Yob
3 I ng’ey lembe maeno, Yob ucaku niweco man nilamu nindo mi nyoliri pare.* 2 Eyero kumae:
3 “Wek nindo ma junyola i iye urwiny,
bende diewor ma ng’atu moko uyero i iye nia, ‘jugamu ic pa nyathin ma nico.’
4 Wek nindo maeno ubed ni mudho.
Wek Mungu ma ni malu kud udieng’ pire;
dong’ der moko kud urieny i wiye.
5 Wek mudho ma bii* ulwong’e nia e pare.
Wek afuru mi koth uume.
Dong’ gin moko ci ma cido dieceng’ unyay lworo i iye.
6 Wek mudho umwony diewor maeca;
dong’ anyong’a kud unege i kind nindo mi oro,
man dong’ kud emond i kind wend dwi.
7 Eyo, dong’ diewor nica udok jamugumba,
man dong’ kud juwinj ba dwal mir anyong’a i iye.
8 Dong’ ju ma gilamu nindo gilame,
ju ma gitie ku copo mi cewo Leviathan.*
9 Wek nyikaluku mi mwony pa ceng’ mir uthieno nica gidok col;
wek ekur der mi rupiny kpe,
man dong’ kud enen lero mi mombwa.
10 Kum eciko ngo dhugola m’i maa;
kadi ekanu ngo peko kud i wang’a.
11 Pirang’o atho ngo kinde ma jubenyola?
Pirang’o arwinyo ngo kinde m’abewok kud i ici?
12 Pirang’o cong ubino nuti pi nijola
man thuno kara adhothi?
13 Kum eni nwang’u avuto ma gin m’ubesenda mbe;
nwang’u anindo man abeyom
14 karacelo ku jubim m’i ng’om man jumii juk migi,
ma gigiero igi kaka ma kawoni udong’ ni uvuru.*
15 Kunoke karacelo ku judongo ma wijo ma gibino ku mola ma kwar,
ma udi migi ugam upong’ ku mola ma tar.
16 Pirang’o abino ngo calu ic m’udubere ma jukanu,
calu mukere ma gineno ngo deri?
17 Kuca, kadok jutimrac de adieng’acwiny migi ujik;
kuca, ju m’uol gibeyom.
18 Kuca, jukol gitie agonya karacelo;
gibewinjo ngo dwand ng’atu moko m’ubediyogi nia gitim tic.
19 Kuca, ju ma thindho ku ju ma dongo ceke gi rom,
man ng’eca tie agonya kud i bang’ rwoth pare.
20 Pirang’o Mungu ubemiyo der ni ng’atu m’ubesendere,
man kwo ni ju ma gin’i can ma keci?*
21 Pirang’o gibemito githo, ento tho ubebino ngo?
Gibesayu kakare nisagu lonyo m’upondo,
22 gi ju m’anyong’a ubenegogi lee,
ma mutoro ubenegogi kinde ma ginwang’u liel.
23 Pirang’o ebemiyo der ni ng’atu ma gengi urwinyo ire,
ng’atu ma Mungu utwodo gang’ i kume?
24 Kum gamu ng’et para udoko ira calu cam,
man cur para ubethwogere calu pii.
25 Kum gin m’unyayu ndiri i iya uwok i wiya,
man gin m’abino lworo re m’unwang’a.
26 Abedo ngo ku kwiyocwiny, ku bedomoth kadi ku yom,
ento peko ubemedere ameda ninwang’a.”