girasoma moko mange ma nwang’ere i sanduku mi jamtic mi ponjo Biblia ku dhanu.