Wanyuthu foyofoc ni “giramiya ma dhanu”

1. Yesu miyo iwa giramiya moko ma kani?

NG’ATU MOKO mbe iwi ng’om m’utuc nitimo bero ni jumange calu Yesu. Kinde ma Yesu bino iwi ng’om, etiyo ku copo pare mi timo udu wang’ dupa pi nikonyo jumange. (Luka 9:12-17) Emiyo iwa giramiya ma dit m’usagu zoo kinde m’etho piwa. (Yoh. 15:13) Emedere nitimo bero kadok i ng’ey cer pare. Tap calu m’elar eng’olo, etuc nikwayu Yehova umii iwa tipo pare ma leng’ pi niponjowa man nijuko cwinywa. (Yoh. 14:16, 17; 16:13) Man nikadhu kud i program mi coko, Yesu ubemedere nimiyo iwa gin ceke ma watie ku yenyne pi niketho dhanu udok julub i wang’ ng’om zoo.—Mat. 28:18-20.

2. “Giramiya ma dhanu” ma juweco pigi i Juefeso 4:7, 8 udiko jukani?

² Wakewec iwi giramiya mange ma Yesu miyo iwa. Jakwenda Paulo ukiewo nia i ng’ey ma Yesu idho i polo, ‘emiyo giramiya ma dhanu.’ (Som Juefeso 4:7, 8.) Paulo ukoro nia Yesu miyo giramiya maeno pi nikonyo cokiri i yo ma tung’ tung’. (Efe. 1:22, 23; 4:11-13) Tin, “giramiya ma dhanu” udiko jukony tic, judong cokiri man juliew mi twodiri.a I andha, dhanu maeno gitie ku dub’alaga, uketho saa moko gin de gitimo kosa. (Yak. 3:2) Re asu Rwoth mwa ma Yesu Kristu ubetiyo kugi pi nikonyowa; gitie giramiya m’emiyo iwa.

3. Kemii lapor mi kite ma wan ceke wacopo diko ko cingwa i kum tic mi ju ma gitie “giramiya ma dhanu.”

³ Yesu umiyo ni “giramiya ma dhanu” tic mi giero cokiri. (Efe. 4:12) Ento wan ceke wacopo konyo korgi ku tic maeno ma pire tek. Waromo poro tic migine ku tic mi giero Ot Ker. Jumoko gibedo jurugiedo, jumange ke gikonyo jurugiedo ku miyo cam, yeyo jamtic kunoke ku tic mange. Kumeno bende, wan ceke wacopo konyo kor jukony tic, judong cokiri man juliew mi twodiri nikadhu kud gin ma wabeyero man wabetimo. Dong’ wakenenu bero ma wanwang’u nikum tic ma tek ma gibetimo, man kite ma wacopo nyutho ko foyofoc mwa igi man ni Yesu m’umiyo iwa “giramiya ma dhanu” maeno.

JUKONY TIC ‘GIKONYO JUWAGI’

4. I rundi ma kwong’a jukony tic gibed gikonyo cokiri ku tic moko ma kanigi?

⁴ I rundi ma kwong’a jubed jung’iyo umego moko gibed jukony tic. (1 Tim. 3:8) Ubeyenyo nen nia gin re ma gibino dhanu “ma konyo juwagi” ma Paulo ukiewo pigi. (1 Kor. 12:28) Copere nia jukony tic gibed gitimo tic dupa ma pigi tek wek kara judong cokiri giketh wigi zoo i kum tic mi ponji man mi kwac. Ku lapor, copere nia gibed gikonyo i tic mi nyayu Lembagora kunoke mi ng’iewo jamtic m’ukwayere pi ninyaye.

5. Tin jukony tic gikonyo i tic moko ma kani?

⁵ Kepar pi tic moko ma jukony tic gitimo i cokiri peri. (1 Pet. 4:10) Juromo miyo igi tic mi tiyo iwi kwanu sente kunoke mi neno wi therithwar mi cokiri, tic mi kwayu girasoma ni cokiri, mi tiyo ku jamtic mi odio-video, mi jolo dhanu i coko, kunoke tic mi gwoko Ot Ker ubed ma leng’. Tic maeno ceke pigi tek lee kara lembe uwoth ma ber i cokiri. (1 Kor. 14:40) M’umedo maeno, jukony tic moko gitimo theng program mi coko mi Kwo man tic, man gimiyo korolembe mi dhanu ceke. Juromo ng’iyo bende jakony tic ubed jang’ey janen wi ungu mi lembanyong’a. Saa moko jukony tic ma giromo gicidho i liew mi kwac ku judong cokiri.

