Wii kud uwil nirwo pi jumange

1. Wang’eyo nenedi nia rwo mwa pigi tie tek i ii Yehova?

RWO tie giramiya ma yawe mbe. Kepar nyanok: Yehova umiyo tic moko ni jumalaika. (Zab. 91:11) Emiyo bende rwom ma dongo ni Wode. (Mat. 28:18) Re nyo eng’iyo ng’atu moko mange pi niwinjo rwo mwa? Ungo. Eng’iyo nia mito ewinj rwo mwa en gire. Yehova ma tie “Jawinj rwo,” winjowa en ku kume.—Zab. 65:2.

2. Wang’eyo nenedi nia Paulo urwo pi jumange, man lembuno ubemiyo iwa ponji ma kani?

² Kadok nwang’u wacopo coro i vut Yehova yot yot pi nikoro adieng’acwiny mwa de, re wacikara nirwo bende pi jumange. Jakwenda Paulo de utimo lembe maeno. Ku lapor, ekiewo ni cokiri mir Efeso kumae: “Abemedara nikwayu piwu i rwo para.” (Efe. 1:16) Erwo bende pi ng’atuman acel acel. Ku lapor, eyero ni Timoteo kumae: “Abedwoko foyofoc ni Mungu, . . . abeweko ngo nyanok de nipoy piri i kwayukwac para diewor ku dieceng’.” (2 Tim. 1:3) Paulo ubino kud adieng’a ma pare gire m’ukwayu erwo pire. (2 Kor. 11:23; 12:7, 8) Ento ekoyo bende saa mi rwo pi jumange.

3. Pirang’o saa moko wiwa copo wil nirwo pi jumange?

³ Saa moko wiwa copo wil nirwo pi jumange. Pirang’o? Nyamego moko ma nyinge Sabrinaa unyutho thelembene acel. Eyero kumae: “Anyoba nyoba mi kwo usagu i ng’om maeni. Peko mwa copo nyotho wiwa man waromo caku rwo kwa pi yeny mwa giwa.” Nyo in de idaru nweng’iri ku lembe maeno? Tek eyo, thiwiwec maeni bikonyi. Ebikoro nia pirang’o pire tie tek nirwo pi jumange man ebinyutho ayi moko ma waromo rwo ko.

PIRANG’O MITO WARWO PI JUMANGE?

4-5. Rwo mwa copo bedo ku “tego lee” iwi jumange nenedi? (Yakobo 5:16)

⁴ Nirwo pi jumange “utie ku tego lee.” (Som Yakobo 5:16.) Nyo nirwo pi jumange copo wilo lembe moko andha i kum peko ma gibekadh’i iye? Eyo. Yesu ugam ung’eyo nia jakwenda Pethro bikwere, uketho eyero kumae: “Atimo kwayukwac piri kara yiyoyic peri kud ukwii.” (Luka 22:32) Paulo de ung’eyo nia rwo copo konyo. Kinde ma jutwiye i kol i Roma pi kosa m’etimo ngo, ekiewo ni Filemon kumae: “Atie ku genogen nia ni kum rwo mwu jubigonya iwu.” (Filem. 22) Lembene utimere de kumeno; jugonyo Paulo kud i kol, man ndhundhu edok ecaku tic pare mi rweyo lembanyong’a.

⁵ Re eno nyutho ngo nia wacopo diyo Yehova adiya ku rwo mwa. Eng’eyo adieng’acwiny mi jurutic pare man saa moko eng’iyo nitimo lembe ma gikwayu. Ning’eyo lembuno copo konyowa nirwo i bang’ Yehova kud adundewa ceke pi lembe moko, man niweko lembene i cinge.—Zab. 37:5; nen 2 Jukorintho 1:11.

6. Nirwo pi jumange ketho wawinjara nenedi pigi? (1 Pethro 3:8)

⁶ Nirwo pi jumange ketho wabedo ku “kisa” i kumgi. (Som 1 Pethro 3:8.) Ng’atu ma jakisa neno can ma wadi ubenwang’ere ko man ebedo kud ava mi konye. (Mark. 1:40, 41) Jadit cokiri moko ma nyinge Michael uwacu kumae: “Kan aberwo pi yeny mi jumange, anyang’ cuu mandha i peko migi, man mer m’amaru kogi medere ameda. Anwang’u nia kindwa tie ceng’ini kugi kadok ging’eyo ngo de.” Richard ma de tie jadit cokiri, unyutho bero mange. Ewacu kumae: “Ka waberwo pi ng’atu moko, eno miyo iwa amora mi timo lembe moko pi nikonye.” Emedo kumae: “Ka wabekonyo ng’atu ma waberwo pire, ku yore moko eca nwang’u wabekonyo pi nidwoko wang’ rwo ma warwo ko pire.”

