Lemkei mi kwong’o

20 I caku pa oro,* i nindo ma jubim gibed gicidho i iye i lwiny, Yoab utelo wi juaskari pi nicidho kugi i lwiny man ginyotho ng’om mi Juamon; etundo i kum adhura mi Raba man gitieke, saa maeno nwang’u Daudi udong’ i Yeruzalem. Yoab ukiedo i kum Raba man erwombe. 2 I ng’eye, Daudi uting’o jamker mi wic kud i wi Malkam, man enwang’u nia pek mi jamker mi wicne ubino talanto acel* mi mola ma kwar, juruke bende ku kidi ma pigi tek; e jukethe iwi Daudi. Bende, ecoko jambayeki lee kud i adhurane. 3 Ecoko bende dhanu m’ubino i adhurane man ekethogi nitimo tic ku sii mi thumo kidi, ku jamtic mi cuma ma lakgi bith, man ku ley. Eno ubino gin ma Daudi utimo i kum adhura ceke mi Juamon. Tokcenne, Daudi kud udul askari ceke gidok i Yeruzalem.

4 I ng’ey lembe maeno, lwiny utuk i kind Juisrael ku Jufilisti i Gezer. I saa maeno Sibekai ma dhanu mi Huca unego Sipai m’ubino nyakwar Jurefaim, e giketho Jufilisti i the loc migi.

5 Lwiny udok utuk kendo ku Jufilisti, man Elhanan ma wod Yair unego Lami m’umin Goliath ma Jagath, m’ubino ku tong’ ma yende dit ve yen pa jacwii kendi.

6 I ng’eye, lwiny utuk kendo i Gath, kaka ma jalwo moko m’udongo lazangara mandha ubino i iye; nyig cinge ubino abusiel abusiel man nyig tiende de abusiel abusiel, ceke wendgi ubino pier ario wi ang’wen; en de ebino nyakwar Jurefaim. 7 Ebed eroko Israel saa ceke. Pieno Yonathan ma wod Cimea m’umin Daudi unege cen.

8 Ju maeni gibino nyikway Jurefaim mi Gath. Daudi man jutic pare re ma ginegogi.