6. Wafoyo jukony tic ma gibetimo tic ma tek pi thelembe moko ma kanigi?

⁶ Cokiri nwang’u bero ma kani nikum tic mi jukony tic? Beberlyb ma tie nyamego moko mi ng’om mi Bolivie uyero kumae: “Tic ma jukony tic mwa gitimo uketho anwang’u bero lee i coko. Tic migi uketho acopo wer, adwoko wang’ penji i coko, awinjo korolembe man anwang’u ponji i video man i cal. Gidieng’ pi bedomoth mi dhanu ma n’i coko man pi dhanu ma gibelubo coko i Zoom. I ng’ey coko, gikonyo i tic mi weyo Ot Ker, gikwanu wel sente mi giramiya, man ginyang’ ka nyo watie ku girasoma ma watie ku yenyne. Abefoyogi lee mandha!” Leslie ma kwo i ng’om mi Colombie man ma won ot pare utie jadit cokiri ke uyero kumae: “Won ot para bedo lee dit ku yeny mi jukony tic pi nitimo tic ma tung’ tung’. Ka nwang’u gimbe, nwang’u tic ubecipong’ lee nisagu i wang’e, pieno abefoyogi pir amora migi man pilembe gitie ayika nikonyo.” M’umbe jiji, in de ibewinjiri tap kumeno.—1 Tim. 3:13.

7. Wacopo nyutho foyofoc mwa nenedi ni jukony tic? (Nen bende cal.)

⁷ Andha waromo bedo ku foyofoc pi tic ceke ma jukony tic mwa gibetimo, ento Biblia ubekwayuwa nia “[wabed] dhanu ma dwoko foyofoc.” Pieno mito wanyuth igi nia wabefoyogi. (Kol. 3:15) Christophe m’utie jadit cokiri moko mi ng’om mi Finlande ukoro nia enyutho igi foyofoc kumae: “Abed aoro mesaj ku giragora moko i iye, man anyutho ayi moko ma segi ma jakony tic utielo ko cwinya kunoke thelembe m’abefoye pire.” Pascal giku Jael ma gikwo i ng’om mi Nouvelle-Calédonie gibed girwo athothi pi jukony tic. Pascal ukoro kumae: “I kind nindo m’ukadhu ceng’ini eni, kwayukwac man rwo mwa ceke uwotho dwogo iwi umego maeno ma jung’iyo utim tic ma tek i cokiri.” Yehova winjo rwo ma kumeno, e cokiri ceke nwang’u berone.—2 Kor. 1:11.

JUDONG COKIRI “GIBETIMO TIC MA TEK”

8. Pirang’o Paulo ukiewo nia judong cokiri mi rundi ma kwong’a gibino ‘timo tic ma tek’? (1 Juthesaloniki 5:12, 13)

⁸ Judong cokiri mi rundi ma kwong’a gibed gitimo tic ma tek pi cokiri. (Som 1 Juthesaloniki 5:12, 13; 1 Tim. 5:17) Gibed ‘gitelo wi’ cokiri, uketho i iye nitelo wi coko man nimaku yub karacelo i guriri mi judong cokiri. Gibed gimiyo ‘juk’ ni umego ku nyimego, niwacu juk ma thwolo thwolo ma re mi mer pi nigwoko cokiri. (1 Thes. 2:11, 12; 2 Tim. 4:2) I andha, gibed gitimo bende tic ma tek pi nipong’o yeny mi juruot migi man kara gin gigi de gimediri nibedo tek i thenge mi tipo.—1 Tim. 3:2, 4; Tito 1:6-9.

9. Tin judong cokiri gitimo tic moko ma kanigi?

⁹ Tin de judong cokiri gitimo tic dupa. Ku lapor, gitie jurwey lembanyong’a. (2 Tim. 4:5) Ginyutho lapor ma ber i tic mi rweyo lembanyong’a kud amora, gipangu pi tic mi lembanyong’a i therithwar mi cokiri man giponjowa ku tic mi rweyo lembanyong’a man mi ponji. Gitie bende jupoklembe ma weg kisa man m’umbe kud akoyakoya. Ka Jakristu moko upodho i dubo ma pek, judong cokiri gitimo kero gikonye eyik winjiri pare ku Yehova. Ento i saa ma rom eno, gidieng’ i kum gwoko cokiri ubed leng’. (1 Kor. 5:12, 13; Gal. 6:1) Tic ma kwong’a mi judong cokiri utie nibedo jukwac. (1 Pet. 5:1-3) Pieno gimiyo korolembe ma mit m’ujengere iwi Biblia, gitimo tego ning’eyo ng’atuman mi cokiri man gitimo liew mi kwac. Judong cokiri moko gikonyo bende i tic mi giero man mi gwoko Ot Ker, i tic mi pangu pi coko ma dongo, i Komite ma diko kind umego ku odiyath man i Ungu mi liewo jurutwoyo, ku tic mange bende. Andhandha, judong cokiri gitimo tic ma tek piwa!