7. Nirwo pi jumange konyowa nenedi? (Jufilipi 2:3, 4) (Nen bende cal.)

⁷ Nirwo pi jumange ketho waparu ngo kwa pi peko mwa giwa. (Som Jufilipi 2:3, 4.) Ng’atuman utie ku peko pare i ng’om maeni ma Sitani ubebimo wiye. (1 Yoh. 5:19; Nyu. 12:12) Bedo ku ng’iyo mi rwo pi jumange poyo wiwa nia “utumego [mwa] mi wang’ ng’om zoo de gibenwang’iri ku kit masendi ma rom.” (1 Pet. 5:9) Jayab yo moko ma nyinge Katherine uyero kumae: “Nirwo pi jumange poyo wiya nia gin de gibenwang’iri ku peko. Lembuno ketho aweko niparu kwa pi peko para.”

GITIE KU YENY MI RWO MWA

8. Wacopo rwo pi jukani? Ke mii lapor moko.

⁸ Wacopo rwo pi jukani? Wacopo rwo pi dhanu dupa. Ku lapor, wacopo rwo pi ju m’uberemo, aradu m’awiya waggi ubesendogi man ubenywarugi i somo, man bende pi ju ma gibenyego ku peko mi tiyo. Juyic wadwa dupa gibeciro ragedo m’ubeai i bang’ wedi migi kunoke i bang’ gavmenti. (Mat. 10:18, 36; Tic. 12:5) Umego mwa moko giweko udi migi pir anyoba nyoba mi lemgamba. Jumoko peko ma wok rek utundo i wigi. Copere nyo wang’eyo ngo umego ku nyimego maenogi athothi. Ento ka waberwo pigi, nwang’u wabenyutho nia wabeworo cik ma Yesu umiyo iwa nia ‘wamarara i kindwa.’—Yoh. 13:34.

9. Pirang’o wacikara nirwo pi ju m’ubetelo wiwa i dilo pa Yehova man bende pi mon migi?

⁹ Wacopo rwo bende pi ju m’ubetelo wiwa i dilo pa Yehova. Eno uketho i iye umego m’i Guriri m’utelowic ku jukony migi, ju m’i Komite mi filial, junen wi tic ma tung’ tung’ m’utimere i Bethel, juliew mi twodiri, judong cokiri man jukony tic. Ju dupa m’i kind umego maeno gitie kud adieng’acwiny migi, re asu gibetimo tic ma tek pi nikonyowa. (2 Kor. 12:15) Ku lapor, jaliew mi twodiri moko ma nyinge Mark uyero kumae: “Kud i kind peko para ma dongo, acel utie nibedo bor ku junyodo para. Gin ario ceke yotkum migi cuu ngo. Kadok nyamira ku won ot pare gibepong’o yeny migi de, re awinjara rac nia abekonyogi ngo calu ma nwang’u amito.” Kadok wang’ey peko mir umego maeno kunoke ngo de, etie ber nia kud wawekgi i rwo mwa. (1 Thes. 5:12, 13) Wacopo rwo bende pi mon migi pi kony ma gibemiyo kara coggi umediri ku tic ma gibetimo.

10-11. Nyo anyong’a nego Yehova pi rwo ma waberwo ko pir umego ku nyimego mwa? Kekor.

¹⁰ Calu ma waneno, wang’ ma pol warwo pir ungu mir umego ku nyimego mwa. Ku lapor, m’umbe nitiro ng’atu moko athothi i rwo mwa, wacopo kwayu Yehova ukony ju ma jutwiyo i kol, kunoke ejuk ju ma wedi migi utho. Jadit cokiri moko ma nyinge Donald uwacu kumae: “Watie kud umego ku nyimego dupa ma gibenwang’iri ku peko, uketho wacokogi ceke i rwo mwa kara Yehova ukony ju ceke m’ubeneno can.”

¹¹ Nyo anyong’a nego Yehova pi rwo ma kumeno? Eyo! Ku lemandha, wang’eyo ngo yeny ma tap mi juyic wadwa. Pieno, pire tie tek nitimo kwac m’udiko umego ku nyimego mwa ceke. (Yoh. 17:20; Efe. 6:18) Rwo ma kumeno nyutho kamaleng’ nia ‘wamaru umego mi wang’ ng’om zoo.’—1 Pet. 2:17.

KINDE MA WABERWO PI NG’ATUMAN ACEL ACEL

12. Ang’o ma copo konyowa nirwo pi ng’atuman ku nyinge?

¹² Bed ng’atu ma neno lembe. M’uweko nirwo pir ungu mir umego ku nyimego mwa, etie ber bende nirwo pi ng’atuman ku nyinge. Nyo ng’atu moko ubetwoyo twoyo ma key ungo i cokiri peri? Nyo aradu moko nuti ma cwinye tur, saa moko nyo pi masendi ma juwadi ubesende ko i somo? Nyo janyodo moko nuti m’ubetungo nyathin pare kende “nimakere ku telowic pa Yehova”? (Efe. 6:4) Kan itie dhanu ma neno lembe, ebibedo yot iri nikethiri ka kagi man lembene bimiyo iri ava mi rwo pigi.b—Rum. 12:15.

