Mugisa ma wanwang’u i tic pa Yehova

JURUNYODO PARA GIBINO I YIYOYIC MA TUNG’ TUNG’

Junyola i oro 1934, kinde ma jurunyodo para giai kud i ng’om mi Swisse gibin gibedo i Timmins ma tie adhura ma nok i Ontario, i ng’om mi Canada. I kum oro 1939, mama ucaku somo Otkur ma Wiw man ecaku cidho bende i coko mi Jumulembe pa Yehova. Ebed eccidho kuda man awiya fwa mange abusiel. I ng’eye ke egalu ngo edoko Jamulembe pa Yehova.

Baba ugam umaru ngo lembene, ento mama umaru pare lemandha man emoko asu i kume. Kadok saa ma jukwero iye tic mi Jumulembe pa Yehova i ng’om mi Canada i oro 1940 de, mama umoko pare asu i kum lemandha, eweke ngo. Re saa ceke ebed emiyo woro ni baba kadok dhu baba ubino rac i kume de. Lapor pa mama ukonyo wan awiya pare de nijolo lemandha. Ku bati ma ber, i ng’eye timo pa wegwa de udoko ber, man ecaku kwo kudwa wa juruot pare i ayi ma cuu.

ACAKU TIC MI SAA CEKE

I oro 1950, adikara i Coko moko ma dit i adhura mi New York City, thiwi cokone ubino: “L’accroissement de la théocratie.” Wec ma waweco kud umego ku nyimego mi wang’ ng’om zoo, man lembe ma ber ma ju m’usomo Gilead gikoro, umiyo ira ava mi timo lee i tic pa Yehova! Aketho wang’ acel lembakeca mi caku tic mi saa ceke. Ndhu ndhu kinde m’adok i pacu, apong’o karatasi mi doko jayab yo ma nja. Bethel mi Canada udok ukiewo ira nia mito ku kwong’a alar alim batizo. E m’umbe galu i nindo 1, dwi mir 10, 1950 alimo batizo. Dwi acel i ng’eye ke adoko jayab yo ma nja man kabedo ma kwong’a ma juora acidh atim tic i iye ubino Kapuskasing. Adhura eno ubino bor i kilometre ma lee ku kaka m’abed abedo i iye saa maeca.

I oro 1951, Bethel ukwayu nia ju m’ung’eyo dhu Français gidok i adhura ma dit mi Québec kum yeny ubino dit kuca. Calu kinde m’abedongo agam ang’eyo weco Français kud Anglais zoo, e ajolo lwong’one pi nicitimo tic i Rouyn. Nang’ fodi ang’eyo ngo kadok ng’atu moko acel de i adhurane. Calu m’ayero i acaki, gin m’abino ko ubino kende kende adress ma jumiyo. Ku bati ma ber, lembe uwotho ber ira. Waku Marcel wadoko jurimo mituko ngo man watimo kude tic pa jayab yo ma segi kud anyong’a pi oro ang’wen i Québec.

AKURO PI NINDO MA LEE I NG’EY SOMO MI GILEAD

Kud i Québec, abedo kud anyong’a ninwang’u lwong’o mi cisomo Gilead, kalasine mi 26 i South Lansing, i New York. Wanwang’u diplom mi somone i nindo 12 dwi mir 2, 1956, man juora i Afrika ma yo reto i ng’om Ghana.b Ento i wang’ nicidho, akeadok i Canada pi “yenga moko” nitundo ma karatasi para mi wotho ubed ayika.

Adaru dwi abiro i Toronto m’abekuro ko karatasinegi. I kind nindo maeno, juruot pa Cripps ujola ma ber mandha i bang’gi man lembene uketho ang’eyo nyaku migi ma Sheila ma wamarara kude. Kinde m’amito apenj dwande pi gamiri, karatasi para mi wotho ulund utundo. Warwo karacelo kude man wamaku yub ma nia ukwayu acidhi kaka ma juora i iye. Ento wabiwotho medara asu nikiewo barua i kindwa pi nineno ka nyo wacopo gamara man nindo ma wacopo gamara i iye tek ebicopere. Nimaku yub maeno ubino yot ungo, re i ng’eye wadok wanwang’u nia ebino yub ma cuu m’ukwayu wamaki.