10. Wafoyo judong cokiri ma gibetimo tic ma tek pi thelembe moko ma kanigi?

¹⁰ Yehova ular uewo nia jukwac gibigwokowa ma ber mandha man nia ‘lworo binegowa kendo ngo, kadi cwinywa de bing’abere ngo.’ (Yer. 23:4) Johanna m’utie nyamego moko mi ng’om mi Finlande uneno andha mi wec maeno kinde ma min utwoyo twoyo moko ma pek. Ekoro kumae: “Kadok etie ira tek nikoro kite m’abewinjara ko ni jumange de, re jadit cokiri moko m’ang’eyo de ngo ma ber ucira lee, erwo karacelo kuda man etielo cwinya nia Yehova mara. Abepoy ungo tap tap i kum gin m’eyero, ento abepoy nia i saa maeca anwang’u kwiyocwiny. Abeparu nia Yehova re m’uore pi nikonya i saa ma tap.” Judong cokiri mi cokiri peri gidaru konyi nenedi?

11. Wacopo nyutho foyofoc mwa nenedi ni judong cokiri? (Nen bende cal.)

¹¹ Yehova ubemito nia wanyuth foyofoc mwa ni judong cokiri “pi tic migi.” (1 Thes. 5:12, 13) Henrietta ma kwo bende i ng’om mi Finlande uyero kumae: “Judong cokiri gitie ayika nikonyo jumange, ento eno nyutho ngo nia gitie ku saa man kero nisagu jumange kunoke nia gimbe ku peko i kwo migi. Saa moko ayero igi nia, ‘Itie jadit cokiri ma ber lee. Kende kende amito in de ing’ey lembuni.’” Nyamego moko mi ng’om mi Turquie ma nyinge Sera ke uyero kumae: “Judong cokiri gitie ku yeny mi tielocwiny kara gimediri ma ber ku tic migi. Pieno wacopo kiewo igi mesaj, walwong’ogi i bang’ cam kunoke warweyo kugi.” Nyo jadit cokiri moko nuti de m’ifoyo lee mandha ku tic ma tek m’ebetimo? Say ayi m’icopo nyutho ko ire foyofoc peri.—1 Kor. 16:18.

JULIEW MI TWODIRI GIGIEROWA

12. Jugam jumaku yub ma kani pi nigiero cokiri i rundi ma kwong’a? (1 Juthesaloniki 2:7, 8)

¹² Kristu Yesu ugam umiyo “giramiya ma dhanu” ma gikonyo i ayi mange bende. Etelo wi judong cokiri mi Yeruzalem pi nioro Paulo, Barnaba ku jumange i tic mi liew. (Tic. 11:22) Pirang’o? Ubino pi thelembe ma rom m’uketho jubed jung’iyo jukony tic ku judong cokiri, niwacu pi nigiero cokiri. (Tic. 15:40, 41) Danu maeno gibed gitwoniri ku piny dupa pi nitimo tic migi; gibed giketho kadok kwo migi ngi i ariti pi niponjo jumange man nitielo cwinygi.—Som 1 Juthesaloniki 2:7, 8.

13. Juliew mi twodiri gitimo tic moko ma kanigi?

¹³ Juliew mi twodiri giwotho saa ceke. Jumoko m’i kindgi giwotho kilometre dak swa pi nitundo i cokiri ma gibeciliewo. Kubang’ yenga, jaliew mi twodiri miyo korolembe dupa, ecidho i liew mi kwac man etelo wi coko mi juyab yo, mi judong cokiri man mi tic mi lembanyong’a. Eyiko korolembe man epangu pi coko ma dongo mi twodiri ku mir adhura. Eponjo i somo mi tic mi juyab yo man epangu pi coko ma segi mi juyab yo mi twodiri pare. M’uweko tic maeno ceke, kwayu etii bende iwi lembe mange ma pigi tek ma saa moko banju jutim pio pio, ma Bethel ubekwayu i bang’e.