13. Wacopo rwo ku nying’ ju ma wang’eyo ngo nenedi?

¹³ Rwo pi jumange ku nying’gi. Icopo rwo kadok pi ju m’ing’eyo ngo de. Ku lapor, iromo rwo pir umego ku nyimego mwa ma n’i ng’om mi Crimea, Eritrea, Russia, man Singapore. I kusika mwa jw.org, ibinwang’u nying’ dhanu dupa ma jutwiyo i kol.c Jaliew moko mi twodiri ma nyinge Brian uwacu kumae: “Nikiewo nying’ umego ku nyimego moko ma jutwiyo i kol, man nidok somo nying’gine ku dwanda ma tek, konya nipoy pigi man nirwo pigi.”

14-15. Wacopo yero lembang’o athothi kinde ma waberwo pi jumange?

¹⁴ Yer lembe ma tap i rwo peri. Michael ma waweco pire uwacu kumae: “Kan abesomo pir umego ma jutwiyo i kol i jw.org, atimo kero nineno kite m’acopo winjara ko ka nang’ atie gin. Ang’eyo nia acopo dieng’ pi dhaku para man acopo mito nia yeny pare upong’ calu m’ukwayere. Lembuno ketho anwang’u wec ma tap m’ayer i rwo para pir umego ma gigamiri ma jutwiyo i kol.”—Ebr. 13:3, kmt.

¹⁵ Ka waparu pir ayi ma kwo copo bedo ko tek ni umego mwa i kol, eno copo konyowa ninwang’u wec ma tap ma wayer pigi i rwo mwa. Ku lapor, wacopo rwo nia jukur dhu kol kud usendgi, man nia ju ma gitie ku dito i wigi kud gicergi nitimo thier ni Yehova. (1 Tim. 2:1, 2) Wacopo rwo nia cokiri unwang’ ponji i lapor mi gwoko bedoleng’ mir umego migi ma jutwiyo, man nia ju ma gi juyic ungo ginen kura migi ma ber man giwinj rwonglembe mwa. (1 Pet. 2:12) Wacopo tiyo ku bodho ma rom eno pi nirwo pir umego ku nyimego ma gibenwang’iri ku kit peko mange bende. Ka watie dhanu ma neno lembe, ma rwo pi jumange ng’atuman ku nyinge, man ma yero lembe ma tap i rwo, wabinyutho nia mer mwa ‘usagere asaga ng’atuman ku wadi man ku wadi.’—1 Thes. 3:12.

BED KU NEN MA BER IWI RWO PERI

16. Wacopo bedo ku nen ma ber nenedi iwi rwo mwa? (Matayo 6:8)

¹⁶ Waneno nia rwo utie ku kony i saa mi peko. Re mito wabed ku nen ma ber kinde ma waberwo. Wacikara ngo nimiyo lembang’eya ni Yehova iwi lembe ma fodi ve eng’eyo ngo, kadi ke nia wanyuth ire ayi ma ber m’umaku eyik ko lembe. Eng’eyo yeny mi jurutic pare ma fodi gin de ging’eyo ngo, kadi ma wan de wang’eyo ngo. (Som Matayo 6:8.) Ka kumeno, dong’ pirang’o ke mito warwo asu pi jumange? M’uweko thelembe ma wadaru weco pire, utie pilembe ng’atu moko ci ma dieng’ pi wadi copo timo lembuno. Mer cwaluwa nirwo pi jumange. Bende, anyong’a nego Yehova kan ebeneno jutic pare gibenyutho mer ni jumange calu en.

17-18. Rwo mwa utie ku bero ma kani iwi jumange? Ke mii lapor moko?

¹⁷ Kadok ecopo nen ve nia rwo umbe ku copo iwi peko ma ng’atini ubekadhu kud i iye de, re enyutho mer ma wamaru ko umego ku nyimego mwa, man Yehova bende neno lembene. Kepar nia juruot moko utie kud awiya ma thindho ario: ma nyaku ku ma co. Nyathinne ma co kume uberemo man evuto. Ma nyaku ucidho i bang’ won man ekwaye kumae: “Baba, akweyi tim lembe moko pi nyathifwa kara kume ukey!” Won ular ung’eyo gin m’umito etim pilembe emaru wode man ebedieng’ pire. Kadok kumeno de, anyong’a copo nego wego eno lee nineno nia nyathin pare ma nok ubedieng’ pir umin, uketho ebekwayu won ukonye.

¹⁸ Yehova ubemito wan de wadieng’ ng’atuman pi wadi man pi wadi, man warwo ng’atuman pi wadi. Timo kumeno nyutho nia wabedieng’ ungo kende kende piwa giwa, ento nia wamaru bende jumange. Wang’ Yehova neno timo ma kumeno. (2 Thes. 1:3; Ebr. 6:10) Calu ma waneno, rwo copo miyo alokaloka i lembe ma ng’atini ubekadhu kud i iye. Pieno, dong’ wiwa kud uwil nirwo ng’atuman pi wadi man pi wadi.