Pirang’o Biblia ulwong’o Yesu nia Wod Mungu?
Lembe ma Biblia udwoko
Wang’ ma pol, Biblia ulwong’o Yesu nia “Wod Mungu.” (Yohana 1:49) Wec ma nia “Wod Mungu” ubenyutho nia Mungu tie Jacwic kunoke Ukungu mi kwo ceke, uketho i iye kadok Yesu bende. (Zaburi 36:9; Lembanyutha 4:11) Biblia uyero ngo nia Mungu unyolo Yesu anyola i ayi ma rom ma dhanu nyolo ko awiya.
Biblia ulwong’o bende jumalaika nia “wot Mungu.” (Yob 1:6) Bende, Biblia uyero nia ng’atu ma kwong’a, niwacu Adam ubino “wod Mungu.” (Luka 3:38) Ento Biblia unyutho nia Yesu utie wod Mungu ma segi pilembe en re m’ebino giracwiya ma kwong’a pa Mungu man eni kende re ma Mungu ucwiye ku cinge gire.
Nyo Yesu ular ukwo i polo i wang’ ninyolere iwi ng’om?
Eyo. Yesu ular ubino giracwiya mi tipo i polo i wang’ nibino nyolere ni dhanu iwi ng’om. Yesu en gire de eyero kumae: “Aloro kud i polo.”—Yohana 6:38; 8:23.
Mungu ular ucwiyo Yesu i wang’ nicwiyo piny mange ceke. Biblia uyero pi Yesu kumae:
“Etie . . . kayu mi giracwiya ceke.”—Jukolosai 1:15.
Etie “acaki mi giracwiya pa Mungu.”—Lembanyutha 3:14.
Yesu upong’o lembila dupa m’uweco iwi ng’atu ma “[thekiri] pare gambre con, ugambre mi nja.”—Mika 5:2; Matayo 2:4-6.
Yesu ubed utimo ang’o i wang’ nibino i ng’om?
Ebino ku dito ma lee i polo. Yesu uweco pi dito maeno kinde m’erwo kumae: “Vwa, yunga . . . ku yung m’alar abino ko i vuti ma fodi ng’om umbe.”—Yohana 17:5.
Ekonyo Won ku cwiyo piny mange ceke. Yesu utimo tic i ng’et Mungu calu “jabodho ma dit.” (Lembrieko 8:30) Biblia uwacu pi Yesu kumae: “Nikadhu kud i bang’e re ma piny mange ceke ucwiyere i polo man iwi ng’om.”—Jukolosai 1:16.
Nikadhu kud i bang’ Yesu, Mungu ucwiyo piny mange ceke. Eno uketho i iye giracwiya mange ceke mi tipo man bende ng’om ku polo. (Lembanyutha 5:11) I ayi moko, tic ma Mungu gitimo giku Yesu udog ubedo ve ma jabodho moko ma dit telo ko wi tic mi jurugiedo. Jabodho ma ditne kubo cal, man jurugiedo gilubo calne pi nigiero ot.
Ebino Lembe. Kinde ma Biblia uweco pi Yesu ma nwang’u fodi ebino ngo i ng’om, elwong’e nia “Lembe.” (Yohana 1:1) M’umbe jiji, eno ubenyutho nia Mungu utiyo ku Wode pi ninyutho lembe ma tung’ tung’ man pi nimiyo telowic ni giracwiya mange mi tipo.
Ubenen bende nia Yesu utiyo calu Jayer lembe pa Mungu ni dhanu iwi ng’om. Copere nia Mungu uweco nikadhu kud i bang’ Yesu ma tie Lembe pi nimiyo telowic ni Adamu giku Eva i podho mir Eden. (Thangambere 2:16, 17) Bende copere nia Yesu ubino malaika m’utelo wi nyithindho mir Israel ma con i langa man m’ugam ukwayu nia giwor dwande cuu mandha.—Ai 23:20-23.a
a Mungu ubed uweco kende kende ngo nikadhu kud i bang’ malaika ma julwong’o nia Lembe. Ku lapor, etiyo ku jumalaika mange m’uweko Wode ma kayu pi nimiyo Cik pare ni thek mir Israel ma con.—Tic mi Jukwenda 7:53; Jugalatia 3:19; Juebrania 2:2, 3.