14. Wafoyo juliew mi twodiri ma gibetimo tic ma tek pi thelembe moko ma kanigi?

¹⁴ Cokiri nwang’u bero ma kani nikum tic mi juliew mi twodiri? Umego moko mi ng’om mi Turquie uyero pi liew mi juliew mi twodiri kumae: “Liew migiman cwala niwodho saa para ma lee pi nikonyo umego ku nyimego para. Adaru rombo ku juliew mi twodiri dupa; re acel de mbe m’i kindgi m’uketho apar nia tic lee i wang’e kunoke nia embe ku yeny mi weco kuda.” Johanna ma wadaru weco pire ugam urweyo ku jaliew moko mi twodiri, ento ginwang’u ngo ng’atu acel de i pacu. Ekoro kumae: “Re abimedara nipoy asu pi nindo maeca. Saa maeca nwang’u nyimego para ario zoo giai gidok kaka mange, man abino kosogi lee. Jaliew mi twodirine utielo cwinya man ekonya ninyang’ nia tin waromo bedo bor ku wedi mwa man jurimbwa, ento nia i ng’om ma nyen, wabinwang’u kaka mi bedo kugi nja ku nja.” Ju dupa m’i kindwa gituc nimaru juliew mi twodiri dupa pi kite ma gikonyo kogi.—Tic. 20:37–21:1.

15. (a) Nimakere ku 3 Yohana 5-8, wacopo nyutho foyofoc mwa nenedi ni juliew mi twodiri? (Nen bende cal.) (b) Pirang’o ukwayu wabed wanyuth foyofoc ni mon mir umego ma gitie ku rwom, man wacopo timo kumeno nenedi? (Nen sanduku ma thiwiye tie, “Poy pi mon migi.”)

¹⁵ Jakwenda Yohana ukwayu Gayo unyuth jol ni umego ma gibino pi niteng’o cokiri man nia “[ecikgi] i woth migi i ayi m’uromo ku Mungu.” (Som 3 Yohana 5-8.) Acel m’i kind yo ma wacopo timo ko kumeno utie nilwong’o jaliew mi twodiri i bang’ cam. Ayi mange utie nidiko cingwa i kum yub mi rweyo lembanyong’a i saa mi liew pare. Leslie ma wadaru weco pire unyutho foyofoc pare i ayi mange bende. Eyero kumae: “Arwo i bang’ Yehova nia epong’ yeny migi. Waku won ot para wakiewo igi bende barua pi ninyutho igi kite ma liew migi ukonyo kowa.” Poy nia juliew mi twodiri de gitie dhanu calu wan. Saa moko ginyego ku remokum, adieng’acwiny man kadok turcwiny. Saa moko nyo wec peri ma kadu romo kunoke giramiya peri ma nyadre bibedo ayi ma Yehova ubedwoko ko wang’ rwo pa jaliew mi twodiri peri!—Rie. 12:25.

WATIE KU YENY MI “GIRAMIYA MA DHANU”

16. Nimakere ku Lembrieko 3:27, umego giromo penjiri ku penji ma kani?

¹⁶ I wang’ ng’om zoo, watie ku yeny mir umego ma wendgi lee pi nitimo calu “giramiya ma dhanu.” Tek itie umego m’udaru limo batizo, nyo itie ku copo mi konyo jumange? (Som Lembrieko 3:27.) Nyo itie kud ava mi romo nidoko jakony tic? Tek dong’ itie jakony tic, ineno nenedi kan isayu nikonyo umego ku nyimego peri calu jadit cokiri?c Nyo ecopere iri niyiko i program peri pi nipong’o karathasi mi kwayu pi somo mi jurwey Injili mi Ker? Ponji m’ibinwang’u i somo maeno bikonyi kara Yesu utii kudi lee nisagu. Tek ibenwang’u nia fodi iromo ngo, rwo i bang’ Yehova. Kwaye emii iri tipo pare ma leng’ ukonyi nitimo ma ber mandha tic ceke ma jumiyo i kori.—Luka 11:13; Tic. 20:28.

17. “Giramiya ma dhanu” gibenyutho ang’o iwi Ubimo mwa ma Kristu Yesu?

¹⁷ Umego ma Yesu ung’iyo ubed “giramiya ma dhanu” gitie lanyuth m’ubecwaku nia ebetelo wiwa i kind nindo mi kajik ceng’ maeni. (Mat. 28:20) Nyo etie ngo lembe mi foyofoc ma lee nia Ubimo mwa utie ng’atu ma jamer, ma won berocwiny, ma dieng’ kudwa man nia emiyo iwa umego m’uromo pi nikonyowa? Dong’ say yore mi nyutho foyofoc peri ni jumaco maeno pi tic ma tek ma gibetimo. Man kud iwil nifoyo Yehova m’utie Jamii “giramiya ceke ma ber man ma cuu.”—Yak. 1:17.