Pi nitundo i adhura ma dit mi Accra i Ghana, wawotho ku garimosi, ku meli man kud avio pi dwi acel zoo. Kinde m’atundo, acaku timo calu jaliew mi distrik. Lembene uketho abed awotho i ng’om mi Ghana nitundo i Côte d’Ivoire man Togo. Wang’ ma pol abed awotho ku mutukari mi Bethel. Anyong’a ubed unenga i nindo maeno ceke!

I thum pa yenga, abed amiyo kony i coko ma dit mi twodiri ma jubed jutimo. Wabino mbe ku Ot coko ma dongo. Umego gibed gigiero dhir ku yen kew man wiye ke gibed giumo ku ith ngasi kara umii tipo pi ceng’ ma lake tek. Calu ma frigo ubino mbe ma jugwok iye ringo pi kafetaria, umego gibed giweko lei ma kwo man jubed juthumogi tek yeny ubekwayere kara dhanu ucam.

E lembe moko mi zungo uwok, re ma ketho jung’iero. Nindo acel kinde m’umego Herb Jennings,c ma de tie jamisioner ubino miyo korolembe, dhiang’ moko uvuth ku ng’wec kud i kafetaria; edongo ku ng’wec nitundo i wang’ bop i kind jamii korolembe ku juwinj. Umego Herb ujigo wec wang’ acel, e wi dhiang’ de ugam ulal man ecungo peng’. Ku bati ma ber, umego moko ang’wen ma korgi urido ubin umake man gidwoke i kafetaria, dhanu ke ubino padu cing’gi pi ninyutho foyofoc.

Urwonde i ng’ey coko, acidh anyutho filme mwa ma thiwiye tie La Société du Monde Nouveau en action i kiaru moko ma ceng’ini. Kara filmene unyuthere, abed atwiyo bongu ma tar i kind yen ario kun ku kun. Lembene ubed unyang’u dhanu mi kiarune lee mandha! Ni ju ma pol m’i kindgi, neno filme ubedo igi wang’ ma kwong’a i kwo migi. Gipadu cing’gi ma tek mandha kinde ma gineno ng’atu m’ubelimo batizo i iye. Filme eno ukonyo ju m’ubino nene lee mandha ninyang’ nia karaman watie i acel i wang’ ng’om zoo.

I ng’ey kwo i ng’om mir Afrika kago oro ario kumeni, anwang’u kaka mi cidho i coko ma dit m’udiko ng’om zoo i New York City i oro 1958. Ebedo ira anyong’a ma dit mandha nineno Sheila m’uai kud i Québec, kaka m’ebino timo i iye calu jayab yo ma segi. I wang’e wabed waweco ku barua i kindwa, ento kawoni calu ma wanwang’ara karacelo, apenje ka nyo wacopo gamara, e eyiyo. Wang’ acel akiewo barua ni umego Knorrd pi nipenje ka nyo Sheila de copo somo Gilead ketho en de elub toka i Afrika, e juyiyo. Tokcenne Sheila utundo i Ghana. E i nindo 3 mi dwi mir 10, 1959 wagamara i adhura mi Accra. Wanwang’u nia andha Yehova umiyo iwa mugisa, pilembe wakethe i kabedo ma kwong’a i kwo mwa.

WATIMO KARACELO I CAMEROUN

I oro 1961, wanwang’u barua mi citimo tic i ng’om mi Cameroun. Abedo ku tic lee mandha, pi kum jukwaya nia acak the filial i ng’ombe. Jung’iya nia abed Jatic mi filialne man lembene uketho anwang’u ponji dupa ma tung’ tung’. I ng’eye i oro 1965, unwang’ere nia Sheila utie ku mugisa. Ku lemandha, ebino iwa lembe ma tek niyiyo nia wabidoko jurunyodo. Ento kinde m’anyong’a ubino negowa nibedo ku rwom maeno, man nidok i Canada, lembe moko mi can ulund uwok.

