Wacopo kwo rondo ku rondo

1. Ninyamu i lembe iwi lembang’ola pa Yehova bedo kud adwogi ma kani i wiwa?

YEHOVA ung’olo nia ju ma gibewore gibinwang’u “kwo ma rondo ku rondo.” (Rum. 6:23) Ka wabenyamu i lembe iwi gin ma Yehova ubemiyo iwa, andha mer ma wamare ko doko tek. Kepar lembe ma e: Wegwa m’i polo umaruwa lee mandha uketho emiyo iwa giramiya maeno kara kindwa kud ukoyere nyanok de kude.

2. Lembang’ola mi kwo ma rondo ku rondo konyowa nenedi?

² Lembang’ola mi kwo ma rondo ku rondo ma Mungu ung’olo, konyowa niciro peko mwa tin. Kadok nwang’u judegi mwa gibesendowa i dhu tho ngi, wabiweko ngo nitimo ni Yehova. Pirang’o? Thelembene acel utie nia wang’eyo nia ka watho ma wagwoko bedoleng’ mwa ni Yehova, ebiketho wabicer ku genogen ma dong’ wabitho ko ngo kendo. (Yoh. 5:28, 29; 1 Kor. 15:55-58; Ebr. 2:15) Pirang’o wacopo bedo ma cwinywa tek nia ecopere iwa nikwo rondo ku rondo? Wakenen thelembene moko.

YEHOVA KWO RONDO KU RONDO

3. Pirang’o wacopo bedo ma cwinywa tek nia Yehova utie ku copo mi ketho wakwo rondo ku rondo? (Zaburi 102:12, 24, 27)

³ Wang’eyo nia Yehova tie ku copo mi ketho wakwo rondo ku rondo, pilembe etie acaki mi kwo man ekwo nja ku nja. (Zab. 36:9) Wakenen giragora moko mi Biblia m’ubenyutho nia Yehova unuti saa ceke, man nia ebibedo pi nja. Zaburi 90:2 uyero nia Yehova ubedo nuti “ugambre rondo ku rondo.” Zaburi 102 de uyero lembe ma rom. (Som Zaburi 102:12, 24, 27.) Jabila Habakuk de ukiewo pi Wegwa m’i polo kumae: ‘In inuti ugambre nja ngo, E Yehova Mungu para, Ng’atu Maleng’ para? [“Itho ngo,” NWT.]’​—Hab. 1:12.

4. Kan etie tek iwa ninyang’ nia Yehova kwo rondo ku rondo, nyo eno copo ketho wabedo ku jiji i wiye? Kekor.

⁴ Nyo etie tek iri ninyang’ nia Yehova “bedo rondo ku rondo”? (Isa. 40:28) Dhanu mange de dupa ginwang’u nia lembene tek igi. Elihu uwacu pi Mungu kumae: “Wel rundi pare yenjre ngo.” (Yob 36:26) Re eno nyutho ngo nia ka wanyang’ ungo i lembe moko ci, ya lembene tie vupo. Ku lapor, kadok wanyang’ ungo i ayi ma kura wodho ko mac, nyo eno nyutho nia macne umbe? Ungo nyanok de! Kumeno bende, wa dhanu wacopo nyang’ ungo i thucne ayi ma Mungu tie ko rondo ku rondo man m’ebibedo ko rondo ku rondo. Re eno nyutho ngo nia Mungu kwo ngo rondo ku rondo. Lemandha iwi Jacwic ujengere ngo iwi gin ma wacopo nyang’ i iye kunoke ngo. (Rum. 11:33-36) Ecaku bedo nuti niai con ma fodi polo ku ng’om ma wabeneno e de gimbe, uketho i iye ceng’ ku nyikaluku. Wang’eyo nia Yehova re ‘m’utimo ng’om ku tego pare.’ Eyo, ebedo nuti ma fodi “erieyo [ngo] polo.” (Yer. 51:15; Tic. 17:24) Lembang’o mange ma copo ketho cwinywa bedo tek nia waromo kwo rondo ku rondo?