Ii Sheila udubere. Docta uwacu iwa nia nang’ nyathinne utie ma co. Lembuno utimere oro 50 udaru kadhu, ento wacopo wil ungo ku lembene. Kadok can ugam unyay i iwa lee de, re wabedo asu kaka ma juorowa i iye man wamaru kabedone lee.

Wang’ ma pol umego gibed ginwang’iri ku ragedo i ng’om mi Cameroun, ke pi lembgamba ma gimondo ngo i iye. Lak lembene udoko tek mandha i saa mi bolo kwir pi ning’iyo jawi ng’ombe. Lembe ma wabino lworo utimere. I nindo 13 mi dwi mir 5, 1970, jukwero tic mi Jumulembe pa Yehova i ng’ombe. Gavmenti umayu udi ma beco mi Bethel ma wadok ma nyen i iye ma fodi nwang’u dwi ukadhu abic kende. I kind yenga acel kende ci, juriemo jumisioner ceke kud i ng’ombe, uketho i iye an ku Sheila. Ebino lembe ma tek iwa niweko umego ku nyimego i ng’eywa, kum wamarugi lee man wabino dieng’ pi lembe ma copo dowok i wigi.

Dwi abusiel m’i ng’eye wadok watimo i filial mi France. Kadok ku kuca de abed atimo ku tego para ceke pi nikonyo umego ku nyimego mi Cameroun. I dwi mir 12 mi oro ma rom eno, juorowa wadok i Bethel mi Nigeria, m’ucaku neno wi tic mi ng’om mi Cameroun. Umego ku nyimego mi Nigeria gijolowa kud amora mi tuko ngo, man anyong’a unegowa lee nitimo tic i Bethelne pi oro ma dupa.

YUB MA TEK MA WAMAKU

I oro 1973, ugam ukwayere nia wamak yub moko ma tek mandha. Sheila ubino ku peko mi remokum m’uwotho sende. Kinde ma wacidho i Coko ma dit mir adhura i New York, ewok eloy ira ku wak man ewacu kumae: “Ka lembene kumeni e, nwang’u berone ang’o nimediri asu ku tic? Pi kare ma pol, abenwang’ara nia aol, avoc, ka ku remokum!” Watimo ni Yehova karacelo kude pi oro ma kadhu 14 i Afrika ma yo reto. Abino kud anyong’a lee pire, re katimo nedi mbe, ukwayu aloka loka utimere. I ng’eye kinde ma waweco iwi lembene wang’ dupa kude man warwo kud adundewa ceke pire, e wamaku yub ma nia mito wadok i Canada, kaka ma wacopo maku yath cuu i iye. Yub mi weko kaka ma juorowa i iye calu misioner man bende niweko tic mi saa ceke, ubino iwa lembe ma tek nisagu zoo man ewekowa ku can ma dit i cwinywa.

Kinde ma watundo i Canada, awok anwang’u tic i kampuni mi lworo mutukari i adhura mi Toronto, i bang’ jarimba moko ma con. Wawok wapangu ot grofa moko man wang’iewo bende jamtic mir okazio i iye. Lembuno ukonyowa nicaku the kwo m’umbe nimondo i gamu banja. Wamito ngo wanur kwo mwa ku piny dupa, pikum wabino paru nia saa moko lembe copo yikere, e wadok kendo i tic mi saa ceke. Gin m’uwang’u iwa utie nia, lembene udok utimere de andha, ke pio pio i ayi ma wageno de ngo.