JUCWIYOWA KARA WAKWO RONDO KU RONDO

5. Adamu giku Eva gibino ku genogen ma kani?

⁵ M’uweko dhanu, piny mange ceke ma kwo ma Yehova ucwiyo, utie ngo pi nikwo rondo ku rondo. Ento emiyo genogen mi kwo ma rondo ku rondo ni dhanu kende. Re kadok kumeno de, Yehova ung’olo ni Adamu kumae: “Yen mi ng’eyong’ec mi gin ma ber ku gin ma rac, kud icam nyinge moko: kum i ceng’ m’ibicamu nyinge moko ci e ibitho andha.” (Tha. 2:17) Ka nwang’u Adamu giku Eva giworo dwand Yehova, nwang’u githo ngo. Wacopo yero nia i ng’ey kare moko, nwang’u Yehova ubeciyiyo igi nia gicam nying’ “yen mi kwo.” Eno ubenyutho nia nang’ gicinwang’u twero i bang’e mi “kwo rondo ku rondo.”b​—Tha. 3:22.

6-7. (a) Ang’o mange m’unyutho nia jucwiyo ngo dhanu kara utho athoa? (b) Lembang’o m’ibekuro kud ava m’ibitimo i ng’om ma nyeni? (Nen cal.)

⁶ Lembe ma ber akeca utie nia, jururieko moko ginwang’u nia ung’ith mwa utie ku copo mi kanu lembe lee nisagu mi kadhiri mi oro ma wabekwo i iye tin. I oro 2010, gazeti moko (Scientific American Mind) uwacu nia copo mi kanu lembe mir ung’ith mwa utie ceng’ini ku kadhiri mi GB (jigabait) milioni 2 ku nusu. Ma ka jumaku video i wiye, jucopo nene pi saa milioni 3, niwacu oro ma kadhu 300 ka judare. Re ubenen nia eno de fodi uromo ngo i kadhiri m’ung’ith mwa kanu ko lembe. Lembuno ubenyutho nia Yehova ucwiyo ung’ith mwa ku copo mi kanu lembe lee, nisagu lembe ma wang’eyo i kind oro 70 kunoke 80 ma wakwo i iye.​—Zab. 90:10.

⁷ M’umedo maeno, Yehova ucwiyowa kud ava mi kwo rondo ku rondo. Biblia uwacu pi dhanu nia Mungu uketho “ng’om i adundegi.” (Ekl. 3:11) Eno re m’uketho waneno tho ni jakwor mwa. (1 Kor. 15:26) Ka waberemo lee, nyo wadolo cingwa wakuro kende kende saa ma wabitho i iye? Ungo. Wang’ ma pol wacidho i odiyath i bang’ dokta, man saa mange wamaku yath kara wakey. I andha, watimo tego mwa ceke kara timba kud watho. Bende, ka ng’atu moko ma wamaru utho, nik’ebed aradu kunoke m’utii, nyo can nego ngo cwinywa pi nindo ma lee? (Yoh. 11:32, 33) Jacwic mwa ma jamer nwang’u copo miyo ngo iwa ava man copo mi kwo rondo ku rondo ka nwang’u ekeco ngo nia wakwo pi nja. Re thelembe mange de nuti m’uketho wayiyo nia wacopo kwo rondo ku rondo. Wakenen gin ma Yehova ugam utimo con ku m’ebetimo kawoni, m’ubenyutho nia ewilo ngo lembakeca pare.

LEMBAKECA PA YEHOVA UWILERE NGO

8. Isaya 55:11 ubeponjowa ku lembang’o iwi lembakeca pa Yehova piwa?

⁸ Kadok Adam giku Eva gidubo, man gikelo tho iwi nyikwayu migi de, re Yehova uwilo ngo paru pare iwi lembakeca pare. (Som Isaya 55:11.) Lembakeca pare utie asu nia dhanu ma gigwoko bedoleng’ migi gikwo rondo ku rondo. Wang’eyo lembuno nikum lembe ma Yehova uyero man m’etimo kara epong’ lembakecane.

9. Yehova ung’olo lembang’o? (Daniel 12:2, 13)

⁹ Yehova ung’olo nia ebicero ju m’utho, man ebimiyo igi kaka mi kwo rondo ku rondo. (Tic. 24:15; Tito 1:1, 2) Yob ma won bedopwe ugam ung’eyo nia Yehova utie kud ava mi cero ju m’utho. (Yob 14:14, 15) Jabila Daniel de ugam ung’eyo nia ju m’utho bicer pi ninwang’u kaka mi kwo rondo ku rondo. (Zab. 37:29; som Daniel 12:2, 13.) I rundi pa Yesu, Juyahudi de ugam ung’eyo nia Yehova bimiyo “kwo ma rondo ku rondo” ni jurutic pare m’ugwoko bedoleng’ migi. (Luka 10:25; 18:18) Yesu ubed uweco thiri thiri iwi lembang’ola eno, man en de Won uketho ecer.​—Mat. 19:29; 22:31, 32; Luka 18:30; Yoh. 11:25.

10. Cer m’utimere yang’ con ubenyutho lembang’o? (Nen cal.)

¹⁰ Yehova utie Ng’atu m’umiyo kwo man etie ku copo mi ketho dhanu udok kwo kendo. Egam emiyo tego ni jabila Eliya pi nicero nyathin pa dhatho mi Zarefath. (1 Ub. 17:21-23) I kare moko i ng’eye, ku kony pa Mungu, Elica de ucero nyathin pa dha Cunami moko. (2 Ub. 4:18-20, 34-37) Cer maeno ku mange de, ubenyutho nia Yehova utie ku copo mi ketho ng’atu m’utho udok kwo kendo. Kinde ma Yesu ubino iwi ng’om, enyutho kamaleng’ nia Won umiyo ire copo maeno. (Yoh. 11:23-25, 43, 44) Kawoni Yesu n’i polo man jumiyo ire “dito ceke . . . i polo kud i ng’om bende.” Pieno, ecopo pong’o lembang’ola ma nia “dhanu ceke ma gin’i kabuli” bicer pi ninwang’u kaka mi kwo rondo ku rondo.​—Mat. 28:18; Yoh. 5:25-29.

11. Jamgony umiyo iwa kaka mi nwang’u kwo ma rondo ku rondo nenedi?

¹¹ Pirang’o Yehova uweko Wode m’emaru lee utho ku tho mi litho? Yesu unyutho thelembene, ewacu kumae: “Kum Mungu umaru ng’om lee mandha uketho emiyo Wode ma kulong’, kara kubang’ dhanu ceke ma tek ubenyutho yiyoyic i iye kud unyothere, ento enwang’ kwo ma rondo ku rondo.” (Yoh. 3:16) Mungu umiyo iwa kaka mi nwang’u kwo ma rondo ku rondo nikum Wode m’emiyo ni jamgony pi ruc mi dubo mwa. (Mat. 20:28) Jakwenda Paulo ukoro pi thenge mi lembakeca maeno pa Mungu, ekiewo kumae: “Calu ma tho umondo ni kum ng’atu acel, cer mi ju m’utho bende uwok ni kum ng’atu acel. Kum tap calu ma ni kum Adamu dhanu ceke ubetho, kumeno bende ni kum Kristu dhanu ceke binwang’u kwo.”​—1 Kor. 15:21, 22.

12. Ker pa Mungu bipong’o lembakeca pa Yehova nenedi piwa?

¹² Yesu uponjo julub pare nia gikway Ker pa Mungu ubin kara yeny pa Mungu utimere i ng’om. (Mat. 6:9, 10) Kud i kind lembakeca pa Mungu, moko utie nia dhanu gikwo rondo ku rondo iwi ng’om. Pi nipong’o lembakecane, Yehova uketho Wode ubed ni Ubimo mi Ker pa Masiya. Mungu ubecoko bende dhanu 144 000 ku wi ng’om, pi nitimo tic karacelo ku Yesu kara yeny pare utimere.​—Nyu. 5:9, 10.