Kubang’ ceng’ soko, abed atimo tic mi miyirigijo i tic mi giedo mi Ot coko ma dongo i Norval, i adhura mi Ontario. I ng’ey kare, jukwaya nia dong’ abed janen wi Ot cokone. Calu ma Sheila de ucaku nwang’u alokaloka pi remokum pare, wanwang’u nia wacopo timo tic ma nyen maeno ma jumiyo i korwa. E i dwi mir 6, 1974, wacokara wadok pi nicikwo i Ot coko ma dongo. Anyong’a unegowa lee mandha nidok caku kendo tic mi saa ceke!

Ku bati ma ber, Sheila umedere asu ninwang’u alokaloka i yotkum pare. Oro ario i ng’eye, jukwaya nia adok acak timo calu jaliew mi twodiri, e wayiyo. Twodiri ma watimo i iye ubino i Manitoba, ma tie province mi Canada, kabedo ma ng’ico lee i iye. Re gin m’ulund unyang’uwa utie nia, mer mir umego ku nyimego umiyo amora lee mandha i kumwa. Ponji ma wanwang’u ni e: Gin ma pire tek utie ngo kaka ma wabetimo ni Yehova i ye, ento nimediri asu nitimo ire kaka moko ci ma wan’i iye.

PONJI MA PIRE TEK M’ANWANG’U

I ng’ey oro dupa i tic mi twodiri, i oro 1978, judok julwong’owa nia wadok watim i Bethel mi Canada. I ng’eye agalu ngo adok anwang’u ponji moko ma lith mandha, re ma pire bino tek. Jumiyo ira korolembe moko mi saa acel ku nusu m’umito atim ku français i coko moko ma segi m’ubino kadhu i adhura mi Montreal. Lembe mi can utie nia, korolembene utelo ngo nen mi juwinj, e umego moko mi Bethel ma timo i departema mi lembanyong’a umiyo ira juk iwi lembene. I andha, niai con ang’eyo nia atie ngo japonji ma ber nisagu. Re kadok kumeno, alund ajolo ngo cuu juk m’umegone umiyo ira. Alaru dhoga kude, anene ni ng’atu m’ubino caya acaya kakare nifoya afoya. Kosa m’atimo utie nia apoko lembe i wiye nimakere kud ayi m’emiyo ko ira juk, man nikum nen m’alar abino ko i wiye.

Nindo ma nok i ng’eye, umego moko mi Komite mi filial uweco kuda iwi lembene. Ayiyo nia andha aweco rac kinde ma jubino miyo ira juk, man akwayu kisa pi lembene. I ng’eye ke acidho i bang’ umego m’umiyo ira jukne pi nikwayu kisa, e ejolo kisane. Lembe maeno m’unwang’a, utie ira ponji ma lee iwi nyutho jwigiri, m’acopo wil ungo pire nyanok de. (Rie. 16:18) Arwo pi lembene wang’ udul i bang’ Yehova man akeco nia macen abineno ngo rac juk ma jubemiyo ira.

Kawoni adaru timo oro 40 i Bethel mi Canada, man niai i oro 1985, anwang’u rwom mi bedo acel m’i kind umego mi Komite mi filial. Lembe mi can utie nia, i dwi mir 2, 2021, Sheila nyaramara para utho. M’uweko can m’abenwang’ara ko i cwinya pire, kawoni ambe ku copo mi timo lembe dupa nikum yotkum para m’ujwik. Ento tic pa Yehova uketho anyong’a ubenega, man ‘abepoy ungo hai i kum nindo mi kwo para.’ (Ekl. 5:20) Kadok nindo mi kwo para ubino ku peko i iye de, re anyong’a m’anwang’u ukadhugi bor dit. Ketho Yehova i kabedo ma kwong’a i kwo para man timo tic mi saa ceke pi oro 70 umiyo ira mugisa lee nisagu. Kwayukwac para kawoni utie nia, umego ku nyimego m’aradu gimediri asu niketho Yehova i kabedo ma kwong’a i kwo migi. Kum cwinya tek nia gin de gibinwang’u mugisa man anyong’a i kwo migi, kende kende nwang’u gibetimo ni Yehova.