13. Yehova ubetimo ang’o kawoni, man in ke icikiri nitimo ang’o?

¹³ Tin Yehova ubecoko “udul ma dit” man ebeponjogi nibedo lwak mi Ker pare. (Nyu. 7:9, 10; Yak. 2:8) Kadok tin ng’om upokere nikum adegi man lwiny, re “udul ma dit” maeno gibetimo tego nivoyo akoyakoya mi thek, mi suru, man adegi ceke kud i kindgi. Timo migi ubenyutho nia gidaru thiedho palamularu migi ni kwejdhiang’. (Mik. 4:3) Kakare nidikiri i lwiny m’ubenego dhanu dupa, gin gibeponjo dhanu ning’eyo Mungu mandha ku lembakeca pare, kara ginwang’ “kwo mandha.” (1 Tim. 6:19) Jumoko nyo wedi migi ubenyayu ragedo i kumgi kunoke gikoso sente pilembe gibediko cing’gi i kum Ker pa Mungu, re Yehova ubewekogi ngo, eketho gibenwang’u gin ma gitie ku yenyne. (Mat. 6:25, 30-33; Luka 18:29, 30) Lembe maeno ubenyutho nia Ker pa Mungu utie gin m’unuti andha, man nia ebimedere nipong’o lembakeca pa Yehova.

ANYIM MA BER UBEBINO I WANG’WA

14-15. Lembang’ola pa Yehova m’ebikabu ko tho mi magwei, bipong’o nenedi?

¹⁴ Kawoni Yesu utie Ubimo mi Ker pa Mungu i polo, man ebipong’o lembe ceke ma Mungu ung’olo. (2 Kor. 1:20) Niai i oro 1914, Yesu dong’ utie ku tego iwi judegi pare. (Zab. 110:1, 2) Ceng’ini eni, Yesu ku ju m’ebibimo kugi, gibitundo i ajiki mir aloci migi man gibinyotho jutimrac ceke.​—Nyu. 6:2.

¹⁵ I the bimobim mi oro elufu acel, Yesu bicero ju m’utho man ebiketho ju m’ubedo wor bidoko ku kum ma leng’ m’umbe dubo. I ng’ey amulaic ma tokcen, ju ma Yehova uneno nia giweg bedopwe ‘gibicamu ng’om ni aba, man gibibedo i ie mi nja.’ (Zab. 37:10, 11, 29) Ku bati ma ber, tho ma tie “jakwor ma tokcen” de “jubikabu woko.”​—1 Kor. 15:26.

16. Thelembe ma kwong’a m’ubecwaluwa nitimo ni Yehova utie ma kani?

¹⁶ Calu ma waneno i thiwiwec maeni, genogen mwa mi kwo rondo ku rondo ucungo ma tek iwi Lembe pa Mungu. Genogen ne copo konyowa nigwoko bedoleng’ mwa i dong’ nindo maeni ma rac. Ento pi ninyayu anyong’a i Yehova, wacikara ngo kende kende nibedo kud ava mi bedo kwo. Thelembe ma kwong’a m’uketho wabegwoko bedoleng’ mwa ni Yehova man ni Yesu, utie pilembe wamarugi lee dit. (2 Kor. 5:14, 15) Mer maeno ubecwaluwa nilubo lapor migi man nirweyo pi genogen ma watie ko ni jumange. (Rum. 10:13-15) Ka wabeponjo ni dieng’ pi jumange man nitimo igi bero, wabibedo kit dhanu ma Yehova ubemito ubed jurimbe pi nja.​—Ebr. 13:16.

17. Ng’atuman m’i kindwa utie ku ng’iyong’ic mi timo ang’o? (Matayo 7:13, 14)

¹⁷ Nyo in de ibibedo i kind dhanu ma binwang’u kwo ma rondo ku rondo? Yehova umiyo kaka mi nwang’e ni ng’atuman m’i kindwa. Wan re ma kawoni watie ku ng’iyong’ic mi wotho i yo ma terojo i kwone. (Som Matayo 7:13, 14.) Kinde ma dong’ wabekwo rondo ku rondo, kwo bibedo nenedi? Wabinwang’u wang’ penji eno i thiwiwec m’ulubo.